Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
XI. Sambodhi Vagga

Sutta 101

Pubbeva Sambodha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Pubbe va me bhikhave sambodhā anabhisambuddhassa bodhisattass'eva sato etad ahosi:|| ||

Ko nu kho loke assādo,||
ko ādinavo,||
kiɱ nissaraṇan ti?|| ||

Tassa mayhaɱ bhikkhave etad ahosi:|| ||

Yaɱ kho loke paṭicca uppajjati sukhaɱ somanassaɱ,||
ayaɱ loke assādo.|| ||

Yaɱ loke anicco dukkho vipariṇāma-dhammo,||
ayaɱ loke ādīnavo.|| ||

Yaɱ loke chandarāgavinayo chandarāgappahānaɱ,||
idaɱ loke nissaraṇan ti.|| ||

2. Yāvakīvañ cāhaɱ bikkhave evaɱ lokassa assādañ ca [259] assādato ādīnavañ ca ādīnavato nissaraṇañ ca nissaraṇato yathābhūtaɱ nā abbhaññāsiɱ,||
n'eva tāvāhaɱ bhikkhave sadevake loke samarake sabrahmake sassamaṇa-brāhmaṇiyā pajāya sadeva-manussāya anuttaraɱ sammāsambodhiɱ abhisambuddo paccaññāsiɱ.|| ||

Yato ca kho ahaɱ bhikkhave evaɱ lokassa assādañ ca assādato ādīnavañ ca ādīnavato nissaraṇañ ca nissaraṇato yathābhūtaɱ abbhaññāsiɱ,||
athāhaɱ bhikkhave sadevake loke samārake sabrahmake sassamaṇa-brāhmaṇiyā pajāya sadeva-manussāya anuttaraɱ sammāsambodhiɱ abhisambuddho paccaññāsiɱ.|| ||

Ñāṇañ ca pana me dassanaɱ udapādi:|| ||

Akuppā me cetevimutti.|| ||

Ayam antimā jāti.|| ||

N'atthi dāni punabbhavo ti.|| ||

3. Lokassāhaɱ bhikkhave assādapariyesanaɱ avariɱ.|| ||

Yo loke assādo,||
tad ajjhagamaɱ.|| ||

Yāvatako loke assādo,||
paññāya me so sudiṭṭho.|| ||

Lokassāhaɱ bhikkhave ādīnavapariyesanaɱ acariɱ.|| ||

Yo loke ādīnavo,||
tadajjhagamaɱ.|| ||

Yāvatako loke ādīnavo,||
paññāya me eso sudiṭṭho.|| ||

Lokassāhaɱ bhikkhave nissaraṇapariyesanaɱ acariɱ.|| ||

Yaɱ loke nissaraṇaɱ,||
tadajjhagamaɱ.|| ||

Yāvatakaɱ loke nissaraṇaɱ,||
paññāya me etaɱ sudiṭṭhaɱ.|| ||

4. Yāvakīvañ cāhaɱ bikkhave evaɱ lokassa assādañ ca assādato ādīnavañ ca ādīnavato nissaraṇañ ca nissaraṇato yathābhūtaɱ nā abbhaññāsiɱ,||
n'eva tāvāhaɱ bhikkhave sadevake loke samarake sabrahmake sassamaṇa-brāhmaṇiyā pajāya sadeva-manussāya anuttaraɱ sammāsambodhiɱ abhisambuddo paccaññāsiɱ.|| ||

Yato ca kho ahaɱ bhikkhave evaɱ lokassa assādañ ca assādato ādīnavañ ca ādīnavato nissaraṇañ ca nissaraṇato yathābhūtaɱ abbhaññāsiɱ,||
athāhaɱ bhikkhave sadevake loke samārake sabrahmake sassamaṇa-brāhmaṇiyā pajāya sadeva-manussāya anuttaraɱ sammāsambodhiɱ abhisambuddho paccaññāsiɱ.|| ||

Ñāṇañ ca pana me dassanaɱ udapādi:|| ||

Akuppā me cetevimutti.|| ||

Ayam antimā jāti.|| ||

N'atthi dāni punabbhavo ti.|| ||

 


Contact:
E-mail
Copyright Statement   Webmaster's Page