Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
IV. Devadūta Vagga

Sutta 31

Sabrahmaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati,||
Jetavane Anāthapiṇḍikassa ārāme.|| ||

Tayo'me bhikkhave puggalā santo saɱvijjamānā lokasmiɱ.|| ||

Katame tayo?|| ||

Avakujjapañño puggalo,||
ucchaŋgapañño puggalo,||
puthupañño puggalo.|| ||

Katamo ca bhikkhave avakujjapañño puggalo?|| ||

Idha bhikkhave ekacco puggalo ārāmaɱ gantā hoti abhikkhaṇaɱ bhikkhūnaɱ santike dhammasavaṇāya.|| ||

Tassa bhikkhū dhammaɱ desenti,||
ādi kalyāṇaɱ majjhe kalyāṇaɱ pariyosāna-kalyāṇaɱ,||
sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāsenti.|| ||

So tasmiɱ āsane nisinno tassā kathāya n'eva ādiɱ manasikaroti,||
na majjhaɱ manasikaroti,||
na pariyosānaɱ manasikaroti.|| ||

Vuṭṭhito pi tamhā āsanā tassā kathāya n'eva ādiɱ manasikaroti,||
na majjhaɱ manasikaroti,||
na pariyosānaɱ manasikaroti.|| ||

seyyathā pi, bhikkhave, kumbho nikkujjo,||
tatra udakaɱ āsittaɱ vivaṭṭati, no saṇṭhāti.|| ||

Evam eva kho bhikkhave idh'ekacco puggalo ārāmaɱ gantā hoti abhikkhaṇaɱ bhikkhūnaɱ santike dhammasavaṇāya.|| ||

Tasasa bhikkhū dhammaɱ desenti,||
ādi kalyāṇaɱ majjhe kalyāṇaɱ pariyosāna-kalyāṇaɱ,||
sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāsenti.|| ||

So tasmiɱ āsane nisinno tassā kathāya n'eva ādiɱ manasikaroti,||
na majjhaɱ manasikaroti,||
na pariyosānaɱ manasikaroti.|| ||

Vuṭṭhito pi tamhā āsanā tassā kathāya n'eva ādiɱ manasikaroti,||
na majjhaɱ manasikaroti,||
na pariyosānaɱ manasikaroti.|| ||

Ayaɱ vuccati bhikkhave avakujjapañño puggalo.|| ||

Katamo ca bhikkhave ucchaŋgapañño puggalo?|| ||

Idha bhikkhave ekacco puggalo ārāmaɱ gantā hoti abhikkhaṇaɱ bhikkhūnaɱ santike dhammasavaṇāya.|| ||

Tassa bhikkhū dhammaɱ desenti,||
ādi kalyāṇaɱ majjhe kalyāṇaɱ pariyosāna-kalyāṇaɱ,||
sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāsenti.|| ||

So tasmiɱ āsane nisinno tassā kathāya ādim pi manasikaroti,||
majjham pi manasikaroti,||
pariyasonam pi manasikaroti.|| ||

Vuṭṭhito pi tamhā āsanā tassā kathāya n'eva ādiɱ manasikaroti,||
na majjhaɱ manasikaroti,||
na pariyosānaɱ manasikaroti.|| ||

Seyyathā pi, bhikkhave, purisassa ucchaŋge nānākhajjakāni ākiṇṇāni tilā taṇḍulā modakā badarā,||
so tambhā āsanā vuṭṭha- [131] hanto satisammosā pakireyya.|| ||

Evam eva kho bhikkhave idh'ekacco puggalo ārāmaɱ gantā hoti abhikkhaṇaɱ bhikkhūnaɱ santike dhammasavaṇāya.|| ||

Tassa bhikkhū dhammaɱ desenti,||
ādi kalyāṇaɱ majjhe kalyāṇaɱ pariyosāna-kalyāṇaɱ,||
sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāsenti.|| ||

