Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
X. Loṇaphala Vagga

Sutta 93

Parisā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Tisso imā bhikkhave parisā.|| ||

Katamā tisso?|| ||

Aggavatī parisā,||
vaggā parisā,||
samaggā parisā.|| ||

[243] Katamā va bhikkhave aggavatī parisā?|| ||

Idha, bhikkhave, yassaɱ parisāyaɱ therā bhikkhū na bāhulikā honti,||
na sāthalikā,||
vokkamane nikkhittadhurā paviveke pubbaŋgamā,||
viriyaɱ ārabhanti apattassa pattiyā anadhigatassa adhigamāya asacchikatassa sacchikiriyāya.|| ||

Tesaɱ pacchimā janatā diṭṭhānugatiɱ āpajjati,||
sā pi hoti na bāhulikā||
na sāthalikā vokkamane nikkhittadhūrā paviveke pubbaŋagamā,||
viriyaɱ ārabhati appattassa pattiyā atadhigatassa adhigamāya asacchikatassa sacchakiriyāya —|| ||

Ayaɱ vuccatibhikkhave aggavatī parisā.|| ||

2. Katamā ca bhikkhave vaggā parisā?|| ||

Idha, bhikkhave, yassaɱ parisāyaɱ bhikkhū bhaṇḍanajātā kalaha-jātā vivādāpannā aññamaññaɱ mukha-sattīhi vitudantā viharanti —|| ||

Ayaɱ vuccati bhikkhave vaggā parisā.|| ||

3. Katamā ca bhikkhave samaggā parisā?|| ||

Idha, bhikkhave, yassaɱ parisāyaɱ bhikkhū samaggā sammodamānā avivadamānā khīrodakībhūtā aññamaññaɱ piyacakkhūhi sampassantā viharanti —|| ||

Ayaɱ vuccati bhikkhave samaggā parisā.|| ||

4. Yasmiɱ bhikkhave samaye bhikkhū samaggā sammodamānā avivadamānā khīrodakibhūtā aññamaññaɱ piyacakkhūhi sampassantā viharanti bahuɱ bhikkhave bhikkhū tasmiɱ samaye puññaɱ pasavanti,||
brahmaɱ bhikkhave vihāraɱ tasmiɱ samaye bhikkhū viharanti — yad idaɱ muditāya ceto-vimuttiyā,||
pamuditassa piti jāyati,||
pitimanassa kāyo passambhati,||
passaddhakāyo sukhaɱ vediyati,||
sukhino cittaɱ samādhiyati.|| ||

5. Seyyathā pi, bhikkhave, upari pabbate thulla-phusitake deve vassante taɱ udakaɱ yathāninnaɱ pavattamānaɱ pabbata-kandara-padara-sākhā paripūreti,||
pabbata-kandara-padara-sākhā paripūrā kussubbhe paripūrenti,||
kussubbhā paripūrā mahāsobbhe paripūrenti,||
mahāsobbhā paripūrā kunnadiyo paripūrenti,||
kunnadiyo paripūrā mahānadiyo paripūrenti,||
mahānadiyo paripūrā samuddaɱ paripūrenti.|| ||

Evam eva kho bhikkhave yasmiɱ samaye bhikkhū samaggā sammodamānā avivadamānā khīrodakībhūtā aññamaññaɱ piyaca- [244] kkhūhi sampassantā viharanti bahuɱ bhikkhave bhikkhū tasmiɱ samaye puññaɱ pasavanti,||
brahmaɱ bhikkhave vihāraɱ tasmiɱ samaye bhikkū viharanti —|| ||

Yad idaɱ muditāya cetovimuttiyā,||
pamuditassa piti jāyati,||
pītimanassa kāyo passambhati,||
passaddhakāyo sukhaɱ vediyati,||
sukhino cittaɱ samādhiyati.|| ||

Imā kho bhikkhave tisso parisā ti.|| ||

 


Contact:
E-mail
Copyright Statement   Webmaster's Page