Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
4. Catukka Nipāta
IV. Cakka Vagga

Sutta 36

Doṇa(loka) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


[37]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā antarā ca Ukkaṭṭhaɱ antarā ca Setabbyaɱ addhānamaggapaṭipanno hoti.|| ||

Doṇo pi sudaɱ brāhmaṇo antarā ca Ukkaṭṭhaɱ antarā ca Setabbyaɱ addhānamaggapaṭipanno hoti.|| ||

Addasā kho Doṇo brāhmaṇo Bhagavato pādesu cakkāni sahassārāni sanemikāni sanābhikāni sabbākāraparipūrāni.|| ||

Disvān'assa etad ahosi:|| ||

"Acchariyaɱ vata bho.|| ||

Abbhūtaɱ vata bho na vat'imāni manussabhūtassa pādāni bhavissanti" ti.|| ||

[38] Atha kho Bhagavā maggā ukkamma aññatarasmiɱ rukkhamūle nisīdi,||
pallaŋkaɱ ābhujitvā ujuɱ kāyaɱ panidhāya parimukhaɱ satiɱ upaṭṭhapetvā.|| ||

Atha kho Doṇo brāhmaṇo Bhagavato pādāni anugacchanto addasa Bhagavantaɱ aññatarasmiɱ rukkhamūle nisinnaɱ pāsādikaɱ pasādanīyaɱ santindriyaɱ santamānasaɱ uttamadamathasamatham anuppattaɱ dantaɱ guttaɱ santindriyaɱ nāgaɱ||
disvā yena Bhagavā ten'upasaŋkami.|| ||

Upasaŋkamitvā Bhagavantaɱ etad avoca:|| ||

"Devo no bhavaɱ bhavissatī" ti?|| ||

"Na kho ahaɱ brāhmaṇa devo bhavissāmī" ti.|| ||

"Gandhabbo no bhavaɱ bhavissatī" ti?|| ||

"Na kho ahaɱ brāhmaṇa gandhabbo bhavissāmī" ti.|| ||

"Yakkho no bhavaɱ bhavissatī" ti?|| ||

"Na kho ahaɱ brāhmaṇa yakkho bhavissāmī" ti.|| ||

"Manusso no bhavaɱ bhavissatī" ti?|| ||

"Na kho ahaɱ brāhmaṇa manusso bhavissāmī" ti.|| ||

'Devo no bhavaɱ bhavissatī' ti?||
Iti puṭṭho samāno||
'na kho ahaɱ brāhmaṇa devo bhavissāmī'||
ti vadesi.|| ||

'Gandhabbo no bhavaɱ bhavissatī' ti?||
Iti puṭṭho samāno||
'na kho ahaɱ brāhmaṇa gandhabbo bhavissāmī'||
ti vadesi.|| ||

'Yakkho no bhavaɱ bhavissatī' ti?||
Iti puṭṭho samāno||
'na kho ahaɱ brāhmaṇa yakkho bhavissāmī'||
ti vadesi.|| ||

'Manusso no bhavaɱ bhavissatī' ti?||
Iti puṭṭho samāno||
'na kho ahaɱ brāhmaṇa manusso bhavissāmī'||
ti vadesi.|| ||

Atha ko carahi bhavaɱ bhavissatī" ti?|| ||

"Yesaɱ kho ahaɱ brāhmaṇa āsavānaɱ appahīṇattā devo bhaveyyaɱ,||
te me āsavā pahīṇā ucchinnamūlā tālāvatthukatā anabhāvakatā āyatiɱ anuppādadhammā.|| ||

Yesaɱ kho ahaɱ brāhmaṇa āsavānaɱ appahīṇattā gandhabbo bhaveyyaɱ,||
te me āsavā pahīṇā ucchinnamūlā tālāvatthukatā anabhāvakatā āyatiɱ anuppādadhammā.|| ||

Yesaɱ kho ahaɱ brāhmaṇa āsavānaɱ appahīṇattā yakkho bhaveyyaɱ,||
te me āsavā pahīṇā ucachinnamūlā tālāvatthukatā anabhāvakatā āyatiɱ anuppādadhammā.|| ||

Yesaɱ kho ahaɱ brāhmaṇa āsavānaɱ appahīṇattā manusso bhaveyyaɱ,||
te me āsavā pahīṇā ucchinnamūlā tālāvatthukatā anabhāvakatā āyatiɱ anuppādadhammā.|| ||

Seyyathā pi brāhmaṇa uppalaɱ vā padumaɱ vā puṇḍarīkaɱ vā udake jātaɱ udake saɱvaḍḍhaɱ udakaɱ accuggamma ṭhāti [39] anupalittaɱ udakena.|| ||

Evam eva kho ahaɱ brāhmaṇa loke jāto loke saɱvaḍḍho lokaɱ abhibhuyya viharāmi anupalitto lokena.|| ||

Buddhoti maɱ brāhmaṇa dhārehī" ti.|| ||

 

Yena devūpapaty assa gandhabbo vā vihaŋgamo,||
Yakkhattaɱ yena gaccheyyaɱ manussattañ ca abbaje,||
Te mayhaɱ āsavā khīṇā viddhastā vinaḷīīkatā.|| ||

Puṇḍarīkaɱ yathā vaggu toye na nūpalippati,||
Na ūpalippāmi lokena, tasmā Buddho'smi brāhmaṇā ti.|| ||

 


Contact:
E-mail
Copyright Statement   Webmaster's Page