Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tika Nipāto
II. Rathakāra Vagga

Sutta 12

Sāraṇīya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][bodh][upal] Evaɱ me sutaɱ:

Evaɱ me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍakassa ārāme.|| ||

Tīṇ'imāni bhikkhave rañño khattiyassa muddhāvasittassa yāvajīvaɱ sārāṇiyāni bhavanti.|| ||

Katamāni tīṇi?|| ||

Yasmiɱ bhikkhave padese rājā khattiyo muddhāvasitto jāto hoti.|| ||

Idaɱ, bhikkhave, paṭhamaɱ rañño khattiyassa muddhāvasittassa yāvajīvaɱ sārāṇīyaɱ hoti.|| ||

Puna ca paraɱ bhikkhave yasmiɱ padese rājā khattiyo muddhāvasitto hoti.|| ||

Idaɱ, bhikkhave, dutiyaɱ rañño khattiyassa muddhāvasittassa yāvajīvaɱ sārāṇīyaɱ hoti.|| ||

Puna ca paraɱ bhikkhave yasmiɱ padese rājā khattiyo muddhāvasitto saŋgāmaɱ abhivijinitvā vijitasaŋgāmo tam eva saŋgāmasīsaɱ ajjhāvasati.|| ||

Idaɱ bhikkhava tatiyaɱ rañño khattiyassa muddhāvasittassa yāvajīvaɱ sārāṇīyaɱ hoti.|| ||

Imāni kho bhikkhave tīṇi rañño khattiyassa muddhāvasittassa yāvajīvaɱ sārāṇiyāni bhavanti.|| ||

[107] Evam eva kho bhikkhave tiṇ'imāni bhikkhussa yāvajīvaɱ sārāṇiyāni bhavanti.|| ||

Katamāni tīṇi?|| ||

Yasmiɱ bhikkhave padese bhikkhu kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajito hoti.|| ||

Idaɱ, bhikkhave, paṭhamaɱ bhikkhussa yāvajīvaɱ sārāṇiyaɱ hoti.|| ||

Puna ca paraɱ bhikkhave yasmiɱ padese bhikkhu||
idaɱ dukkhan ti yathābhūtaɱ pajānāti,||
ayaɱ dukkhasamudayo ti yathābhūtaɱ pajanāti,||
ayaɱ dukkhanirodho ti yathābhūtaɱ pajānāti,||
ayaɱ dukkhanirodhagāminī paṭipadā ti yathābhūtaɱ pajānāti.|| ||

Idaɱ bhikkhave dutiyaɱ bhikkhussa yāvajīvaɱ sārāṇiyaɱ hoti.|| ||

Puna ca paraɱ bhikkhave yasmiɱ padese bhikkhu āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe va dhamme sayaɱ abhiññā sacchikatvā upasampajja viharati.|| ||

Idaɱ, bhikkhave, tatiyaɱ bhikkhussa yāvajīvaɱ sārāṇiyaɱ hoti.|| ||

Imāni kho bhikkhave tīṇi bhikkhussa yāvajīvaɱ sārāṇiyāni bhavantī ti.|| ||

 


Contact:
E-mail
Copyright Statement   Webmaster's Page