Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
XII. Āpāyika Vagga

Sutta 114

Āneñja Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][bd] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Tayo'me bhikkave puggalā santo saɱvijjamānā lokasmiɱ.|| ||

Katame tayo?|| ||

Idha, bhikkhave, ekacco puggalo sabbaso rūpa-saññānaɱ samatikkamā paṭigha-saññānaɱ atthaŋgamā, nānātta-saññānaɱ amanasi-kārā 'ananto ākāso' ti ākāsānañcāyatanaɱ upasampajja viharati.|| ||

So tad assādeti tan nikāmeti,||
tena ca vittiɱ āpajjati.|| ||

Tatra ṭhito tad adhimutto tabbahulavihārī aparihino kālaɱ kurumāno ākāsānañcāyatanūpagānaɱ devānaɱ sahavyataɱ upapajjati.|| ||

Ākāsānañcāyatanūpagānaɱ bhikkhave devānaɱ vīsatiɱ kappasahassāni āyuppamāṇaɱ.|| ||

Tatra puthujjano yāvatāyukaɱ ṭhatvā yāvatakaɱ tesaɱ devānaɱ āyuppamānaɱ,||
taɱ sabbaɱ khepetvā nirayam pi gacchati,||
tiracchānayonim pi gacchati,||
pettivisayam pi gacchati.|| ||

Bhagavato pana sāvako tattha yāvatāyukaɱ ṭhatvā yāvatakaɱ tesaɱ devānaɱ āyuppamānaɱ,||
taɱ sabbaɱ khepetvā tasmiɱ yeva bhave parinibbāyati.|| ||

Ayaɱ ko bhikkhave viseso,||
ayaɱ adhippāyoso,||
idaɱ nānākaranaɱ sutavato ariyasāvakassa assutavatā puthujjanena yad idaɱ gatiyā upapattiyā sati.|| ||

[2][pts][bd] Puna ca paraɱ bhikkhave idh'ekacco puggalo sabbaso ākāsānañcāyatanaɱ samatikkamma 'Anantaɱ viññāṇan' ti viññāṇañcāyatanaɱ upasampajja viharati.|| ||

So tad assādeti tan nikāmeti,||
tena ca vittiɱ āpajjati.|| ||

Tatra ṭhito tad adhimutto tabbahulavihārī aparihino kālaɱ kurumāno viññāṇañcāyatanūpagānaɱ devānaɱ sahavyataɱ upapajjati.|| ||

Viññāṇañcāyatanūpagānaɱ bhikkhave devānaɱ cattārīsaɱ kappasahassāni āyuppamāṇaɱ.|| ||

Tattha puthujjano yāvatāyukaɱ ṭhatvā yāvatakaɱ tesaɱ devānaɱ āyuppamānaɱ,||
taɱ sabbaɱ khepetvā nirayam pi gacchati,||
tiracchānayonim pi gacchati,||
pettivisayam pi gacchati.|| ||

Bhagavato pana sāvako tattha yāvatāyukaɱ ṭhatvā yāvatakaɱ tesaɱ devānaɱ āyuppamānaɱ,||
taɱ sabbaɱ khepetvā tasmiɱ yeva bhave parinibbāyati.|| ||

Ayaɱ kho bhikkhave viseso,||
ayaɱ adhippāyo,||
idaɱ nānākaraṇaɱ [268] sutavato ariyasāvakassa assutavatā puthujjanena yad idaɱ gatiyā upapattiyā sati.|| ||

[3][pts][bd] Puna ca paraɱ bhikkhave idh'ekacco puggalo sabbaso viññāṇañcāyatanaɱ samatikkamma 'N'atthi kiñci' ti ākiñcaññāyatanaɱ upasampajja viharati.|| ||

So tad assādeti tan nikāmeti,||
tena ca vittiɱ āpajjati.|| ||

Tatra ṭhito tad adhimutto tabbahulavihārī aparihino kālaɱ kurumāno ākiñcaññāyatanūpagānaɱ devānaɱ sahavyataɱ upapajjati.|| ||

Ākiñcaññāyatanūpagānaɱ bhikkhave devānaɱ saṭṭhiɱ kappasahassāni āyuppamāṇaɱ.|| ||

Tattha puthujjano yāvatāyukaɱ ṭhatvā yāvatakaɱ tesaɱ devānaɱ āyuppamānaɱ,||
taɱ sabbaɱ khepetvā nirayam pi gacchati,||
tiracchānayonim pi gacchati,||
pettivisayam pi gacchati.|| ||

Bhagavato pana sāvako tattha yāvatāyukaɱ ṭhatvā yāvatakaɱ tesaɱ devānaɱ āyuppamānaɱ,||
taɱ sabbaɱ khepetvā tasmiɱ yeva bhave parinibbāyati.|| ||

Ayaɱ ko bhikkhave viseso,||
ayaɱ adhippāyoso,||
idaɱ nānākaranaɱ sutavato ariyasāvakassa assutavatā puthujjanena yad idaɱ gatiyā upapattiyā sati.|| ||

Ime ko bikkhave tayo puggalā santo saɱvijjamānā lokasmin ti.|| ||

 


Contact:
E-mail
Copyright Statement   Webmaster's Page