Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
VIII. Ānanda Vagga

Sutta 74

Nigaṇṭha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts]Evaɱ me sutaɱ:|| ||

Ekaɱ samayaɱ āyasmā Ānanda Vesāliyaɱ viharati Mahāvane Kūtāgārasālāyaɱ|| ||

Atha kho Abhayo ca Licchavi Paṇḍitakumārako ca Licchavi yen'āyasmā Ānanda ten'upasaŋkamiɱsu.|| ||

Upasaŋkamitvā āyasmantaɱ Ānandaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinno kho Abhayo Licchavi āyasmantaɱ Ānandaɱ etad avoca:|| ||

"Nigaṇṭho bhante Nāthaputto sabbaññū sabbadassāvi aparisesāɱ ñāṇadassanaɱ paṭijānāti:|| ||

'Carato ca me tiṭṭhato ca suttassa ca jāgarassa ca satataɱ samitaɱ ñāṇadassanaɱ paccupaṭṭhitan' ti.|| ||

So purāṇānaɱ kammānaɱ tapasā vyantībhāvaɱ paññāpeti,||
navānaɱ kammānaɱ akaraṇā setu- [221] ghātaɱ.|| ||

Iti kammakkhayā dukkhakkhayo,||
dukkhakkhayā vedanākkhayo,||
vedanākkhayā sabbaɱ dukkhaɱ nijjiṇṇaɱ bhavissati.|| ||

Evam etissā sandiṭṭhikāya nijjarā visuddhiyā samatikkamo hoti.|| ||

Idha bhante Bhagava kim āhā" ti?|| ||

2. "Tisso kho imā Abhaya,||
nijjarā visuddhiyo tena Bhagavatā jānatā passatā arahatā sammāsambuddhena sammadakkhātā sattānaɱ visuddhiyā sokapariddavānaɱ samatikkamāya dukkhadomanassānaɱ atthaŋgamāya ñāyassa adhigamāya nibbāṇassa sacchikiriyāya.|| ||

Katamā tisso?|| ||

Idha Abhaya, bhikkhū sīlavā hoti||
pātimokkha-saɱvarasaɱvuto viharati||
ācāra-gocara-sampanno aṇumattesu vajjesu bhaya-dassāvī||
samādāya sikkhati sikkhāpadesu.|| ||

So navañ ca kammaɱ na karoti.|| ||

Purāṇañ ca kammaɱ phussa phussa vyantīkaroti.|| ||

Sandiṭṭhikā nijjarā akālikā ehipassikā opanayikā paccattaɱ veditabbā viñññūhī ti.|| ||

Sa kho so Abhaya, bhikkhū evaɱ sīlasampanno vivicc'eva kāmehi vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja viharati.|| ||

Vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.|| ||

Pītiyā ca virāgā upekkhako ca viharati sato ca sampajāno sukhaɱ ca kāyena paṭisaŋvedeti,||
yaɱ taɱ ariyā ācikkhanti.|| ||

'Upekkhako satimā sukhavihāri' ti|| ||

taɱ tatiyaɱ-jhānaɱ upasampajja viharati.|| ||

Sukhassa ca pahāṇā dukkhassa ca pahāṇā pubb'eva somanassa-domanassānaɱ atthaŋgamā adukkaɱ asukhaɱ upekkhā-sati-pārisuddhiɱ catutthaɱ-jhānaɱ upasampajja viharati.|| ||

So navañ ca kammaɱ na karoti.|| ||

Purāṇañ ca kammaɱ phussa phussa vyantī karoti.|| ||

Sandiṭṭhikā nijjarā akālikā ehapassikā opanayikā paccattaɱ veditabbā viññūhī ti.|| ||

So kho so Abhaya bhikkhū evaɱ sīlasampanno evaɱ samādhisampanno āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe va dhamme sayaɱ abhiññā sacchikatvā upasampajja viharati|| ||

So navañ ca kammaɱ na karoti.|| ||

Purāṇañ ca kammaɱ phussa phussa vyāntī karoti|| ||

Sandiṭṭhikā nijjarā akālikā ehipassikā opanayikā paccattaɱ veditabbā vuññūhīti.|| ||

Ime kho Abhaya, tisso nijjarā vusuddhiyo tena Bhagavatā jānatā passatā arahatā sammāsambuddhena sammadakkhātā sattānaɱ vusuddhiyā sokapariddavānaɱ samatikkamāya dukkhadomanassānaɱ atthaŋgamāya ñāyassa adhigamāya nibbāṇassa sacchikiriyāyā" ti.|| ||

3. Evaɱ vutte Paṇḍitakumārako Licchavi Abhayaɱ Licchaviɱ etad avoca:|| ||

"Kiɱ pana tvaɱ samma Abhaya,||
āyasmato Ānandassa subhāsitaɱ subhāsitato nābbhanumodasī" ti?|| ||

"Kyāhaɱ samma āyasmato Ānandassa subhāsitaɱ subhāsi- [222] tato nābbhanumodissāmi.|| ||

Muddhā pi tassa vipateyya,||
yo āyasmato Ānandassa subhāsitaɱ subhāsitato nābbhanumodeyyā" ti.|| ||

 


Contact:
E-mail
Copyright Statement   Webmaster's Page