Saṃyutta Nikāya
5. Mahā-Vagga
56. Sacca Saṃyutta
4. Siṃsapā Vagga
Sutta 38
Dutiya Suriy'Upamā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evam me sutaṃ:|| ||
Ekaṃ samayam Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Yāva kīvañ ca me bhikkhave,||
candima-suriyā loke n'ūppajjanti,||
n'eva tāva mahato ālokassa pātu-bhāvo hoti||
mahato obhāsassa.|| ||
Andhantamaṃ tadā hoti||
andhakāratimisā.|| ||
N'eva tāva rattin-divā paññāyanti||
na māsaddhamāsā paññāyanti||
na utusaṃvaccharā paññāyanti.|| ||
Yato ca kho bhikkhave,||
candima-suriyā loke uppajjati,||
atha mahato ālokassa pātu-bhāvo hoti,||
mahato obhāsassa.|| ||
[443] N'eva andhantamaṃ tadā hoti,||
na andhakāratimisā.|| ||
Atha rattin-divā paññāyanti||
māsaddhamāsā paññāyanti||
utusaṃvaccharā paññāyanti.|| ||
Evam eva kho bhikkhave,||
yāva kīvañ ca Tathāgato loke n'ūppajjati||
arahaṃ Sammā Sambuddho,||
n'eva tāva mahato ālokassa pātu-bhāvo hoti||
mahato obhāsassa.|| ||
Andhantamaṃ tadā hoti||
andhakāratimisā.|| ||
N'eva tāva catunnaṃ ariya-saccānaṃ ācikkhanā hoti desanā||
paññā-panā||
paṭṭhapanā||
vivaraṇā||
vibhajanā||
uttānīkammaṃ.|| ||
Yato ca kho bhikkhave, Tathāgato loke uppajjati arahaṃ Sammā Sambuddho||
atha mahato ālokassa pātu-bhāvo hoti||
mahato obhāsassa.|| ||
N'eva andhantamaṃ tadā hoti||
na andhakāratimisā.|| ||
Atha kho catunnaṃ ariya-saccānaṃ ācikkhanā hoti desanā||
paññā-panā||
paṭṭhapanā||
vivaraṇā||
vibhajanā||
uttānīkammaṃ.|| ||
Katamesaṅ catunnaṃ?|| ||
Dukkhassa ariya-saccassa,||
dukkha-samudayassa ariya-saccassa,||
dukkha-nirodhassa ariya-saccassa,||
dukkha-nirodha-gāminī paṭipadāya ariya-saccassa.|| ||
Tasmātiha bhikkhave,||
'idaṃ dukkhan' ti yogo karaṇīyo,||
'ayaṃ dukkha-samudayo' ti yogo karaṇīyo,||
'ayaṃ dukkha-nirodho' ti yogo karaṇīyo,||
'ayaṃ dukkha-nirodha-gāminī paṭipadā' ti yogo karaṇīyo" ti.|| ||
