Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
VI. Brāhmaṇa Vagga

Sutta 54

Paribbājaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][bodh] Evaɱ me sutaɱ.|| ||

Evaɱ me sutaɱ ekaɱ samayaɱ Bhagavā Sāvatthiyaɱ viharati.|| ||

Atha kho aññataro brāhmaṇo paribbājako yena Bhagavā ten'upasaŋkami.|| ||

Upasaɱkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā etamantaɱ nisīdi.|| ||

Eka-m-antaɱ nisīnno kho brāhmaṇo paribbājako Bhagavantaɱ etad avoca:|| ||

'Sandiṭṭhiko dhammo! Sandiṭṭhiko dhammo! ti bho Gotama vuccati.|| ||

Kittāvatā nu kho bho Gotama sandiṭṭhiko dhammo hoti akāliko ehipassiko opanayiko paccattaɱ veditabbo viññūhī ti?|| ||

Ratto kho brāhmaṇa rāgena abhibhūto pariyādinnacitto attavyābādhāya pi ceteti,||
paravyābādhāya pi ceteti,||
ubhayavyābādhāya pi ceteti.|| ||

Cetasikam pi dukkhaɱ domanassaɱ paṭisaŋvedeti.|| ||

Rāge pahīṇe n'eva attavyābādhāya pi ceteti,||
na paravyābyādhāya pi ceteti,||
na ubhayavyādhāya pi ceteti,||
na cetasikaɱ dukkhaɱ domanassaɱ paṭisaŋvedeti.|| ||

[158] Ratto kho brāhmaṇa rāgena abhibhūto pariyādinnacitto kāyena duccaritaɱ carati,||
vācāya duccaritaɱ carati,||
manasā duccaritaɱ carati.|| ||

Rāge pahīṇe n'eva kāyena duccaritaɱ carati,||
na vācāya duccaritaɱ carati,||
na manasā duccaritaɱ carati.|| ||

Ratto kho brāhmaṇa rāgena abhibhūto pariyādinnacitto attattham pi yathābhūtaɱ nappajānāti,||
parattham pi yathābhūtaɱ nappajānāti,||
ubhayattham pi yathābhūtaɱ nappajānāti.|| ||

Rāge pahīṇe attattham pi yathābhūtaɱ pajānāti,||
parattham pi yathābhūtaɱ pajānāti,||
ubhayattham pi yathābhūtaɱ pajānāti.|| ||

Evam pi kho brāhmaṇa sandiṭṭhiko dhammo hoti akāliko ehipassiko opanayiko paccattaɱ veditabbo viññūhī ti.|| ||

Duṭṭho kho brāhmaṇa dosena abhibhūto pariyādinnacitto attavyābādhāya pi ceteti,||
paravyābādhāya pi ceteti,||
ubhayavyābādhāya pi ceteti.|| ||

Cetasikam pi dukkhaɱ domanassaɱ paṭisaŋvedeti.|| ||

Dose pahīṇe n'eva attavyābādhāya pi ceteti,||
na paravyābādhāya pi ceteti,||
na ubhayavyābādhāya pi ceteti,||
na cetasikaɱ dukkhaɱ domanassaɱ paṭisaŋvedeti.|| ||

Duṭṭho kho brāhmaṇa dosena abhibhūto pariyādinnacitto kāyena duccaritaɱ carati,||
vācāya duccaritaɱ carati,||
manasā duccaritaɱ carati.|| ||

Dose pahīṇe n'eva kāyena duccaritaɱ carati,||
na vācāya duccaritaɱ carati,||
sa manasā duccaritaɱ carati.|| ||

Duṭṭho kho brāhmaṇa dosena abhibhūto pariyādinnacitto attattham pi yathābhūtaɱ nappajānāti,||
parattham pi yathābhūtaɱ nappajānāti,||
ubhayattham pi yathābhūtaɱ nappajānāti.|| ||

Dose pahīṇe attattham pi yathābhūtaɱ pajānāti,||
parattham pi yathābhūtaɱ pajānāti,||
ubhayattham pi yathābhūtaɱ pajānāti.|| ||

Evam pi kho brāhmaṇa sandiṭṭhiko dhammo hoti akāliko ehipassiko opanayiko paccattaɱ veditabbo viññūhī'ti.|| ||

Mūḷho kho brāhmaṇa mohena abhibhūto pariyādinnacitto attavyābādhāya pi ceteti,||
paravyābādhāya pi ceteti,||
ubhayavyābādhāya pi ceteti.|| ||

Cetasikam pi dukkhaɱ domanassaɱ paṭisaŋvedeti.|| ||

Mohe pahīṇe n'eva attavyābādhāya pi ceteti,||
na paravyābādhāya pi ceteti,||
na ubhayavyābādhāya pi ceteti,||
na cetasikaɱ dukkhaɱ domanassaɱ paṭisaŋvedeti.|| ||

Mūḷho kho brāhmaṇa mohena abhibhūto pariyādinnacitto kāyena duccaritaɱ carati,||
vācāya duccaritaɱ carati,||
manasā duccaritaɱ carati.|| ||

Mohe pahīṇe n'eva kāyena duccaritaɱ carati,||
na vācāya duccaritaɱ carati,||
na manasā duccaritaɱ carati.|| ||

Mūḷho kho brāhmaṇa mohena abhibhūto pariyādinnacitto attattham pi yathābhūtaɱ nappajānāti,||
parattham pi yathābhūtaɱ nappajānāti,||
ubhayattham pi yathābhūtaɱ nappajānāti.|| ||

Mohe pahīṇe attattham pi yathābhūtaɱ pajānāti,||
parattham pi yathābhūtaɱ pajānāti,||
ubhayattham pi yathābhūtaɱ pajānāti.|| ||

Evaɱ kho brāhmaṇa sandiṭṭhiko dhammo hoti akāliko ehipassiko opanayiko paccattaɱ veditabbo viññūhī ti.|| ||

Abhikkantaɱ bho Gotama,||
abhikkantaɱ bho Gotama,||
seyyathā pi bho Gotama nikkujjitaɱ vā ukkujjeyya,||
paṭicchannaɱ vā vivareyya,||
mūḷhassa vā maggaɱ ācikkheyya,||
andhakāre vā telapajjotaɱ dhāreyya,||
cakkhumanto rūpāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Esāhaɱ Bhagavantaɱ Gotamaɱ saraṇaɱ gacchāmi,||
dhammañca bhikkhu-saŋghañ ca.|| ||

Upāsakaɱ maɱ bhavaɱ Gotamo dhāretu ajjatagge pāṇupetaɱ saraṇaɱgatan ti.|| ||

 


Contact:
E-mail
Copyright Statement   Webmaster's Page