Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
IV. Devadūta Vagga

Sutta 36

Catumahārāja Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][bodh] Evaɱ me sutaɱ.|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Aṭṭhamiyaɱ bhikkhave pakkhassa Catunnaɱ Mahārājānaɱ amaccā pārisajjā imaɱ lokaɱ anuvicaranti,||
kacci bahū manussā manussesu matteyyā petteyyā sāmaññā brahmaññā kule jeṭṭhāpacāyino uposathaɱ upavasanti,||
paṭijāgaranti,||
puññāni karontī ti.|| ||

Cātuddasi bhikkhave pakkhassa Catunnaɱ Mahārājānaɱ puttā imaɱ lokaɱ anuvicaranti,||
kacci bahū manussā manussesu matteyyā petteyyā sāmaññā brahmaññā kule [143] jeṭṭhāpacāyino uposathaɱ upavasanti,||
paṭijāgaranti,||
puññāni karontī' ti.|| ||

Tad ahu bhikkhave uposathe paṇṇarase Cattāro Mahārājā sāmaɱ yeva imaɱ lokaɱ anuvicaranti:||
'kacci bahū manussā manussesu matteyyā petteyyā sāmaññā brahmaññā kule jeṭṭhāpacāyino uposathaɱ upavasanti,||
paṭijāgaranti,||
puññāni karontī' ti|| ||

Sace bhikkhave appakā honti manussā manussesu matteyyā petteyyā sāmaññā brahmaññā kule jeṭṭhāpacāyino uposathaɱ upavasanti,||
paṭijāgaranti,||
puññāni karon ti.|| ||

Tam enaɱ bhikkhave Cattāro Mahārājā devānaɱ Tāvatiɱsānaɱ sudhammāyaɱ sabhāyaɱ sannisinnānaɱ sannipatitānaɱ ārocenti:|| ||

Appakā kho mārisā manussā manussesu matteyyā petteyyā sāmaññā brahmaññā kule jeṭṭhāpacāyino uposathaɱ upavasanti,||
paṭijāgaranti,||
puññāni karontī' ti.|| ||

Tena hi bhikkhave devā Tāvatiɱsā anattamanā honti:|| ||

Dibbā vata bho kāyā parihāyissanti paripūrissanti asurākāyā ti.|| ||

Sace pana bhikkhave bahū honti manussā manussesu matteyyā petteyyā sāmaññā brahmaññā kule jeṭṭhāpacāyino uposathaɱ upavasanti,||
paṭijāgaranti,||
puññāni karontī ti.|| ||

Tam enaɱ bhikkhave Cattāro Mahārājāno devānaɱ Tāvatiɱsānaɱ sudhammāyaɱ sabhāyaɱ sannisinnānaɱ sannipatitānaɱ ārocenti:|| ||

'Bahū kho mārisā manussā manussesu matteyyā petteyyā sāmaññā buhmaññā kule jeṭṭhāpacāyino uposathaɱ upavasanti,||
paṭijāgaranti,||
puññāni karontī ti.|| ||

Tena hi bhikkhave devā Tāvatiɱsā attamanā honti:|| ||

'Dibbā vata bho kāyā paripūrissantī,||
parihāyissanti asurākāyā ti.|| ||

 


Contact:
E-mail
Copyright Statement   Webmaster's Page