Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tika Nipāto
III. Puggala Vagga

Sutta 22

Gilāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][than][bodh][upal] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati,||
Jetavane Anāthapiṇḍikassa ārāme.|| ||

Tayo'me bhikkhave gilānā santo saɱvijjamānā lokasmiɱ.|| ||

Katame tayo?|| ||

Idha bhikkhave ekacco gilāno labhanto vā sappāyāni bhojanāni,||
alabhanto vā sappāyāni bhojanāni,||
labhanto vā sappāyāni bhesajjāni,||
alabhanto vā sappāyāni bhesajjāni,||
labhanto [121] vā paṭirūpaɱ upaṭṭhākaɱ,||
alabhanto vā paṭirūpaɱ upaṭṭhākaɱ,||
n'eva vuṭṭhāti tamhā ābādhā.|| ||

Idha pana, bhikkhave, ekacco gilāno labhanto vā sappāyāni bhojanāni,||
alabhanto vā sappāyāni bhojanāni,||
labhanto vā sappāyāni bhesajjāni,||
alabhanto vā sappāyāni bhesajjāni,||
labhanto vā paṭirūpaɱ upaṭṭhākaɱ,||
alabhanto vā paṭirūpaɱ upaṭṭhākaɱ,||
vuṭṭhāti tambhā ābādhā.|| ||

Idha pana bhikkhave ekacco gilāno labhanto'va sappāyāni bhojanāni no alabhanto,||
labhanto'va sappāyāni bhesajjāni no alabhanto,||
labhanto'va paṭirūpaɱ upaṭṭhākaɱ no alabhanto,||
vuṭṭhāti tambhā abādhā.|| ||

Tatra, bhikkhave, yvāyaɱ gilāno labhanto'va sappāyāni bhojanāni no alabhanto,||
labhanto'va sappayāni bhesajjāni no alabhanto,||
labhanto'va paṭirūpaɱ upaṭṭhākaɱ no alabhanto,||
vuṭṭhāti tambhā ābādhā,||
imaɱ kho bhikkhave gilānaɱ paṭicca gilānabhattaɱ anuññātaɱ,||
gilānabhesajjaɱ anuññātaɱ,||
gilānupaṭṭhāko anuññāto.|| ||

Imañ ca pana bhikkhave gilānaɱ paṭicca aññe pi gilānā upaṭṭhātabbā.|| ||

Ime kho bhikkhave tayo gilānā santo saɱvijjamānā lokasmiɱ.|| ||

Evam eva kho bhikkhave tayo'me gilānūpamā puggalā santo saɱvijjamānā lokasmiɱ.|| ||

Katame tayo?|| ||

Idha bhikkhave ekacco puggalo labhanto vā Tathāgataɱ dassanāya,||
alabhanto vā Tathāgataɱ dassanāya,||
labhanto vā Tathāgatappaveditaɱ dhamma-vinayaɱ savaṇāya,||
alabhanto vā Tathāgatappaveditaɱ dhamma-vinayaɱ savaṇāya,||
n'eva okkamati niyāmaɱ kusalesu dhammesu sammattaɱ.|| ||

Idha pana bhikkhave ekacco puggalo labhanto vā Tathāgataɱ dassanāya,||
alabhanto vā Tathagataɱ dassanāya,||
labhanto vā Tathāgatappaveditaɱ dhamma-vinayaɱ savaṇāya,||
alabhanto vā Tathāgatappaveditaɱ dhamma-vinayaɱ savaṇāya,||
okkamati niyāmaɱ kusalesu dhammesu sammattaɱ.|| ||

Idha pana bhikkhave ekacco puggalo labhanto'va Tathāgataɱ dassanāya, no alabhanto,||
labhanto'va Tathāgatappaveditaɱ dhamma-vinayaɱ savaṇāya, no alabhanto,||
okkamati niyāmaɱ kusalesu dhammesu sammattaɱ.|| ||

[122] Tatra, bhikkhave, yvāyaɱ puggalo labhanto'va Tathāgataɱ dassanāya, no alabhanto,||
labhanto'va Tathāgatappaveditaɱ dhamma-vinayaɱ savaṇāya, no alabhanto,||
okkamati niyāmaɱ kusalesu dhammesu sammattaɱ.|| ||

Imaɱ kho bhikkhave puggalaɱ paṭicca dhammadesanā anuññātā.|| ||

Imañ ca pana bhikkhave puggalaɱ paṭicca aññesampi dhammo desetabbo.|| ||

Ime kho bhikkhave tayo gilānūpamā puggalā santo saɱvijjamānā lokasmin ti.|| ||

 


Contact:
E-mail
Copyright Statement   Webmaster's Page