Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
VI. Brāhmaṇa Vagga

Sutta 56

Paloka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


[159]

[1][pts][bodh] Evaɱ me sutaɱ.|| ||

Evaɱ me sutaɱ ekaɱ samayaɱ Bhagavā Sāvatthiyaɱ viharati.|| ||

Atha kho aññataro brahmaṇo mahāsālo yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Jānussoṇi brāhmaṇo Bhagavantaɱ etad avoca:|| ||

"Sutaɱ me taɱ bho Gotama pubbakānaɱ brāhmaṇānaɱ vuḍḍhānaɱ mahallakānaɱ ācariyapācariyānaɱ bhāsamānānaɱ:|| ||

'Pubb'assudaɱ ayaɱ loko avīci maññe phuṭo ahosi manussehi,||
kukkuṭa-sampātikā gāmanigamarājadhāniyo' ti.|| ||

Ko nu kho bho Gotama hetu,||
ko paccayo yen'etarahi manussānaɱ khayo hoti,||
tanuttaɱ paññāyati,||
gāmā pi agāmā [160] honti,||
nigamā pi anigamā honti,||
nagarā pi anagarā honti,||
janapadā pi ajanapadā honti" ti?|| ||

Etarahi brāhmaṇa manussā adhammarāgarattā visamalobhābhibhūtā micchādhammaparetā.|| ||

Te adhammarāgarattā visamalobhābhibhutā micchādhammaparetā tiṇhāni satthāni gahetvā aññamaññassa jīvitā voropenti.|| ||

Tena bahū manussā kālaɱ karontī ti.|| ||

Ayam pi ko brahmaṇa hetu,||
ayaɱ paccayo yen'etarahi manussānaɱ khayo hoti,||
tanuttaɱ paññāyati,||
gāmā pi agāmā honti,||
nigamā pi anigamā honti,||
nagarā pi anagarā honti,||
janapadā pi ajanapadā honti.|| ||

Puna ca paraɱ brāhmaṇa etarahi manussa adhammarāgarattā visamalobhābhibhutā micchādhammaparetā.|| ||

Tesaɱ adhammarāgarattānaɱ visamalobhābhibhūtānaɱ micchādhammaparetānaɱ devo na sammā dhāraɱ anuppavecchati.|| ||

Tena dubbhikkhaɱ hoti dussassaɱ setaṭṭhikaɱ salākāvuttaɱ.|| ||

Tena bahū manussā kālaɱ karontī ti.|| ||

Ayam pi kho brāhmaṇa hetu,||
ayaɱ paccayo yen'etarahi manussānaɱ khayo hoti,||
tanuttaɱ paññāyati,||
gāmā pi agāmā honti,||
nigamā pi anigamā honti,||
nagarā pi anagarā honti,||
janapadā pi ajanapadā honti.|| ||

Puna ca paraɱ brāhmaṇa etarahi manussa adhammarāgarattā visamalobhābhibhūtā micchādhammaparetā.|| ||

Tesaɱ adhammarāgarattānaɱ visamalobhābhibhūtānaɱ micchādhammaparetānaɱ yakkhā vā'e amanusse ossajanti.|| ||

Tena bahū manussā kālaɱ karontī ti.|| ||

Ayam pi kho brāhmaṇa hetu,||
ayaɱ paccayo yen'etarahi manussānaɱ khayo hoti,||
tanuttaɱ paññāyati,||
gāmā pi agāmā honti,||
nigamā pi anigamā honti,||
nagarā pi anagarā honti,||
janapadā pi ajanapadā honti.|| ||

Abhikkantaɱ bho Gotama,||
seyyathā pi bho Gotama nikkujjitaɱ vā ukkujjiteɱ vā ukkujjeyya,||
paṭicchannaɱ vā vivareyya,||
mūḷhassavā maggaɱ ācikkheyya,||
andhakāre vā telapajjotaɱ dhāreyya,||
cakkhumanto rūpāni dakkhintī ti.|| ||

Evavevaɱ bhotā Gotamena aneka-pariyāyena dhammo pakāsito.|| ||

Ete mayaɱbhante bhavantaɱ Gotamaɱ saraṇaɱ gacchāma,||
dhammañ ca bhikkhu-saŋghañ ca.|| ||

Upāsake no bhavaɱ Gotamo dharetu ajjatagge pāṇupete saraṇaɱgatan ti.|| ||

 


Contact:
E-mail
Copyright Statement   Webmaster's Page