Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
V. Cūḷa Vagga

Sutta 50

Mahā Cora Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][bodh] Evaɱ me sutaɱ.|| ||

Evaɱ me sutaɱ ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Tīhi bhikkhave aŋgehi samannāgato mahācoro sandhim pi chindati,||
nillopam pi harati,||
ekāgārikam pi karoti,||
paripanthe pi tiṭṭhati.|| ||

Katamehi tīhi?|| ||

Idha bhikkhave mahācoro visamanissito ca hoti,||
gahaŋanissito ca hoti,||
balavanissito ca hoti.|| ||

Kathañ ca bhikkhave mahācoro visamanissito hoti?|| ||

Idha bhikkhave mahācoro nadīviduggaɱ vā nissito hoti,||
pabbatavisamaɱ vā.|| ||

Evaɱ kho bhikkhave mahācoro visamanissito hoti.|| ||

Kathañ ca bhikkhave mahācoro gahaŋanissito hoti?|| ||

Idha bhikkhave mahācoro tiṇagahanaɱ vā nissito hoti [154] rukkhagahanaɱ vā gedhaɱ vā mahāvanasaṇḍaɱ vā.|| ||

Evaɱ kho bhikkhave mahācoro gahaŋanissito hoti.|| ||

Kathañ ca bhikkhave mahācoro balavanissito hoti?|| ||

Idha bhikkhave mahācoro rājānaɱ vā rāja-mahāmattānaɱ vā nissito hoti.|| ||

Tassa evaɱ hoti:|| ||

Sace maɱ koci kiñci vakkhati,||
ime me rājāno vā rājamahāmattā vā pariyodhāya atthaɱ bhaṇissantī ti.|| ||

Sace naɱ koci kiñci āha,||
tyāssa rājāno vā rājamahāmattā vā pariyodhāya atthaɱ bhaṇanti.|| ||

Evaɱ kho bhikkhave mahācoro balavanissito hoti.|| ||

Imehi kho bhikkhave tīhi aŋgehi samannāgato mahācoro sandham pi chindati,||
nillopam pi harati,||
ekāgārikam pi karoti,||
paripanthe pi tiṭṭhati.|| ||

2. Evam eva kho bhikkhave tīhi dhammehi samannāgato pāpabhikkhu khataɱ upahataɱ attānaɱ pariharati,||
sāvajjo ca hoti sānuvajjo viññūnaɱ,||
bahuɱ ca apuññaɱ pasavati.|| ||

Katamehi tīhi?|| ||

Idha bhikkhave pāpabhikkhu visamanissito ca hoti,||
gahaŋanissito ca,||
balavanissito ca.|| ||

Kathañ ca bhikkhave pāpabhikkhu visamanissito hoti?|| ||

Idha bhikkhave pāpabhikkhu visamena kāyakammena samannāgato hoti,||
visamena vacīkammena samannāgato hoti,||
visamena manokammena samannāgato hoti.|| ||

Evaɱ kho bhikkhave pāpabhikkhu visamanissito hoti.|| ||

Kathañ ca bhikkhave pāpabhikkhu gahaŋanissito hoti?|| ||

Idha bhikkhave pāpabhikkhu micchādiṭṭhiko hoti,||
antaggāhikāya diṭṭhiyā samannāgato hoti.|| ||

Evaɱ kho bhikkhave pāpabhikkhu gahaŋanissito hoti.|| ||

Kathañ ca bhikkhave pāpabhikkhu balavanissito hoti?|| ||

Idha bhikkhave pāpabhikkhu rājānaɱ vā rājamahāmattānaɱ vā nissito hoti.|| ||

Tassa evaɱ hoti:|| ||

Sace maɱ koci kiñci vakkhati,||
ime me rājāno vā rājamahāmattā vā pariyodhāya atthaɱ bhaṇissantī ti.|| ||

Sace naɱ koci kiñci āha,||
tyāssa rājāno vā rājamahāmattā vā pariyodhāya atthaɱ bhaṇanti.|| ||

Evaɱ kho bhikkhave pāpabhikkhu balavanissito hoti.|| ||

Imehi [155] kho bhikkhave tīhi dhammehi samannāgato pāpabhikkhu khataɱ upahataɱ attānaɱ pariharati,||
sāvajjo ca hoti,||
sānuvajjo ca viññūnaɱ.|| ||

Bahuɱ ca apuññaɱ pasavatī'ti.|| ||

 

Cūlavaggo pañcamo.
Paṭhamo paṇṇāsako samatto

 


Contact:
E-mail
Copyright Statement   Webmaster's Page