Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tika Nipāto
III. Puggala Vagga

Sutta 21

Kāyasakkhī Suttaɱ aka Saviṭṭha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][olds][bodh][upal] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati,||
Jetavane Anāthapiṇḍikassa ārāme.|| ||

Atha kho āyasmā ca Saviṭṭho āyasmā ca Mahā Koṭṭhito yen'āyasmā Sāriputto ten'upasaŋkamiɱsu.|| ||

Upasaŋkamitvā āyasmatā Sāriputtena saddhiɱ sammodiɱsu.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdiɱsu.|| ||

Eka-m-antaɱ nisinnaɱ kho āyasmantaɱ Saviṭṭhaɱ ayasmā Sāriputto etad avoca:|| ||

Tayo'me āvuso Saviṭṭha,||
puggalā santo saɱvijjamānā lokasmiɱ.|| ||

Katame tayo?|| ||

Kāyasakkhī,||
diṭṭhappatto,||
saddhāvimutto.|| ||

Ime kho āvuso tayo puggalā santo saɱvijjamānā lokasmiɱ.|| ||

Imesaɱ āvuso tiṇṇaɱ puggalānaɱ katamo te puggalo khamati abhikkantataro ca paṇītataro cā ti?|| ||

Tayo'me āvuso Sāriputta,||
puggalā santo saɱvijjamānā lokasmiɱ.|| ||

Katame tayo?|| ||

Kāyasakkhi,||
diṭṭhappatto,||
saddhāvimutto.|| ||

Ime kho āvuso tayo puggalā santo saɱvijjamānā lokasmiɱ.|| ||

Imesaɱ āvuso tiṇṇaɱ puggalānaɱ yvāyaɱ puggalo saddhāvimutto,||
ayaɱ me puggalo khamati,||
imesaɱ tinṇaɱ puggalānaɱ abhikkantataro ca,||
paṇītataro ca.|| ||

Taɱ kissa hetu?|| ||

Imass āvuso puggalassa saddhindurayaɱ adhimattan ti.|| ||

Atha kho āyasmā Sāriputto āyasmantaɱ Mahā Koṭṭhitaɱ etad avoca:|| ||

Tayo me āvuso Koṭṭhita,||
puggalā santo saɱvijjamānā lokasmiɱ.|| ||

Katame tayo?|| ||

Kāyasakkhi,||
diṭṭhappatto,||
saddhāvimutto.|| ||

Ime kho āvuso tayo puggalā santo saɱvijjamānā lokasmiɱ.|| ||

[119] Imesaɱ āvuso tiṇṇaɱ puggalānaɱ katamo te puggalo khamati,||
abhikkantataro ca paṇītataro cā ti?|| ||

Tayo'me āvuso Sāriputta,||
puggalā santo saɱvijjamānā lokasmiɱ.|| ||

Katame tayo?|| ||

Kāyasakkhi,||
diṭṭhappatto,||
saddhāvimutto.|| ||

Ime kho āvuso tayo puggalā santo saɱvijjamānā lokasmiɱ.|| ||

Imesaɱ āvuso tiṇṇaɱ puggalānaɱ yvāyaɱ puggalo kāyasakkhi,||
ayaɱ me puggalo khamati,||
imesaɱ tiṇṇaɱ puggalānaɱ abhikkantataro ca paṇītataro ca.|| ||

Taɱ kissa hetu?|| ||

Imass āvuso puggalassa samādhindriyaɱ adhimattan ti.|| ||

Atha kho āyasmā Mahā Koṭṭhito āyasmantaɱ Sāriputtaɱ etad avoca:|| ||

Tayo'me āvuso Sāriputta,||
puggalā santo saɱvijjamānā lokasmiɱ.|| ||

Katame tayo?|| ||

Kāyasakkhi,||
diṭṭhappatto,||
saddhāvimutto.|| ||

Ime kho āvuso tayo puggalā santo saɱvijjamānā lokasmiɱ.|| ||

Imesaɱ āvuso tiṇṇaɱ puggalānaɱ katamo te puggalo khamati,||
abhikkantataro ca paṇītataro cā ti?|| ||

