Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
4. Catukka Nipāta
III. Uruvelā Vagga

Sutta 30

Paribbājaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


[29]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Rājagahe viharati Gijjhakūṭe pabbate.|| ||

Tena kho pana samayena sambahulā abhiññātā abhiññātā paribbājakā Sappiniyā tīre paribbājakārāme paṭivasanti.|| ||

Seyyathīdaɱ:||
Annabhāro||
Varadharo||
Sakuludāyī||
ca paribbājako aññe ca abhiññātā paribbājakā.|| ||

Atha kho Bhagavā sāyaṇhasamayaɱ patisallānā vuṭṭhito yena Sappiniyā tīraɱ paribbājakārāmo ten'upasaŋkami.|| ||

Upasaŋkamitvā paññatte āsane nisīdi.|| ||

Nisajja kho Bhagavā te paribbājake etad avoca:|| ||

2. "Cattār'imāni paribbājakā dhammapadāni aggaññāni,||
[30] rattaññāni,||
vaɱsaññāni,||
porāṇāni,||
asaŋkiṇṇāni,||
asaŋkiṇṇapubbāni,||
na saŋkīyanti,||
na saŋkīyissanti,||
appatikuṭṭhāni samaṇehi brāhmaṇehi viññūhi|| ||

Katamāni cattāri?|| ||

Anabhijjhā paribbājakā dhammapadaɱ aggaññaɱ,||
rattaññaɱ,||
vaɱsaññaɱ,||
porāṇaɱ,||
asaŋkiṇṇaɱ,||
asaŋkiṇṇapubbaɱ,||
na saŋkīyati,||
na saŋkīyissati,||
appatikuṭṭhaɱ samaṇehi brāhmaṇehi viññūhi.|| ||

Avyāpādo paribbājakā dhammapadaɱ aggaññaɱ,||
rattaññaɱ,||
vaɱsaññaɱ porāṇaɱ,||
asaŋkiṇṇaɱ,||
asaŋkiṇṇapubbaɱ,||
na saŋkīyati,||
na saŋkīyissati,||
appatikuṭṭhaɱ samaṇehi brāhmaṇehi viññūhi.|| ||

Sammā-sati paribbājakā dhammapadaɱ aggaññaɱ,||
rattaññaɱ,||
vaɱsaññaɱ,||
porāṇaɱ,||
asaŋkiṇṇaɱ,||
asaŋkiṇṇapubbaɱ,||
na saŋkīyati,||
na saŋkīyissati,||
appatikuṭṭhaɱ samaṇehi brāhmaṇehi viññūhi.|| ||

Sammā-samādhi paribbājakā dhammapadaɱ aggaññaɱ,||
rattaññaɱ,||
vaɱsaññaɱ,||
porāṇaɱ,||
asaŋkiṇṇaɱ,||
asaŋkiṇṇapubbaɱ,||
na saŋkīyati,||
na saŋkīyissati,||
appatikuṭṭhaɱ samaṇehi brāhmaṇehi viññūhi.|| ||

Imāni kho paribbājakā cattāri dhammapadāni aggaññāni,||
rattaññāni,||
vaɱsaññāni,||
porāṇāni,||
asaŋkiṇṇāni,||
asaŋkiṇṇapubbāni,||
na saŋkīyanti,||
na saŋkīyissanti,||
appatikuṭṭhāni samaṇehi brāhmaṇehi viññūhī ti.|| ||

3. Yo kho paribbājakā evaɱ vadeyya:|| ||

'Aham etaɱ anabhijjhaɱ dhammapadaɱ paccakkhāya abhijjhāluɱ kāmesu tibba-sārāgaɱ samaṇaɱ vā brāhmaṇaɱ vā paññāpessāmī' ti.|| ||

taɱ ahaɱ tatth'eva vadeyyaɱ:|| ||

'Etu!||
Vadatu!||
Vyāharatu!||
Passāmi'ssa ānubhāvan' ti.|| ||

So vata paribbājakā anabhijjhaɱ dhammapadaɱ paccakkhāya,||
abhijjhāluɱ kāmesu tibba-sārāgaɱ samaṇaɱ vā brāhmaṇaɱ vā paññāpessatī ti n'etaɱ ṭhānaɱ vijjati.|| ||

 

§

 