So tasmiɱ āsane nisinno tassā kathāya ādim pi manasikaroti,||
majjham pi manasikaroti,||
pariyesānam pi manasikaroti.|| ||

Vuṭṭhito pi tamhā āsanā tassā kathāya n'eva ādiɱ manasikaroti,||
na majjhaɱ manasikaroti,||
na pariyosānaɱ manasikaroti.|| ||

Ayaɱ vuccati bhikkhave ucchaŋgapañño puggalo.|| ||

Katamo ca bhikkhave puthupañño puggalo?|| ||

Idha bhikkhave ekacco puggalo ārāmaɱ gantā hoti abhikkhaṇaɱ bhikkhūnaɱ santike dhammasavaṇāya.|| ||

Tassa bhikkhū dhammaɱ desenti,||
ādi kalyāṇaɱ majjhe kalyāṇaɱ pariyosāna-kalyāṇaɱ,||
sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāsenti.|| ||

So tasmiɱ āsane nisinno tassā kathāya ādim pi manasikaroti,||
majjham pi manasikaroti,||
pariyasonam pi manasikaroti.|| ||

Vuṭṭhito pi tamhā āsanā tassā kathāya ādim pi manasikaroti,||
majjham pi manasikaroti,||
pariyosānam pi manasikaroti.|| ||

Seyyathā pi, bhikkhave, kumbho ukkujjo,||
tatra udakaɱ āsittaɱ saṇṭhāti, no vivaṭṭati.|| ||

Evam eva kho bhikkhave idh'ekacco puggalo ārāmaɱ gantā hoti abhikkhaṇaɱ bhikkhūnaɱ santike dhammasavaṇāya.|| ||

Tassa bhikkhū dhammaɱ desenti,||
ādi kalyāṇaɱ majjhe kalyāṇaɱ pariyosāna-kalyāṇaɱ,||
sātthaɱ savyañjanaɱ kevalaparipunṇaɱ parisuddhaɱ brahmacariyaɱ pakāsenti.|| ||

So tasmiɱ āsane nisinno tassā kathāya ādim pi manasikaroti,||
majjham pi manasikaroti,||
pariyosānam pi manasikaroti.|| ||

Vucṭhito pi tamhā āsanā tassā kathāya ādim pi manasikaroti,||
majjham pi manasikaroti,||
pariyosānam pi manasikaroti.|| ||

Ayaɱ vuccati bhikkhave puthupañño puggalo.|| ||

Ime kho bhikkhave tayo puggalā santo saɱvijjamānā lokasmin ti.|| ||

9. Avakujjapañño puriso dummedho avicakkhaṇo,||
Abhikkhaṇam pi ce hoti gantā bhikkhūnaɱ santike.|| ||

10. Ādiɱ kathāya majjhañ ca pariyosānañ ca tādiso.||
Uggahetuɱ na sakkoti paññā hi'ssa na vijjati.|| ||

11. Ucchaŋgapañño puriso seyyo etena vuccati.||
Abhikkhaṇam pi ce hoti gantā bhikkhūna santike.|| ||

12. Ādiɱ kathāya majjhañ ca pariyāsānañ ca tādiso,||
Nisinno āsane tasmiɱ uggahetvāna vyañjanaɱ,||
Vuṭṭhito na pajānāti gahitam pi'ssa mussati.|| ||

13. Puthupañño ca puriso seyyo etehi vuccati,||
Abhikkhaṇam pi ce hoti gantā bhikkhūna santike.|| ||

14. Ādiɱ kathāya majjhañ ca pariyosānañ ca tādiso,||
Nisinno āsane tasmiɱ uggahetvāna vyañjanaɱ.|| ||

15. Dhāreti seṭṭhasaŋkappo avyaggamanaso naro,||
Dhammānudhammapaṭipanno dukkhassantakaro siyā ti.|| ||

 

Puggalavaggo tatiyo

 


Contact:
E-mail
Copyright Statement   Webmaster's Page