Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
VI. Brāhmaṇa Vagga

Sutta 55

Nibbuta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][bodh] Evaɱ me sutaɱ.|| ||

Evaɱ me sutaɱ ekaɱ samayaɱ Bhagavā Sāvatthiyaɱ viharati.|| ||

Atha kho Jānussoṇi brāhmaṇo yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Jānussoṇi brāhmaṇo Bhagavantaɱ etad avoca:|| ||

Sandiṭṭhikaɱ nibbāṇaɱ! sandiṭṭhikaɱ nibbāṇan! ti bho Gotama vuccati.|| ||

Kittāvatā nu kho bho Gotama sandiṭṭhikaɱ nibbāṇaɱ hoti akālikaɱ ehipassikaɱ opanayikaɱ paccattaɱ veditabbaɱ viññūhī ti?|| ||

[159]Ratto kho brāhmaṇa rāgena abhibhūto pariyādinnacitto attavyābādhāya pi ceteti,||
paravyābādhāya pi ceteti,||
ubhayavyābādhāya pi ceteti.|| ||

Cetasikam pi dukkhaɱ domanassaɱ paṭisaŋvedeti.|| ||

Rāge pahīṇe n'eva attavyābādhāya pi ceteti,||
na paravyābādhāya pi ceteti,||
na ubhayavyābādhāya pi ceteti,||
na cetasikaɱ dukkhaɱ domanassaɱ paṭisaŋvedeti.|| ||

Evam pi kho brāhmaṇa sandiṭṭhiko dhammo hoti akāliko ehipassiko opanayiko paccattaɱ veditabbo viññūhī ti.|| ||

Duṭṭho kho brāhmaṇa dosena abhibhūto pariyādinnacitto attavyābādhāya pi ceteti,||
paravyābādhāya pi ceteti,||
ubhayavyābādhāya pi ceteti.|| ||

Cetasikam pi dukkhaɱ domanassaɱ paṭisaŋvedeti.|| ||

Rāge pahīṇe n'eva attavyābādhāya pi ceteti,||
na paravyābādhāya pi ceteti,||
na ubhayavyābādhāya pi ceteti,||
na cetasikaɱ dukkhaɱ domanassaɱ paṭisaŋvedeti.|| ||

Evam pi kho brāhmaṇa sandiṭṭhiko dhammo hoti akāliko ehipassiko opanayiko paccattaɱ veditabbo viññūhī ti.|| ||

Mū'ho kho brāhmaṇa mohena abhibhuto pariyādinnacitto attavyābādhāya pi ceteti,||
paravyābādhāya pi ceteti,||
ubhayavyābādhāya pi ceteti.|| ||

Cetasikam pi dukkhaɱ domanassaɱ paṭisaŋvedeti.|| ||

Mohe pahīṇe n'eva attavyābādhāya pi ceteti,||
na paravyābādhāya pi ceteti,||
na ubhayavyābādhāya pi ceteti||
na cetasikaɱ dukkhaɱ domanassaɱ paṭisaŋvedeti.|| ||

Evam pi kho brāhmaṇa sandiṭṭhiko dhammo hoti akāliko ehipassiko opanayiko paccattaɱ veditabbo viññūhī ti.|| ||

Yato ca kho ayaɱ brāhmaṇa anavasesaɱ rāgakkhayaɱ paṭisaŋvedeti,||
anavasesaɱ dosakkhayaɱ paṭisaŋvedeti,||
anavasesaɱ mohakkhayaɱ paṭisaŋvedeti.|| ||

Evaɱ kho brāhmaṇa sandiṭṭhikaɱ nibbāṇaɱ hoti akālikaɱ ehipassikaɱ opanayikaɱ paccattaɱ veditabbaɱ viññūhī ti.|| ||

Abhikkantaɱ bho Gotama,||
abhikkantaɱ bho Gotama,||
seyyathā pi bho Gotama nikkujjitaɱ vā ukkujjeyya,||
paṭicchannaɱ vā vivareyya,||
mūḷhassavā maggaɱ ācikkheyya,||
andhakāre vā telapajjotaɱ dhāreyya,||
cakkhumanto rūpāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Esāhaɱ Bhagavantaɱ Gotamaɱ saraṇaɱ gacchāmi,||
dhammañ ca bhikkhu-saŋghañ ca.|| ||

Upāsakaɱ maɱ bhavaɱ Gotamo dhāretu ajjatagge pāṇupetaɱ saraṇaɱgatan ti.|| ||

 


Contact:
E-mail
Copyright Statement   Webmaster's Page