Yo kho paribbājakā evaɱ vadeyya:|| ||

'Ahame taɱ avyāpādaɱ dhammapadaɱ paccakkhāya vyāpannacittaɱ paduṭṭhamanasaŋkappaɱ samaṇaɱ vā brāhmaṇaɱ vā paññāpessāmī' ti.|| ||

taɱ ahaɱ tattha evaɱ vadeyyaɱ:|| ||

'Etu!||
Vadatu!||
Vyāharatu!||
Passāmi'ssa ānubhāvan' ti.|| ||

So vata paribbājakā avyāpādaɱ dhammapadaɱ paccakkhāya,||
vyāpannacittaɱ paduṭṭhamanasaŋkappaɱ samaṇaɱ vā brāhmaṇaɱ vā paññāpessatī ti n'etaɱ ṭhānaɱ vijjati.|| ||

 

§

 

Yo kho paribbājakā evaɱ vadeyya:|| ||

'Ahame taɱ sammā-satiɱ dhammapadaɱ paccakkhāya,||
muṭṭhassatiɱ asampajānaɱ samaṇaɱɱ vā brāhmaṇaɱ vā paññāpessāmī' ti.|| ||

taɱ ahaɱ tattha evaɱ vadeyyaɱ:|| ||

'Etu!||
Vadatu!||
Vyāharatu!||
Passāmi'ssa ānubhāvan' ti.|| ||

So vata paribbājakā sammā-satiɱ dhammapadaɱ paccakkhāya,||
muṭṭhassatiɱ asampajānaɱ samaṇaɱ vā brāhmaṇaɱ vā paññāpessatīti n'etaɱ ṭhānaɱ vijjati.|| ||

 

§

 

Yo kho paribbājakā evaɱ vadeyya:|| ||

'Ahame taɱ sammā-samādhiɱ dhammapadaɱ paccakkhāya asamāhitaɱ vibbhantacittaɱ samaṇaɱ vā brāhmaṇaɱ vā paññāpessāmī ti.|| ||

taɱ ahaɱ tattha evaɱ vadeyyaɱ:|| ||

'Etu!||
Vadatu!||
[31] Vyāharatu!||
Passāmi'ssa ānubhāvan' ti.|| ||

So vata paribbājakā sammā-samādhiɱ dhammapadaɱ paccakkhāya asamāhitaɱ vibbhantacittaɱ samaṇaɱ vā brāhmaṇaɱ vā paññāpessatī ti n'etaɱ ṭhānaɱ vijjati.|| ||

4. Yo kho paribbājakā imāni cattāri dhammapadāni garahitabbaɱ paṭikkositabbaɱ maññeyya,||
tassa diṭṭhe va dhamme cattāro sahadhammikā vādānupātā gārayhā ṭhānā agacchanti.|| ||

Katame cattāro?|| ||

Anabhijajhañ ce bhavaɱ dhammapadaɱ garahati,||
paṭikkosati||
ye ca hi abhijajhālū kāmesu tibba-sāragā samaṇa-brāhmaṇā,||
te bhoto pujjā||
te bhoto pāsaɱsā.|| ||

Avyāpādañ ce bhavaɱ dhammapadaɱ garahati,||
paṭikkosati||
ye ca hi vyāpannacittā paduṭṭhamanasaŋkappā samaṇa-brāhmaṇā||
te bhoto pujjā||
te bhoto pāsaɱsā.|| ||

Sammā-satiñ ce bhavaɱ dhammapadaɱ garahati,||
paṭikkosati||
ye ca hi muṭṭhassatī asampajānā samaṇa-brāhmaṇā,||
te bhoto pujjā||
te bhoto pāsaɱsā.|| ||

Sammā-samādhiñ ce bhavaɱ dhammapadaɱ garahati,||
paṭikkosati||
ye ca hi asamāhitā vibbhanta-cittā samaṇa-brāhmaṇā||
te bhoto pujjā||
te bhoto pāsaɱsā.|| ||

5. Yo kho paribbājakā imāni cattāri dhammapadāni garahitabbaɱ paṭikkositabbaɱ maññeyya,||
tassa diṭṭhe va dhamme ime cattāro sahadhammikā vādānupātā gārayhā ṭhānā āgacchanni.|| ||

Ye pi te paribbājakā ahesuɱ Ukkalā Vassaɱ Bhaññā ahetuvādā,||
akiriyavādā,||
n'atthikavādā.|| ||

Te pi imāni cattāri dhammapadāni na garahitabbaɱ na paṭikkositabbaɱ amaññiɱsu.|| ||

Taɱ kissa hetu?|| ||

Nindābyārosā-upārambhabhayāti.|| ||

 

Avyāpanno sadā sato ajjhattaɱ susamāhito,||
Abhijjhā-vinaye sikkhaɱ appamatto ti vuccatī ti.|| ||

 

Uruvela Vaggo Tatiyo.

 


Contact:
E-mail
Copyright Statement   Webmaster's Page