Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as ASCII (aiumnntdnl). Alternatives:
[ IAST Unicode (āīūṃṅñṭḍṇḷ) | Velthuis (aaiiuu.m'n~n.t.d.n.l) ]

 

Anguttara Nikaya
Sattaka Nipata
Dhana Vaggo

Sutta 4

U-N-A-B-B-R-E-V-I-A-T-E-D

Vitthata Sattabala Suttam

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, PhD., D.D..

 


 

[1][pts][upal] EVAM ME SUTAM.|| ||

Ekam samayam Bhagava Savatthiyam viharati||
Jetavane Anathapindikassa arame.|| ||

Tatra kho Bhagava bhikkhu amantesi bhikkhavo ti.|| ||

Bhadante ti te bhikkhu Bhagavato paccassosum.|| ||

Bhagava etad avoca:|| ||

2. Satt'imani bhikkhave, balani.|| ||

Katamani satta?|| ||

Saddhabalam,||
viriyabalam,||
hiribalam,||
ottappabalam,||
satibalam,||
sama dhibalam,||
pannabalam.|| ||

Imani kho bhikkhave sattabalani.|| ||

Kataman ca bhikkhave, saddhabalam?|| ||

Idha, bhikkhave, ariyasavako saddho hoti saddahati Tathagatassa bodhim:|| ||

"Iti pi so Bhagava araham sammasambuddho vijjacaranasampanno sugato lokavidu anuttaro purisadammasarathi sattha deva-manussanam buddho Bhagava" ti.|| ||

Idam vuccati bhikkhave saddhabalam.|| ||

Kataman ca bhikkhave, viriyabalam?|| ||

Idha, bhikkhave, ariyasavako araddhaviriyo viharati: akusalanam dhammanam pahanaya, kusalanam dhammanam upasampadaya, thamava dalhaparakkamo anikkhittadhuro kusalesu dhammesu.|| ||

Idam vuccati bhkhave, viriyabalam.|| ||

Kataman ca bhikkhave, hiribalam?|| ||

Idha, bhikkhave, ariyasavako hirima hoti, hiriyati kayaduccaritena, vaciduccaritena, manoduccaritena, hiriyati papakanam akusalanam dhammanam samapattiya.|| ||

Idam vuccati bhikkhave, hiribalam.|| ||

Kataman ca bhikkhave, ottappabalam?|| ||

Idha, bhikkhave, ariyasavako ottappi hoti, ottapati kayaduccaritena, vaciduccaritena, manoduccaritena, ottapati papakanam akusalanam dhammanam samapattiya.|| ||

Idam vuccati bhikkhave, ottappabalam.|| ||

Kataman ca bhikkhave, satibalam?|| ||

Idha, bhikkhave, ariyasavako satima hoti paramena satinepakkena samannagato cirakatampi cirabhasitampi sarita anussarita. Idam vuccati bhikkhave, satibalam.|| ||

Kataman ca bhikkhave, samadhibalam?|| ||

Idha, bhikkhave, vivicc'eva kamehi vivicca akusalehi dhammehi savitakkam savicaram vivekajam piti-sukham pathamam-jhanam upasampajja viharati.|| ||

Vitakka vicaranam vupasama ajjhattam sampasadanam cetaso ekodi-bhavam avitakkam avicaram samadhijam piti-sukham dutiyam-jhanam upasampajja viharati.|| ||

Pitiya ca viraga upekkhako ca viharati,||
sato ca sampajano sukhan ca kayena patisanvedeti,||
yantam ariya avikkhanti:||
'Upekkhako satima sukha-vihari'||
ti tam tatiyam-jhanam upasampajja viharati.|| ||

Sukhassa ca pahana dukkhassa ca pahana pubb'eva somanassa-domanassanam atthangama adukkha-m-asukham upekkha-sati-parisuddhim catuttham-jhanam upasampajja viharati.|| ||

Idam vuccati bhikkhave, samadhibalam.|| ||

Kataman ca bhikkhave, pannabalam?|| ||

Idha, bhikkhave, ariyasavako pannava hoti udayatthagaminiya pannaya samannagato ariyaya nibbedhikaya samma dukkhakkhayagaminiya.|| ||

Idam vuccati bhikkhave, pannabalam.|| ||

Imani kho bhikkhave, sattabalani.

Saddhabalam viriyabalam hiri ottappiyam balam||
Satibalam samadhi ca panna ve sattamam balam.||
Etehi balava bhikkhu sukham jivati pandito.||
Yoniso vicine dhammam pannayattham vipassati.||
Pajjotass'eva nibbanam vimokkho hoti cetaso, ti.|| ||

 


Contact:
E-mail
Copyright Statement