Saṃyutta Nikāya
II. Nidāna Vagga
14. Dhātu-Saṃyuttaṃ
IV. Catuttha Vagga
Sutta 34
Dukkha [Dukkha-Lakkhaṇa] Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
2. "Paṭhavi-dhātu ce h'idaṃ bhikkhave, ekanta-dukkhā abhavissa dukkh'ānupatitā dukkh-ā-vakkantā anavakkantā sukhena,||
na yidaṃ sattā Paṭhavi-dhātuyā sārajjeyyuṃ.|| ||
Yasmā ca kho bhikkhave, Paṭhavi-dhātu sukhā sukh'ānupatitā sukh-ā-vakkantā anavakkantā dukkhena,||
tasmā sattā Paṭhavi-dhātuyā sārajjanti.|| ||
3. [174] Āpo-dhātu ce h'idaṃ bhikkhave, ekanta-dukkhā abhavissa dukkh'ānupatitā dukkh-ā-vakkantā anavakkantā sukhena,||
na yidaṃ sattā āpo-dhātuyā sārajjeyyuṃ.|| ||
Yasmā ca kho bhikkhave, āpo-dhātu sukhā sukh'ānupatitā sukh-ā-vakkantā anavakkantā dukkhena,||
tasmā sattā āpo-dhātuyā sārajjanti.|| ||
4. Tejo-dhātu ce h'idaṃ bhikkhave, ekanta-dukkhā abhavissa dukkh'ānupatitā dukkh-ā-vakkantā anavakkantā sukhena,||
na yidaṃ sattā tejo-dhātuyā sārajjeyyuṃ.|| ||
Yasmā ca kho bhikkhave, tejo-dhātu sukhā sukh'ānupatitā sukh-ā-vakkantā anavakkantā dukkhena,||
tasmā sattā tejo-dhātuyā sārajjanti.|| ||
5. Vāyo-dhātu ca h'idaṃ bhikkhave, ekanta-dukkhā abhavissa dukkh'ānupatitā dukkh-ā-vakkantā anavakkantā sukhena,||
na yidaṃ sattā vāyo-dhātuyā sārajjeyyuṃ.|| ||
Yasmā ca kho bhikkhave, vāyo-dhātu sukhā sukh'ānupatitā sukh-ā-vakkantā anavakkantā dukkhena,||
tasmā sattā vāyo-dhātuyā sārajjanti.|| ||
6. Paṭhavi-dhātu ce h'idaṃ bhikkhave, ekanta-sukhā abhavissa sukh'ānupatitā sukh-ā-vakkantā anavakkantā dukkhena,||
na yidaṃ sattā Paṭhavi-dhātuyā nibbindeyyuṃ.|| ||
Yasmā ca kho bhikkhave, Paṭhavi-dhātu dukkhā dukkh'ānupatitā dukkh-ā-vakkantā anavakkantā sukhena,||
tasmā sattā Paṭhavi-dhātuyā nibbindanti.|| ||
7. Āpo-dhātu ce h'idaṃ bhikkhave, ekanta-sukhā abhavissa sukh'ānupatitā sukh-ā-vakkantā anavakkantā dukkhena,||
nay idaṃ sattā āpo-dhātuyā nibbindeyyuṃ.|| ||
Yasmā ca kho bhikkhave, āpo-dhātu dukkhā dukkh'ānupatitā dukkh-ā-vakkantā anavakkantā sukhena,||
tasmā sattā āpo-dhātuyā nibbindanti.|| ||
8. Tejo-dhātu ce h'idaṃ bhikkhave, ekanta-sukhā abhavissa sukh'ānupatitā sukh-ā-vakkantā anavakkantā dukkhena,||
nay idaṃ sattā tejo-dhātuyā nibbindeyyuṃ.|| ||
Yasmā ca kho bhikkhave, tejo-dhātu dukkhā dukkh'ānupatitā dukkh-ā-vakkantā anavakkantā sukhena,||
tasmā sattā tejo-dhātuyā nibbindanti.|| ||
9. Vāyo-dhātu ca h'idaṃ bhikkhave, ekanta-sukhā abhavissa sukh'ānupatitā sukh-ā-vakkantā anavakkantā dukkhena,||
nay idaṃ sattā vāyo-dhātuyā nibbindeyyuṃ.|| ||
Yasmā ca kho bhikkhave, vāyo-dhātu dukkhā dukkh'ānupatitā dukkh-ā-vakkantā anavakkantā sukhena,||
tasmā sattā vāyo-dhātuyā nibbindantī" ti.|| ||
