Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
IV. Catukka Nipāta
I. Bhaṇḍagāma Vagga

Sutta 10

Yoga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


[10]

[1][pts][than][olds][bodh] Evaɱ me sutaɱ.|| ||

Ekaɱ samayaɱ Bhagavā Vajjīsu viharati Bhaṇḍagāme.|| ||

Tratr kho Bhagavā bhikkhū āmantesti:|| ||

Bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

Cattāro'me bhikkhave yogā.|| ||

Katame cattāro?|| ||

Kāma-yogo,||
bhava-yogo,||
diṭṭhi-yogo,||
avijjā-yogo.|| ||

Katamo ca bhikkhave kāma-yogo?|| ||

Idha, bhikkhave, ekacco kāmānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ nappajānāti.|| ||

Tassa kāmānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ appajānato yo kāmesu kāmarāgo kāmanandi kāmasineho kāmamucchā kāmapipāsā kāmapariḷāho kāmajjhosānaɱ kāmataṇhā sānuseti.|| ||

Ayaɱ vuccati bhikkhave kāma-yogo.|| ||

Iti kāma-yogo.|| ||

Bhava-yogo ca kathaɱ hoti?|| ||

Idha, bhikkhave, ekacco bhavānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ nappajānāti.|| ||

Tassa bhavānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ appajānato yo bhavesu bhavarāgo bhavanandi bhavasineho bhavamucchā bhavapipāsā bhavapariḷāho bhavajjhosānaɱ bhavataṇhā sānuseti.|| ||

Ayaɱ vuccati bhikkhave bhavayogo.|| ||

Iti kāma-yogo, bhava-yogo.|| ||

Diṭṭhi-yogo ca kathaɱ hoti?|| ||

Idha, bhikkhave, ekacco diṭṭhīnaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ nappajānāti.|| ||

Tassa diṭṭhīnaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ appajānato [11] yo diṭṭhisu diṭṭhirāgo diṭṭhinandi diṭṭhisineho diṭṭhimucchā diṭṭhipipāsā diṭṭhipariḷāho diṭṭhiajjhosānaɱ diṭṭhitaṇhā sānuseti.|| ||

Ayaɱ vuccati bhikkhave diṭṭhi-yogo.|| ||

Iti kāma-yogo, bhava-yogo, diṭṭhi-yogo.|| ||

Avijjā-yogo ca kathaɱ hoti?|| ||

Idha, bhikkhave, ekacco channaɱ phassāyatanānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ nappajānāti.|| ||

Tassa channaɱ phassāyatanānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ appajānato yā chasu phassāyatanesu avijjā aññāṇaɱ sānuseti.|| ||

Ayaɱ vuccati bhikkhave avijjā-yogo.|| ||

Iti kāma-yogo, bhava-yogo, diṭṭhi-yogo, avijjā-yogo.|| ||

Saɱyutto pāpakehi akusalehi dhammehi saɱkilesehi ponobhavikehi sadarehi dukkhavipākehi āyatiɱ jātijarā-maraṇikehi,||
tasmā ayogakkhemī ti vuccati.|| ||

Ime kho bhikkhave cattāro yogā.|| ||

 


 

2. Cattāro'me bhikkhave visaɱyogā.|| ||

Katame cattāro?|| ||

Kāmayoga-visaɱyogo,||
bhavayoga-visaɱyogo,||
diṭṭhiyoga-visaɱyogo,||
avijjāyoga-visaɱyogo.|| ||

Katamo ca bhikkhave kāmayoga-visaɱyogo?|| ||

Idha, bhikkhave, ekacco kāmānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ pajānāti.|| ||

Tassa kāmānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ pajānato yo kāmesu kāmarāgo kāmanandi kāmasineho kāmamucchā kāmapipāsā kāmapariḷāho kāmajjhosānaɱ kāmataṇhā sā nānuseti.|| ||

Ayaɱ vuccati bhikkhave kāmayoga-visaɱyogo.|| ||

Iti kāmayoga-visaɱyogo.|| ||

Bhavayoga-visaɱyogo ca kathaɱ hoti?|| ||

Idha, bhikkhave, ekacco bhavānaɱ samudayañ ca atthagamañ ca assādañ ca ādinavañ ca nissaraṇañ ca yathābhūtaɱ pajānāti.|| ||

Tassa bhavānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ pajānato yo bhavesu bhavarāgo bhavanandi bhavasineho bhavamucchā bhavapipāsā bhavapariḷāho bhavajjhosānaɱ bhavataṇhā sā nānuseti.|| ||

Ayaɱ vuccati bhikkhave bhavayoga-visaɱyogo.|| ||

Iti kāmayoga-visaɱyogo, bhavayoga-visaɱyogo.|| ||

Diṭṭhiyoga-visaɱyogo ca kathaɱ hoti?|| ||

Idha, bhikkhave, ekacco diṭṭhīnaɱ samudayañ ca atthagamañ ca assādañ ca ādīnavañ ca [12] nissaraṇañ ca yathābhūtaɱ pajānāti.|| ||

Tassa diṭṭhīnaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ pajānano yo diṭṭhīsu diṭṭhirāgo diṭṭhinandi diṭṭhimucchā diṭṭhipipāsā diṭṭhipariḷāho diṭṭhiajjhosānaɱ diṭṭhitaṇhā sā nānuseti.|| ||

Ayaɱ vuccati bhikkhave diṭṭhiyoga-visaɱyogo.|| ||

Iti kāmayoga-visaɱyogo, bhavayoga-visaɱyogo, diṭṭhiyoga-visaɱyogo.|| ||

Avijjāyoga-visaɱyogo ca kathaɱ hoti?|| ||

Idha, bhikkhave, ekacco channaɱ phassāyatanānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ pajānāti.|| ||

Tassa channaɱ phassāyatanānaɱ samudayañ ca atthagamañ ca assādañ ca ādīnavañ ca nissaraṇañ ca yathābhūtaɱ pajānato yā chasu phassāyatanesu avijjā aññāṇaɱ sā nānuseti.|| ||

Ayaɱ vuccati bhikkhave avijjāyoga-visaɱyogo.|| ||

Iti kāmayoga-visaɱyogo, bhavayoga-visaɱyogo, diṭṭhiyoga-visaɱyogo, avijjāyoga-visaɱyogo.|| ||

Visaɱyutto pāpakehi akusalehi dhammehi saɱkilesikehi ponobhavikehi sadarehi dukkha-vipākehi āyatiɱ jātijarāmaraṇikehi tasmā yogakkhemī ti vuccati.|| ||

Ime kho bhikkhave cattāro visaɱyogā ti.|| ||

Kāmayogena saɱyuttā bhavayogena cūbhayaɱ,||
Diṭṭhiyogena saɱyuttā avijjāya purakkhatā,||
Sattā gacchanti saɱsāraɱ jātimaraṇagāmino.||
Ye ca kāme pariññāya bhavayogañ ca sabbaso,||
Diṭṭhiyogaɱ samuhacca avijjañ ca virājayaɱ,||
Sabbayoga-visaɱyuttā te ve yogātigāmuno ti.|| ||

Bhaṇḍagāmavaggo paṭhamo.

 


Contact:
E-mail
Copyright Statement   Webmaster's Page