Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāyo
IV. Catukka Nipāto
II. Cara Vagga

Sutta 12

Sīla Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


[14]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Sampannasīlā bhikkhave viharatha||
sampanna-pātimokkhā||
pātimokkha-saɱvara-saɱvutā viharatha||
ācāra-gocara-sampannā,||
anumattesu vajjesu bhaya-dassāvino,||
samādāya sikkhatha sikkhāpadesu.|| ||

Sampanna-sīlānāɱ bhikkhave viharataɱ||
sampanna-pātimokkhānaɱ||
pātimokkha-saɱvara-saɱvutānaɱ viharataɱ||
ācāra-gocara-sampannānaɱ||
anumattesu vajjesu bhaya-dassāvīnaɱ||
samādāya sikkhataɱ sikkhāpadesu,||
kim assa uttariɱ karaṇīyaɱ?|| ||

Carato ce pi bhikkhave bhikkhuno abhijjhā-vyāpādo vigato hoti,||
thīnamiddhaɱ uddhaccakukkuccaɱ vicikicchā pahīṇā hoti,||
āraddhaɱ hoti viriyaɱ asallīnaɱ,||
upaṭṭhitā sati apammuṭṭhā,||
passaddho kāyo asāraddho,||
samāhitaɱ cittaɱ ekaggaɱ —||
caram pi bhikkhave bhikkhu:|| ||

'Evambhūto ātāpī ottāpī satataɱ samitaɱ āraddhaviriyo pahitatto' ti vuccati.|| ||

Ṭhitassa ce pi bhikkhave bhikkhuno abhijjhā-vyāpādo vigato hoti,||
thīnamiddhaɱ uddhaccakukkuccaɱ vicikicchā pahīṇā hoti,||
āraddhaɱ hoti viriyaɱ asallīnaɱ,||
upaṭṭhitā sati apammuṭṭhā,||
passaddho kāyo asāraddho,||
samāhitaɱ cittaɱ ekaggaɱ —||
ṭhito pi bhikkhave bhikkhu:|| ||

'Evambhūto ātāpī ottāpī satataɱ samitaɱ āraddhaviriyo pahitatto' ti vuccati.|| ||

Nisinnassa ce pi bhikkhave bhikkhuno abhijjhā-vyāpādo vigato hoti,||
thīnamiddhaɱ uddhaccakukkuccaɱ vicikicchā pahīṇā hoti,||
āraddhaɱ hoti viriyaɱ asallīnaɱ,||
upaṭṭhitā sati apammuṭṭhā,||
passaddho kāyo asāraddho,||
samāhitaɱ cittaɱ ekaggaɱ —||
nisinno pi bhikkhave bhikkhu —||
ṭhito pi bhikkhave bhikkhu:|| ||

'Evambhūto ātāpī ottāpī satataɱ samitaɱ āraddhaviriyo [15] pahitatto' ti vuccati.|| ||

Sayānassa ce pi bhikkhave bhikkhuno abhijjhā-vyāpādo vigato hoti,||
thīnamiddhaɱ uddhaccakukkuccaɱ vicikicchā pahīṇā hoti,||
āraddhaɱ hoti viriyaɱ asallīnaɱ,||
upaṭṭhitā sati apammuṭṭhā,||
passaddho kāyo asāraddho,||
samāhitaɱ cittaɱ ekaggaɱ —||
nisinno pi bhikkhave bhikkhu —||
sayāno pi bhikkhave bhikkhu:|| ||

'Evambhūto ātāpī ottāpī satataɱ samitaɱ āraddhaviriyo pahitatto' ti vuccati.|| ||

 

Yataɱ care yataɱ tiṭṭhe yataɱ acche yataɱ saye,||
Yataɱ sammiñjaye bhikkhu yatam enaɱ pasāraye.||
Uddhaɱ tiriyaɱ apācīnaɱ yāvatā jagato gati,||
Samavekkhitā ca dhammānaɱ khandhānaɱ udayavyayaɱ.||
Ceto samathasāmīciɱ sikkhamānaɱ sadā sataɱ,||
Satataɱ pahitatto ti āhu bhikkhuɱ tathāvidhan" ti.|| ||

 


Contact:
E-mail
Copyright Statement   Webmaster's Page