Tayo'me āvuso Koṭṭhita,||
puggalā santo saɱvijjamānā lokasmiɱ.|| ||

Katame tayo?|| ||

Kāyasakkhi,||
diṭṭhappatto,||
saddhāvimutto.|| ||

Ime kho āvuso tayo puggalā santo saɱvijjamānā lokasmiɱ.|| ||

Imesaɱ āvuso tiṇṇaɱ puggalānaɱ yvāyaɱ puggalo diṭṭhappatto,||
ayaɱ me puggalo khamati,||
imesaɱ tiṇṇaɱ puggalānaɱ abhikkantataro ca paṇītataro ca.|| ||

Taɱ kissa hetu?|| ||

Imass āvuso puggalassa pañndriyaɱ adhimattan ti.|| ||

Atha kho āyasmā Sāriputto āyasmantañ ca Saviṭṭhaɱ āyasmantañ ca Mahā Koṭṭhitaɱ etad avoca:|| ||

Vyākataɱ kho āvuso amhehi sabbeh'eva yathā sakaɱ paṭibhānaɱ.|| ||

Āyām āvuso yena Bhagavā ten'upasaŋkamissāma.|| ||

Upasaŋkamitvā Bhagavato etam atthaɱ ārocessāma.|| ||

Yathā no Bhagavā vyākarissati,||
tathā naɱ dhāressāmā ti.|| ||

Evam āvuso ti kho āyasmā ca Saviṭṭho ayāsmā ca Mahā Koṭṭhito āyasmato Sāriputtassa paccassosuɱ.|| ||

Atha kho āyasmā ca Sāriputto āyasmā ca Saviṭṭho āyasmā ca Mahā Koṭṭhito yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu. Ekaman- [120] taɱ nisinno kho āyasmā Sāriputto yāvatako ahosi āyasmatā ca Saviṭṭhena āyasmatā ca Mahā Koṭṭhitena saddhiɱ kathāsallāpo,||
taɱ sabbaɱ Bhagavato ārocesi.|| ||

Na khv'ettha Sāriputta sukaraɱ ekaɱsena vyākātuɱ,||
ayaɱ imesaɱ tinṇaɱ puggalānaɱ abhikkantataro ca paṇitataro cā ti.|| ||

Ṭhānaɱ h'etaɱ Sāriputta vijjati yvāyaɱ puggalo saddhāvimutto svāyaɱ arahattāya paṭipanno.|| ||

Yvāyaɱ puggalo kāyasakkhi svāyaɱ sakadāgāmī vā anāgāmī vā.|| ||

Yo cāyaɱ puggalo diṭṭhappatto so p'assa sakadāgāmī vā anāgāmī vā.|| ||

Na khv'ettha Sāriputta sukaraɱ ekaɱsena vyākātuɱ ayaɱ imesaɱ tiṇṇaɱ puggalānaɱ abhikkantataro ca paṇitataro cā ti.|| ||

Ṭhānaɱ h'etaɱ Sāriputta vijjati yvāyaɱ puggalo kāyasakkhi svāyaɱ arahattāya paṭipanno.|| ||

Yvāyaɱ puggalo saddhāvimutto svāyaɱ sakadāgāmī vā anāgāmī vā.|| ||

Yo cāyaɱ puggalo diṭṭhappatto so'passa sakadāgāmi vā anāgāmī vā.|| ||

Na khv'ettha Sāriputta sukaraɱ ekaɱsena vyākātuɱ ayaɱ imesaɱ tinṇaɱ puggalānaɱ abhikkantataro ca paṇītataro cā ti.|| ||

Ṭhānaɱ h'etaɱ Sāriputta vijjati yvāyaɱ puggalo diṭṭhappatto svāyaɱ arahattāya paṭipanno.|| ||

Yvāyaɱ puggalo saddhāvimutto svāyaɱ sakadāgāmī vā anāgāmī vā.|| ||

Yo cāyaɱ puggalo kāyasakkhi so p'assa sakadāgāmī vā anāgāmī vā.|| ||

Na khv'ettha Sāriputta sukaraɱ ekaɱsena vyākātuɱ ayaɱ imesaɱ tinṇaɱ puggalānaɱ abhikkantataro ca paṇītataro cā ti.|| ||

 


Contact:
E-mail
Copyright Statement   Webmaster's Page