Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Velthuis (aaiiuu.m'n~n.t.d.n.l) ]

 

Anguttara Nikaya:
Dukanipata

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

III. Bāla Vagga

 


 

Sutta 21

[21] [pts] [than] [olds] Dve'me bhikkhave bālā.|| ||

Katame dve?|| ||

Yo ca accayaɱ accayato na passati,||
yo ca accayaɱ desentassa yathādhammaɱ na patigaṇhāti.|| ||

Ime kho bhikkhave dve bālā ti.|| ||

Dve'me bhikkhave paṇḍitā.|| ||

Katame dve?|| ||

Yo ca accayaɱ accayato passati,||
yo ca accayaɱ desentassa yathādhammaɱ patigaṇhāti.|| ||

Ime kho bhikkhave dve paṇḍitā ti.|| ||

Sutta 22

[22] [pts] [olds] Dve'me bhikkhave Tathāgataɱ abbhācikkhanti.|| ||

Katame dve?|| ||

Duṭṭho vā dosantaro,||
saddho vā duggahītena.|| ||

Ime kho bhikkhave dve Tathāgataɱ abbhācikkhantī ti.|| ||

Sutta 23

[23] [pts] [olds] Dve'me bhikkhave Tathāgataɱ abbhācikkhanti.|| ||

Katame dve?|| ||

[60] Yo ca abhāsitaɱ alapitaɱ Tathāgatena bhāsitaɱ lapitaɱ Tathāgatenā ti dīpeti,||
yo ca bhāsitaɱ lapitaɱ Tathāgatena abhāsitaɱ alapitaɱ Tathāgatenā ti dīpeti.|| ||

Ime kho bhikkhave dve Tathāgataɱ abbhācikkhantī ti.|| ||

Sutta 24

[24] [pts] [olds] Dve'me bhikkhave Tathāgataɱ nābbhācikkhanti.|| ||

Katame dve?|| ||

Yo ca abhāsitaɱ alapitaɱ Tathāgatena abhāsitaɱ alapitaɱ Tathāgatenā ti dīpeti,||
yo ca bhāsitaɱ lapitaɱ Tathāgatena bhāsitaɱ lapitaɱ Tathāgatenā ti dīpeti.|| ||

Ime kho bhikkhave dve Tathāgataɱ nābbhācikkhantī ti.|| ||

Sutta 25

[25] [pts] [than] [olds] Dve'me bhikkhave Tathāgataɱ abbhācikkhanti.|| ||

Katame dve?|| ||

Yo ca neyyatthaɱ suttantaɱ nītattho suttanto ti dīpeti,||
yo ca nītatthaɱ suttantaɱ neyyattho suttanto ti dīpeti.|| ||

Ime kho bhikkhave dve Tathāgataɱ abbhācikkhantī ti.|| ||

Sutta 26

[26] [pts] [olds] Dve'me bhikkhave Tathāgataɱ nābabhācikkhanti.|| ||

Katame dve?|| ||

Yo ca neyyatthaɱ suttantaɱ neyyattho suttanto ti dīpeti,||
yo ca nītatthaɱ suttantaɱ nītattho suttanto ti dīpeti.|| ||

Ime kho bhikkhave dve Tathāgataɱ nābbhācikkhantī ti.|| ||

Sutta 27

[27] [pts] [olds] Paṭicchannakammantassa bhikkhave dvinnaɱ gatīnaɱ aññatarā gati pāṭikaŋkhā:||
nirayo vā tiracchānayoni vā ti.|| ||

Appaṭicchannakammantassa bhikkhave dvinnaɱ gatīnaɱ aññatarā gati pāṭikaŋkhā:||
devā vā manussā vā ti.|| ||

Sutta 28

[28] [pts] [olds] Micchādiṭṭhikassa bhikkhave dvinnaɱ gatīnaɱ aññatarā gati pāṭikaŋkhā:||
nirayo vā tiracchānayoni vā ti.|| ||

Sammādiṭṭhikassa bhikkhave dvinnaɱ gatīnaɱ aññatarā gati pāṭikaŋkhā:||
devā vā manussā vā ti.|| ||

Dussīlassa bhikkhave dve paṭiggāhā:||
nirayo vā tiracchānayoni vā ti.|| ||

Sīlavato bhikkhave dve paṭiggāhā:||
devā vā manussā vā ti.|| ||

Sutta 29

[29] [pts] [olds] Dvāhaɱ bhikkhave atthavase sampassamāno araññe vanapatthāni pantāni senāsanāni paṭisevāmi.|| ||

Katame dve?|| ||

Attano ca diṭṭhadhammasukhavihāraɱ sampassamāno,||
[61] pacchimañ ca janataɱ anukampamāno.|| ||

Ime kho ahaɱ bhikkhave dve atthavase sampassamāno araññe vanapatthāni pantāni senāsanāni paṭisevāmī ti.|| ||

Sutta 30

[30] [pts] [than] [olds] Dve'me bhikkhave dhammā vijja-bhāgiyā.|| ||

Katame dve?|| ||

Samatho ca vipassanā ca.|| ||

Samatho ca bhikkhave bhāvito kam attham anubhoti?|| ||

Cittaɱ bhāvīyati.|| ||

Cittaɱ bhāvitaɱ kam attham anubhoti?|| ||

Yo rāgo, so pahīyati.|| ||

Vipassanā bhikkhave bhāvito kam attham anubhoti?|| ||

Paññā bhāvīyati.|| ||

Paññā bhāvitā kam attham anubhoti?|| ||

Yā avijjā, sā pahīyati|| ||

Rāgupakkiliṭṭhaɱ vā bhikkhave cittaɱ na vimuccati.|| ||

Avijjupakkiliṭṭhā vā paññā na bhāvīyati.|| ||

Iti kho bhikkhave rāgavirāgā ceto-vimutti,||
avijjāvirāgā paññāvimuttī ti.|| ||

 

Bālavaggo tatiyo

 


Contact:
E-mail
Copyright Statement