Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tika Nipāto
II. Rathakāra Vagga

Sutta 15

Rathakāra (Pacetana) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][than][bodh][upal] Evaɱ me sutaɱ:

Ekaɱ samayaɱ Bhagavā Bārāṇasiyaɱ viharati Isipatane Migadāye.|| ||

Tatra kho Bhagavā bhikkhū āmantesi:|| ||

Bhikkhavo ti.|| ||

[111] Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

Bhūtapubbaɱ bhikkhave rājā ahosi Pacetano nāma.|| ||

Atha kho bhikkhave rājā Pacetano rathakāraɱ āmantesi:|| ||

Ito me samma rathakāra,||
channaɱ māsānaɱ accayena saŋgāmo bhavissati,||
sakkasi me samma rathakāra,||
navaɱ cakkayugaɱ kātun ti?|| ||

Sakkomi devā ti kho bhikkhave rathakāro rañño Pacetanassa paccassosi.|| ||

Atha kho bhikkhave rathakāro chahi māsehi chārattūnehi ekaɱ cakkaɱ niṭṭhāpesi.|| ||

Atha kho bhikkhave rājā Pacetano rathakāraɱ āmantesi:|| ||

Ito me samma rathakāra,||
channaɱ divasānaɱ accayena saŋgāmo bhavissati,||
niṭṭhitaɱ navaɱ cakkayugan ti?|| ||

Imehi kho deva chahi māsehi chārattūnehi ekaɱ cakkaɱ niṭṭhitan ti.|| ||

Sakkasi pana me samma rathakāra,||
imehi chahi divasehi dutiyaɱ cakkaɱ niṭṭhāpetun ti?|| ||

Sakkomi devā ti kho bhikkhave rathakāro rañño Pacetanassa paccassosi.|| ||

2. Atha kho bhikkhave rathakāro chahi divasehi dutiyaɱ cakkaɱ niṭṭhāpetvā navaɱ cakkayugaɱ ādāya yena rājā Pacetano ten'upasaŋkami.|| ||

Upasaŋkamitvā rājānaɱ Pacetanaɱ etad avoca:|| ||

Idan te deva navaɱ cakkayugaɱ niṭṭhitan ti.|| ||

Yañ ca te idaɱ samma rathakāra,||
cakkaɱ chahi māsehi niṭṭhitaɱ chārattūnehi,||
yañ ca te idaɱ cakkaɱ chahi divasehi niṭṭhitaɱ.|| ||

Imesaɱ kiɱ nānākaraṇaɱ nesāɱ nāhaɱ kiñci nānākaraṇaɱ passāmī ti.|| ||

Atthi n'esaɱ deva nānākaraṇaɱ,||
passatu deva nānākaraṇan ti.|| ||

Atha kho bhikkhave rathakāro yaɱ taɱ cakkaɱ chahi divasehi niṭṭhitaɱ,||
taɱ pavattesi.|| ||

Taɱ pavattitaɱ samānaɱ yāvatikā abhisankhārassa gati,||
tāvatikaɱ gantvā ciŋgulāyitvā bhūmiyaɱ papati.|| ||

Yaɱ pana taɱ cakkaɱ chahi māsehi [112] niṭṭhitaɱ chārattūnehi taɱ pavattesi.|| ||

Taɱ pavattitaɱ samānaɱ yāvatikā abhisankhārassa gati,||
tāvatikaɱ gantvā akkhāhataɱ maññe aṭṭhāsi.|| ||

3. Ko nu kho samma rathakāra,||
hetu,||
ko paccayo yam idaɱ cakkaɱ chahi divasehi niṭṭhitaɱ,||
taɱ pavattitaɱ samānaɱ yāvatikā abhisankhārassa gati,||
tāvatikaɱ gantvā ciŋgulāyitvā bhumiyaɱ papati?|| ||

Ko pana samma rathakāra,||
hetu,||
ko paccay yam idaɱ cakkaɱ chahi māsehi niṭṭhitaɱ chārattūnehi,||
taɱ pavattitaɱ samānaɱ yāvatikā abhisankhārassa gati,||
tāvatikaɱ gantvā akkhāhataɱ maññe aṭṭhāsī ti?|| ||

