Aṅguttara Nikāya


[Home]  [Sutta Indexes]  [Glossology]  [Site Sub-Sections]


 

Aṅguttara-Nikāya
III. Tika Nipāta
IV. Deva-Dūta Vagga

Sutta 32

Ānanda Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[132]

[1][pts][bodh][upal][olds][than] Evaṃ me sutaṃ:|| ||

Ekaṃ samayaṃ Bhagavā Sāvatthiyaṃ viharati.|| ||

Atha kho āyasmā Ānando yena Bhagavā ten'upasaṅkami.|| ||

Upasaṅkamitvā Bhagavantaṃ abhivādetvā eka-m-antaṃ nisidi.|| ||

Eka-m-antaṃ nisinno kho āyasmā Ānando Bhagavantaṃ etad avoca:|| ||

"Siyā nu kho bhante bhikkhuno tathā-rūpo samādhi-paṭilābho,||
yathā imasmiñ ca saviññāṇake kāye ahaṃ-kāra-mamaṅ-kāra-mānānusayā nāssu,||
bahiddhā ca sabba-nimittesu ahaṃ-kāra-mamaṅ-kāra-mānānusayā nāssu,||
yañ ca ceto-vimuttiṃ paññā-vimuttiṃ upasampajja viharato ahaṃ-kāra-mamaṅ-kāra-mānānusayā na honti,||
tañ ca ceto-vimuttiṃ paññā-vimuttiṃ upasampajja vihareyyā" ti?|| ||

"Siyā Ānanda bhikkhuno tathā-rūpo samādhi-paṭilābho,||
yathā imasmiñ ca saviññāṇake kāye||
ahaṃ-kāra-mamaṅ-kāra-mānānusayā nāssu,||
bahiddhā ca sabba-nimittesu ahaṃ-kāra-mamaṅ-kāra-mānānusayā nāssu,||
yañ ca ceto-vimuttiṃ paññā-vimuttiṃ upasampajja viharato ahaṃ-kāra-mamaṅ-kāra-mānānusayā na honti,||
tañ ca ceto-vimuttiṃ paññā-vimuttiṃ upasampajja vihareyyā" ti.|| ||

"Yathā kathaṃ pana bhante siyā bhikkhuno tathā-rūpo samādhi-paṭilābho,||
yathā imasmiñ ca saviññāṇake kāye ahaṃ-kāra-mamaṅ-kāra-mānānusayā na honti,||
bahiddhā ca sabba-nimittesu ahaṃ-kāra-mamaṅ-kāra-mānānusayā na honti,||
yaṃ ca ceto-vimuttiṃ paññā-vimuttiṃ upasampajja viharato ahaṃ-kāra-mamaṅ-kāra-mānānusayā na honti,||
taṃ ca ceto-vimuttiṃ paññā-vimuttiṃ upasmapajja vihareyyā" ti?|| ||

[133] "Idh'Ānanda bhikkhuno evaṃ hoti:|| ||

'Etaṃ santaṃ,||
etaṃ paṇītaṃ,||
yad idaṃ sabba-saṅkāra-samatho||
sabb'ūpadhi-paṭinissaggo||
taṇha-k-khayo||
virāgo||
nirodho||
Nibbāṇan' ti.|| ||

Evaṃ kho Ānanda siyā bhikkhuno tathā-rūpo samādhi-paṭilābho,||
yathā imasmiṃ ca saviññāṇake kāye ahaṃ-kāra-mamaṅ-kāra-mānānusayā nāssu,||
bahiddhā ca sabba-nimittesu ahaṃ-kāra-mamaṅ-kāra-mānānusayā nāssu,||
yaṃ ca ceto-vimuttiṃ paññā-vimuttiṃ upasampajja viharato ahaṃ-kāra-mamaṅ-kāra-mānānusayā na honti,||
taṃ ca ceto-vimuttiṃ paññā-vimuttiṃ upasampajja vihareyya.|| ||

Idaṃ ca pana me taṃ Ānanda sandhāya bhāsitaṃ Pārāyaṇe Puṇṇakapañhe:|| ||

'Saṅkhāya lokasmiṃ parovarāni||
Yass'iñjitaṃ n'atthi kuhiñci loke,||
Santo vidhūmo anīgho nirāso||
Atāri so jātijaran ti brūmī'" ti.|| ||

 


 

Sāriputta Suttaṃ

[2][pts][upal][olds][bodh] Atha kho āyasmā Sāriputto yena Bhagavā ten'upasaṅkami.|| ||

Upasaṅkamitvā Bhagavanataṃ abhivādetvā eka-m-antaṃ nisīdi.|| ||

Eka-m-antaṃ nisinnaṃ kho āyasmantaṃ Sāriputtaṃ Bhagavā etad avoca:|| ||

"Saṅkhittena pi kho ahaṃ Sāriputta dhammaṃ deseyyaṃ,||
vitthārena pi kho ahaṃ Sāriputta dhammaṃ deseyyaṃ,||
saṅkhittavitthārena pi kho ahaṃ Sāriputta dhammaṃ deseyyaṃ,||
aññātaro ca dullabhā" ti.|| ||

"Etassa Bhagavā kālo,||
etassa Sugata kālo,||
yaṃ Bhagavā saṅkhittena pi dhammaṃ deseyya,||
vitthārena pi dhammaṃ deseyya,||
saṅkhittavitthārena pi dhammaṃ deseyya,||
bhavissanti Dhammassa aññātāro" ti.|| ||

"Tasmātiha Sāriputta evaṃ sikkhitabbaṃ:|| ||

'Imasmiṃ ca saviññāṇake kāye ahaṃ-kāra-ma-maṅkāra-mān-ā-nusayā na bhavissanti,||
bahiddhā ca sabba-nimittesu ahaṃ-kāra-mamaṅ-kāra-mānānusayā na bhavissanti,||
yaṃ ca ceto-vimuttiṃ paññā-vimuttiṃ upasampajja viharato ahaṃ-kāra-mamaṅ-kāra-mānānusayā na honti,||
tañ ca ceto-vimuttiṃ paññā-vimuttiṃ upasampajja viharissāmā' ti.|| ||

Evaṃ hi vo Sāriputta sikkhitabbaṃ.|| ||

Yato kho Sāriputta bhikkhuno imasmiṃ saviññā- [134] ṇake kāye ahaṃ-kāra-mamaṅ-kāra-mānānusayā na honti,||
bahiddhā ca sabba-nimittesu ahaṃ-kāra-mamaṅ-kāra-mānānusayā na honti,||
yaṃ ca ceto-vimuttiṃ paññā-vimuttiṃ upasampajja viharato ahaṃ-kāra-mamaṅ-kāra-mānānusayā na honti,||
tañ ca ceto-vimuttiṃ paññā-vimuttiṃ upasampajja viharati.|| ||

Ayaṃ vuccati Sāriputta bhikkhu acchecchi,||
taṇhaṃ,||
vāvattayī saṃyojanaṃ,||
sammā mān-ā-bhisamayā antam akāsi dukkhassa.|| ||

Idaṃ ca pana me taṃ Sāriputta sandhāya bhāsitaṃ Pārāyaṇe Udayapañhe:|| ||

'Pahāṇaṃ kāma-saññānaṃ domanassāna c'ūbhayaṃ,||
Thīnassa ca panūdanaṃ kukkuccānaṃ nivāraṇaṃ,||
Upekkhāsatisaṃsuddhaṃ dhammatakkapurejavaṃ,||
Aññāvimokkhaṃ pabrūmi avijjāya ppabhedanaṃ'" ti.|| ||

 


Contact:
E-mail
Copyright Statement