Aṅguttara Nikāya
VIII. Aṭṭhaka Nipāta
VI. Gotamī Vagga aka Sa-ādhāna-Vagga
Sutta 53
Saṅkhitta Gotami-y-Ovāda Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than] Evaṃ me sutaṃ:|| ||
Ekaṃ samayaṃ Bhagavā Vesāliyaṃ viharati Mahāvane Kūṭāgāra-sālāyaṃ.|| ||
Atha kho Mahā-Pajāpatī Gotamī yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhitā kho Mahā-Pajāpatī Gotamī Bhagavantaṃ etad avoca:|| ||
"Sādhu me bhante,||
Bhagavā saṅkhittena dhammaṃ desetu,||
yam ahaṃ Bhagavato dhammaṃ sutvā ekā vūpakaṭṭhā appamattā ātāpinī pahit'attā vihareyyan" ti.|| ||
§
2. "Ye kho tvaṃ Gotamī,||
dhamme jāneyyāsi:|| ||
'Ime dhammā sa-rāgāya saṃvaṭṭanti||
no virāgāya;||
■
saṃyogāya saṃvaṭṭanti||
no visaṃyogāya;||
■
acayāya saṃvaṭṭanti||
no apacayāya;||
■
mah'icchatāya saṃvaṭṭanti||
no appicchatāya;||
■
a-santuṭṭhiyā saṃvaṭṭanti||
no santuṭṭhiyā;||
■
saṅgaṇ'ikāya saṃvaṭṭanti||
no pavivekāya;||
■
kosajjāya saṃvaṭṭanti||
no viriy'ārambhāya;||
■
dubharatāya saṃvaṭṭanti||
no subharatāya' ti.|| ||
Ekaṃsena Gotami, dhāreyyāsi:|| ||
'N'eso Dhammo||
n'eso Vinayo||
n'etaṃ Satthu sāsanan' ti.|| ||
§
3. Ye ca kho tvaṃ Gotamī,||
dhamme jāneyyāsi:|| ||
'Ime dhammā virāgāya saṃvaṭṭanti||
no sārāgāya;||
■
visaṃyogāya saṃvaṭṭanti||
no saṃyogāya;||
■
apacayāya saṃvaṭṭanti||
no ācayāya;||
■
appicchatāya saṃvaṭṭanti||
no mah'icchatāya;||
■
santuṭṭhiyā saṃvaṭṭanti||
no a-santuṭṭhiyā;||
■
pavivekāya saṃvaṭṭanti||
no [281] saṅgaṇ'ikāya;||
■
viriy'ārambhāya saṃvaṭṭanti||
no kosajjāya;||
■
subharatāya saṃvaṭṭanti||
no dubharatāyā' ti.|| ||
Ekaṃsena Gotamī, dhāreyyāsi:|| ||
'Eso Dhammo||
eso Vinayo||
etaṃ Satthu sāsanan'" ti.|| ||
