Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
XVI. Acelaka Vagga

Sutta 151

Paṭhavi Paṭipadā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Tisso imā bhikkhave paṭipadā.|| ||

Katamā tisso?|| ||

Āgāḷhā paṭipadā,||
nijjhāmā paṭipadā,||
majjhimā paṭipadā.|| ||

2. Katamā ca bhikkhave āgāḷhā paṭipadā?|| ||

Idha, bhikkhave, ekacco evaɱvādi hoti evaɱ-diṭṭhi:|| ||

"N'attha kāmesu doso" ti.|| ||

So kāmesu pātavyataɱ āpajjati.|| ||

Ayaɱ vuccati bhikkhave āgāḷhā paṭipadā.|| ||

3. Katamā ca bhikkhave nijjhāmā paṭipadā?|| ||

Idha, bhikkhave, ekacco acelako hoti muttācāro hatthāpalekhano||
na ehibhadantiko,||
na tiṭṭhabhadantiko,||
na abhibhaṭaɱ,||
na uddissakaṭaɱ,||
na nimantaṇaɱ sādiyati.|| ||

So na kumhimukhā patigaṇhāti,||
na khaḷopi-mukhā patigaṇhāti,||
na eḷalakamantaraɱ,||
na daṇḍamantaraɱ,||
na musalamantaraɱ,||
na dvinnaɱ bhuñjamānānaɱ,||
na gabhiniyā,||
na pāyamānāya,||
na purisantaragatāya,||
na saɱkittīsu,||
na yattha sā upaṭṭhito hoti,||
na yattha makkhikā saṇḍacārinī,||
na macchaɱ,||
na maɱsaɱ,||
na suraɱ,||
na merayaɱ,||
na thusodakaɱ pivati.|| ||

So ekāgāriko vā hoti||
ekālopiko vā,||
dvāgāriko va hoti,||
dvālopiko vā,||
... pe ...,||
sattāgāriko va hoti||
sattālopiko vā.|| ||

Ekissā pi dattiyā yāpeti,||
dvihi pi dattīhi yāpeti,||
... pe ...,||
sattahi pi dattihi yāpeti.|| ||

Ekāhikam pi āhāraɱ ārāreti,||
dvāhikam pi āhāraɱ āhāreti,||
... pe ...,||
sattāhikam pi āhāraɱ āhāreti.|| ||

Iti evarūpaɱ addhamāsikam pi pariyāya-bhatta-bojanānuyogam anuyutto viharati.|| ||

So sāka-bhakkho pi hoti,||
sāmāka-bhakkho pi hoti,||
nīvāra-bhakkho pi hoti,||
daddula-bhakkho pi hoti,||
haṭa-bhakkho pi hoti,||
kaṇa-bhakkho pi hota,||
ācāma-bhakkho pi hoti,||
piññāka-bhakkho pi hoti,||
tiṇa-bhakkho pi hoti,||
gomaya-bhakkho pi hoti.|| ||

Vanamūlaphalāhāro yāpeti pavattaphalahoji.|| ||

So sāṇāni pi dhāreti,||
masāṇāni pi dhareti,||
chavadussāni pi dhāreti,||
paɱsukūlāni pi dhāreti,||
tīrīṭāni pi dhareti,||
ajināni pi dhāreti,||
ajinakkhipam pi dhāreti,||
kusacīram pi dhāreti,||
vākavīram pi dhāreti,||
phalakavīram pi dhāreti,||
kesakambalam pi dhāreti,||
[296] vālakambalam pi dhāreti,||
ulūkapakkham pi dhāreti.|| ||

Kesamassulocako pi hoti||
kesamassulocanānuyogam anuyutto.|| ||

Ubbhaṭṭhako pi hoti||
āsanapaṭikkitto.|| ||

Ukkuṭiko pi hoti||
ukkuṭikappadhānām anuyutto.|| ||

Kaṇṭakāpassayiko pi hoti||
kaṇṭakāpassaye seyyaɱ kappeti.|| ||

Sāyaɱ tatiyakam pi udakorohaṇānuyogam anuyutto viharati.|| ||

Iti evarūpaɱ aneka-vihitaɱ kāyassa ātāpanaparitāpanānuyogam anuyutto viharati.|| ||

Ayaɱ vuccati bhikkhave nijjhāmā paṭipadā.|| ||

4. Katamā ca bhikkhave majjhimā paṭipadā?|| ||

Idha, bhikkhave, bhikku kāye kāyānupassī viharati,||
ātāpi sampajāno satimā vineyya loke abhijjhādomanassaɱ,||
vedanāsu vedanānu passī viharati,||
ātāpi sampajāno satimā vineyya loke abhijjhādomanassaɱ,||
citte cittānupassī viharati,||
ātāpi sampajāno satimā vineyya loke abhijjhādomanassaɱ,||
dhammesu dhammānupassī viharati,||
ātāpī sampajāno satimā vineyya loke abhijjhādomanassaɱ.|| ||

Ayaɱ vuccati bhikkhave majjhimā paṭipadā.|| ||

Imā kho bhikkhave tisso paṭipadā ti.|| ||

 


Contact:
E-mail
Copyright Statement   Webmaster's Page