Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāyo
IV. Catukka Nipāto
II. Cara Vagga

Sutta 14

Saɱvarappadhāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


[16]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattār'imāni bhikkhave padhānāni.|| ||

Katamāni cattāri?|| ||

Saɱvarappadhānaɱ,||
pahāṇappadhānaɱ,||
bhāvanāppadhānaɱ,||
anurakkhaṇappadhānaɱ.|| ||

Katamañ ca bhikkhave saɱvarappadhānaɱ?|| ||

Idha, bhikkhave, bhikkhu cakkhunā rūpaɱ disvā na nimittaggāhī hoti nānuvyañjanaggāhī,||
yatvādhikaraṇame taɱ cakkhundriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhundriyaɱ,||
cakkhundriye saɱvaraɱ āpajjati.|| ||

Sotena saddaɱ sutvā na nimittaggāhī hoti nānuvyañjanaggāhī,||
yatvādhikaraṇame taɱ sotindriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati sotindriyaɱ,||
sotindriye saɱvaraɱ āpajjati.|| ||

Ghāṇena gandhaɱ ghāyitvā na nimittaggāhī hoti nānuvyañjanaggāhī,||
yatvādhikaraṇame taɱ ghāṇindriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati ghāṇindriyaɱ,||
ghāṇindriye saɱvaraɱ āpajjati.|| ||

Jivhāya rasaɱ sāyitvā na nimittaggāhī hoti nānuvyañjanaggāhī,||
yatvādhikaraṇame taɱ jivhindriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati jivhindriyaɱ,||
jivhindriye saɱvaraɱ āpajjati.|| ||

Kāyena phoṭṭhabbaɱ phusitvā na nimittaggāhī hoti nānuvyañjanaggāhī,||
yatvādhikaraṇame taɱ kāyindriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati kāyindriyaɱ,||
kāyindriye saɱvaraɱ āpajjati.|| ||

Manasā dhammaɱ viññāya na nimittaggāhī hoti nānuvyañjanaggāhī,||
yatvādhikaraṇame taɱ manindriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati manindriyaɱ,||
manindriye saɱvaraɱ āpajjati.|| ||

Idaɱ vuccati bhikkhave saɱvarappadhānaɱ.|| ||

Katamañ ca bhikkhave pahāṇappadhānaɱ?|| ||

Idha, bhikkhave, bhikkhu uppannaɱ kāmavitakkaɱ nādhivāseti,||
pajahati,||
vinodeti,||
vyantīkaroti,||
anabhāvaɱ gameti.|| ||

Uppannaɱ vyāpādavitakkaɱ nādhivāseti,||
pajahati,||
vinodeti,||
vyantīkaroti,||
anabhāvaɱ gameti.|| ||

Uppannaɱ vihiɱsāvitakkaɱ nādhivāseti,||
pajahati,||
vinodeti,||
vyantīkaroti,||
anabhāvaɱ gameti.|| ||

Uppannuppanne pāpake akusale dhamme nādhivāseti,||
pajahati,||
vinodeti,||
byantīkaroti anabhāvaɱ gameti.|| ||

Idaɱ vuccati bhikkhave pahāṇappadhānaɱ:|| ||

Katamañ ca bhikkhave bhāvanāppadhānaɱ?|| ||

Idha, bhikkhave, bhikkhu satisambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Dhammavicayasambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Viriyasambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Pītisambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Passaddhisambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Samādhisambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Upekkhāsambojjhaŋgaɱ bhāveti vivekanissitaɱ virāganissitaɱ nirodhanissitaɱ vossaggapariṇāmiɱ.|| ||

Idaɱ vuccati bhikkhave bhāvanāppadhānaɱ.|| ||

[17] Katamañ ca bhikkhave anurakkhaṇappadhānaɱ?|| ||

Idha, bhikkhave, bhikkhu uppannaɱ bhaddakaɱ samādhinimittaɱ anurakkhati aṭṭhikasaññaɱ pulavakasaññaɱ vinīlakasaññaɱ vipubbakasaññaɱ vicchiddakasaññaɱ udadhumātakasaññaɱ.|| ||

Idaɱ vuccati bhikkhave anurakkhaṇappadhānaɱ.|| ||

Imāni kho bhikkhave cattāri padhānānīni.|| ||

 

Saɱvaro ca pahāṇañca bhāvanā anurakkhaṇā,||
Ete padhānā cattāro desitādiccabandhunā,||
Ye hi bhikkhu idhātāpī khayaɱ dukkhassa pāpuṇe ti.|| ||

 


Contact:
E-mail
Copyright Statement   Webmaster's Page