Yam idaɱ deva,||
cakkaɱ chahi divasehi niṭṭhitaɱ||
tassa nemī pi savaŋkā sadosā sakasāvā,||
arā pi savaŋkā sadosā sakasāvā,||
nābhī pi savaŋkā sadosā sakasāvā.|| ||

Taɱ nemiyā pi savaŋkattā sadosattā sakasāvattā,||
arānam pi savaŋkattā sadosattā sakasāvattā,||
nābhiyā pi savaŋkattā sadosattā sakasāvattā||
pavattitaɱ samānaɱ yāvatikā abhisankhārassa gati,||
tāvatikaɱ gantvā ciŋgulāyitvā bhumiyaɱ papati.|| ||

Yaɱ pana taɱ deva cakkaɱ chahi māsehi niṭṭhitaɱ chārattūnehi||
tassa nemī pi avaŋkā adosā akasāvā||
arā pi avaŋkā adosā akasāvā||
nābhī pi avaŋkā adosā akasāvā.|| ||

Taɱ nemiyā pi avaŋkattā adosattā akasāvattā,||
arānam pi avaŋkattā adosattā akasāvattā,||
nābhiyā pi avaŋkattā adosattā akasāvattā||
pavattitaɱ samānaɱ yāvatikā abhisankhārassa gati,||
tāvatikaɱ gantvā akkhāhataɱ maññe aṭṭhāsī ti.|| ||

4. Siyā kho pana bhikkhave tumbhākaɱ evam assa:||
añño nūna tena samayena so rathakāro ahosī ti.|| ||

Na kho pan'etaɱ bhikkhave evaɱ daṭṭhabbaɱ.|| ||

Ahaɱ tena samayena so rathakāro ahosi.|| ||

Tadā panāhaɱ bhikkhave kusalo dāruvaŋkānaɱ dārudosānaɱ dārukasāvānaɱ.|| ||

Etarahi kho panāhaɱ bhikkhave arahaɱ sammāsambuddho kusalo kāyavaŋkānaɱ kāyadosānaɱ kāyakasāvānaɱ.|| ||

Kusalo vacīvaŋkānaɱ vacīdosānaɱ vacīkasāvānaɱ.|| ||

Kusalo manovaŋkānaɱ manodosānaɱ manokasāvānaɱ.|| ||

5. Yassa kassaci bhikkhave bhikkhussa vā bhikkhuniyā vā kāyavaŋko appahīno kāyadoso kāyakasāvo||
vacīvaŋko appahīno vacīdoso vacīkasāvo||
manovaŋko appahīno manodoso [113] manokasāvo.|| ||

Evaɱ papatikā te bhikkhave imasmā dhamma-vinayā||
seyyathā pi taɱ cakkaɱ chahi divasehi niṭṭhitaɱ.|| ||

Yassa kassaci bhikkhave bhikkhussa vā bhikkhuniyā vā kāyavaŋko pahīno kāyadoso kāyakasāvo||
vacīvaŋko pahīno vacīdoso vacīkasāvo||
manovaŋko pahīno manodoso manokasāvo.|| ||

Evaɱ patiṭṭhitā te bhikkhave imasmiɱ dhamma-vinaye||
seyyathā pi taɱ cakkaɱ chahi māsehi niṭṭhitaɱ chārattūnehi.|| ||

Tasmāt iha bhikkhave evaɱ sikkhitabbaɱ:|| ||

Kāyavaŋkaɱ pajahissāma,||
kāyadosaɱ,||
kāyakasāvaɱ.|| ||

Vacīvaŋkaɱ pajahissāma,||
vacīdosaɱ,||
vacīkasāvaɱ.|| ||

Manovaŋkaɱ pajahissāma,||
manodosaɱ,||
manokasāvan ti.|| ||

Evaɱ hi vo bhikkhave sikkhitabban ti.|| ||

 


Contact:
E-mail
Copyright Statement   Webmaster's Page