Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
XIV. Yodhājīva Vagga

Sutta 135

Kesakambalo Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][olds] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Seyyathā pi, bhikkhave, yāni kānici tantāvutānaɱ vatthānaɱ kesakambhalo tesaɱ paṭikiṭṭho akkhāyati.||
Kesakambalo bhikkhave||
sīte sīto||
uṇhe uṇho,||
dubbaṇṇo||
duggandho||
dukkhasampasso||
evam eva kho, bhikkhave, yāni kānici puthu-samaṇappavādānaɱ Makkhalivādo tesaɱ paṭikiṭṭho akkhāyati.||
Makkhalī bhikkhave moghapuriso evaɱvādi evaɱ-diṭṭhi:||
"n'atthi kammaɱ,||
n'atthi kiriyaɱ,||
n'atthi viriyan" ti.|| ||

[287] [2][pts][olds] Ye pi te bhikkhave ahesuɱ atītam addhānaɱ arahanto Sammā-sambuddhā,||
te pi Bhagavanto kammavādā c'eva ahesuɱ kiriyavādā ca viriyavādā ca.|| ||

Te pi bhikkhave Makkhalī moghapuriso paṭibāhati:||
"n'atthi kammaɱ,||
n'atthi kiriyaɱ,||
n'atthi viriyan" ti.|| ||

[3][pts][olds] Ye pi te bhikkhave bhavissanti anāgataɱ addhānaɱ arahanto Sammā-sambuddhā,||
te pi Bhagavanto kammāvādā c'eva bhavissanti kiriyavādā ca viriyavādā ca.|| ||

Te pi bhikkhave Makkhalī moghapuriso paṭibāhati:||
"n'atthi kammaɱ,||
n'atthi kiriyaɱ,||
n'atthi viriyan" ti.|| ||

[4][pts][olds] Aham pi bhikkhave etarahi arahaɱ Sammā-sambuddho kammavādo ca kiriyavādo ca viriyavādo.|| ||

Mam pi bhikkhave Makkhalī moghapuriso paṭibāhati:||
"n'atthi kammaɱ,||
n'atthi kiriyaɱ,||
n'atthi viriyan" ti.|| ||

[5][pts][olds] Seyyathā pi, bhikkhave, nadī-mukhe khipaɱ uḍḍeyya bahunnaɱ macchānaɱ ahitāya dukkhāya anayāya vyāsanāya,||
evam eva kho, bhikkhave, Makkhalī moghapuriso manussakhipaɱ maññe loke uppanno bahunnaɱ sattānaɱ ahitāya dukkhāya anayāya vyasanāyāti.|| ||

 


Contact:
E-mail
Copyright Statement   Webmaster's Page