Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
4. Catukka Nipāta
III. Uruvelā Vagga

Sutta 23

Loka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


[23]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Loko bhikkhave Tathāgatena abhisambuddho.|| ||

Lokasmā Tathāgato visaɱyutto.|| ||

Lokasamudayo bhikkhave Tathāgatena abhisambuddho.|| ||

Lokasamudayo Tathāgatassa pahīṇo.|| ||

Lokanirodho bhikkhave Tathāgatena abhisambuddho.|| ||

Lokanirodho Tathāgatassa saccachikato.|| ||

Lokanirodhagāminīpaṭipadā bhikkhave Tathāgatena abhisambuddhā.|| ||

Lokanirodhagāminīpaṭipadā Tathāgatassa bhāvitā.|| ||

2. Yaɱ bhikkhave sadevakassa lokassa samārakassa sabrahmakassa sassamaṇabrāhmaṇiyā pajāya sadeva-manussāya diṭṭhaɱ sutaɱ mutaɱ viññātaɱ pattaɱ pariye- [24] sitaɱ anuvicaritaɱ manasā,||
sabbaɱ taɱ Tathāgatena abhisambuddhaɱ.|| ||

Tasmā Tathāgato ti vuccati.|| ||

Yañ ca bhikkhave rattiɱ Tathāgato abhisambujjhati,||
yañ ca rattiɱ parinibkhāyati,||
yaɱ etasmiɱ antare bhāsati lapati niddisati,||
sabbaɱ taɱ tath'eva hoti||
no aññathā.|| ||

Tasmā Tathāgato ti vuccati.|| ||

3. Yathāvādī bhikkhave Tathāgato tathākārī,||
yathākārī tathāvādī,||
iti yathāvādī tathākārī||
yathākārī tathāvādī.|| ||

Tasmā Tathāgato ti vuccati.|| ||

Sadevake bhikkhave loke samārake sabrahmake sassamaṇabrāhmaṇiyā pajāya sadeva-manussāya Tathāgato abhibhū anabhibhūto,||
aññadatthudaso vasavattī.|| ||

Tasmā Tathāgato ti vuccati.|| ||

 

Sabbaɱ lokaɱ abhiññāya sabbaloke yathā tathaɱ,||
Sabbaloka-visaɱyutto sabbaloke anūpayo.|| ||

Sa ve sabbābhibhū dhīro sabbagantha-pamocano,||
Phuṭṭhassa paramā santi nibbānaɱ akutobhayaɱ.|| ||

"Esa khīṇāsavo Buddho anīgho chinnasaɱsayo,||
Sabbakammakkhayaɱ patto vimutto upadhisaŋkhaye.|| ||

Esa so Bhagavā Buddho esa sīho anuttaro,||
Sadevakassa lokassa brahmacakkaɱ pavattayī."|| ||

Iti deva-manussā ca ye Buddhaɱ saraṇaɱ gatā,||
Saŋgamma taɱ namassanti mahantaɱ vītasāradaɱ.|| ||

"Danto damayataɱ seṭṭho santo samayataɱ isī,||
Mutto mocayataɱ aggo tiṇṇo tārayataɱ varo"|| ||

Iti h'etaɱ namassanti mahantaɱ vītasāradaɱ,||
Sadevakasmiɱ lokasmiɱ n'atthi te paṭipuggalo ti.|| ||

 


Contact:
E-mail
Copyright Statement   Webmaster's Page