Aṅguttara-Nikāya
III. Tika Nipāta
VIII. Ānanda Vagga
Sutta 80
Cūḷanikā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ āyasmā Ānanda Vesāliyaṃ viharati||
Mahāvane Kūmāgārasālāyaṃ|| ||
Atha kho āyasmā Ānanda yena Bhagavā ten'upasaṅkami|| ||
Upasaṅkamitvā Bhagavantaṃ abhivādetvā eka-m-antaṃ nisīdi|| ||
Eka-m-antaṃ [227] nisinno kho āyasmā Ānanda Bhagavantaṃ etad avoca:|| ||
"Sammukhā me taṃ bhante Bhagavato sutaṃ,||
sammukhā paṭiggahītaṃ Bhagavato:|| ||
'Ānanda Sikhissa Abhibhu nāma sāvako Brahma-loke ṭhito sahassī-loka-dhātuṃ sarena viññāpesī' ti.| ||
Bhagavā pana bhante arahaṃ Sammā Sambuddho kīvatakaṃ pahoti sarena viññāpetun" ti?|| ||
"Sāvako so Ānanda,||
appameyyā Tathāgatā" ti.|| ||
■
Dutiyam pi kho āyasmā Ānanda Bhagavantaṃ etad avoca:|| ||
"Sammukhā me taṃ bhante Bhagavato sutaṃ,||
sammukhā paṭiggahītaṃ Bhagavato:|| ||
'Ānanda Sikhissa Abhibhu nāma sāvako Brahma-loke ṭhito sahassī-loka-dhātuṃ sarena viññāpesī' ti.| ||
Bhagavā pana bhante arahaṃ Sammā Sambuddho kīvatakaṃ pahoti sarena viññāpetun" ti?|| ||
"Sāvako so Ānanda,||
appameyyā Tathāgatā" ti.|| ||
■
2. Tatiyam pi kho āyasmā Ānanda Bhagavantaṃ etad avoca:|| ||
"Sammukhā me taṃ bhante Bhagavato sutaṃ,||
sammukhā paṭiggahītaṃ Bhagavato:|| ||
'Ānanda Sikhissa Abhibhu nāma sāvako Brahma-loke ṭhito sahassī-loka-dhātuṃ sarena viññāpesī' ti.| ||
Bhagavā pana bhante arahaṃ Sammā Sambuddho kīvatakaṃ pahoti sarena viññāpetun" ti?|| ||
"Sutāṃ te Ānanda sahassī cūlanikā loka-dhātu" ti?|| ||
"Etassa Bhagavā kālo||
etassa Sugata kālo||
yaṃ Bhagavā bhāseyya,||
Bhagavato sutvā bhikkhū dhāressantī" ti.|| ||
"Tena h'Ānanda suṇāhi,||
sādhukaṃ mana-sikaroti,||
bhāsissāmi" ti|| ||
"Evaṃ bho" ti kho tikaṇṇo brāhmaṇo Bhagavato paccassosi|| ||
Bhagavā etad avoca:|| ||
3. "Yāvatā Ānanda candima-suriyā pariharanti,||
disā bhanti virocanā,||
tāva sahassadhā loko.|| ||
Tasmiṃ sahassadhā loke sahassaṃ candānaṃ,||
sahassaṃ suriyānaṃ,||
sahassaṃ sinerupabba-tarājānaṃ,||
sahassaṃ Jambudīpānaṃ,||
sahassaṃ aparagoyānānaṃ,||
sahassaṃ uttaraKurūnaṃ,||
sahassaṃ pubbavidehānaṃ,||
cattāri mahā-samudda-sahassāni,||
cattāri mahārāja-sahassāni,||
sahassaṃ cātu-m-mahārājikānaṃ,||
sahassaṃ Tāvatiṃsānaṃ,||
[228] sahassaṃ Yāmānaṃ,||
sahassaṃ Tusitānaṃ,||
sahassaṃ Nimmāṇaratīnaṃ,||
sahassaṃ Paranimmita-vasavattinaṃ,||
sahassaṃ Brahma-lokānaṃ.|| ||
Ayaṃ vuccat'Ānanda sahassī cūlanikā loka-dhātu.|| ||
■
Yāvat'Ānanda sahassī cūlanikā loka-dhātu,||
tāva sahassadhā loko.|| ||
Ayaṃ vuccat'Ānanda dvi-sahassī majjhimikā loka-dhātu.|| ||
■
Yāvatā Ānanda dvi-sahassī majjhimikā loka-dhātu,||
tāva sahassadhā loko.|| ||
Ayaṃ vuccat'Ānanda ti-sahassī mahāsahassī loka-dhātu.|| ||
Ākaṅkhamāno Ānanda Tathāgato ti-sahassī mahā-sahassī loka-dhātuṃ sarena viññāpeyya,||
yāvatā pana ākaṅkheyyā" ti.|| ||
"Yathā katham pana bhante Bhagavā ti-sahassī mahā-sahassī-loka-dhātuṃ sarena viññāpeyya,||
yāvatā pana ākaṅkheyyā" ti?|| ||
"Idh'Ānanda Tathāgato ti-sahassī-mahā-sahassī-loka-dhātuṃ obhāsena phareyya||
yadā te sattā taṃ ālokaṃ sañjāneyyuṃ,||
atha Tathāgato ghosaṃ kareyya,||
saddam anussāveyya.|| ||
Evaṃ kho Ānanda Tathāgato ti-sahassī-mahā-sahassī-loka-dhātuṃ sarena viññāpeyya,||
yāvatā pana ākaṅkheyyā" ti.|| ||
Evaṃ vutto āyasmā Ānanda Bhagavantaṃ etad avoca:
"Lābhā vata me,||
su-laddhaṃ vata me||
yassa me Satthā evaṃ mahiddhiko evaṃ mah-ā-nubhāvo" ti.|| ||
Evaṃ vutte āyasmā Udāyī āyasmantaṃ Ānandaṃ etad avoca:|| ||
"Kiṃ tumh'ettha āvuso Ānanda yadi te Satthā evaṃ mahiddhiko evaṃ mah-ā-nubhāvo" ti?|| ||
Evaṃ vutte Bhagavā āyasmantaṃ udāyiṃ etad avoca:
"Mā hevaṃ adāyi!|| ||
Mā hevaṃ udāyi!|| ||
Sace udāyi Ānanda avīta-rāgo kālaṃ kareyya,||
tena citta-p-pasādena satta-k-khattuṃ devesu deva-rajjaṃ kareyya,||
satta-k-khattuṃ imasmiṃ yeva Jambudīpe mahārajjaṃ kareyya.|| ||
Api udāyi Ānande diṭṭhe'va dhamme parinibbāyissatī" ti.|| ||
Ānanda Vagga Tatiya
