Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
4. Catukka Nipāta
IV. Cakka Vagga

Sutta 39

Ujjāya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


[42]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

2. Atha kho Ujjāyo brāhmaṇo yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Ujjāyo brāhmaṇo Bhagavantaɱ etad avoca:|| ||

"Bhavam pi no Gotamo yaññaɱ vaṇṇetī" ti?|| ||

3. Na kho ahaɱ brāhmaṇa sabbaɱ yaññaɱ vaṇṇemi.|| ||

Na panāhaɱ brāhmaṇa sabbaɱ yaññaɱ na vaṇṇemi.|| ||

Yathārūpe ca kho brāhmaṇa yaññe gāvo haññanti,||
ajeḷakā haññanti,||
kukkuṭasūkarā haññanti,||
vividhā pāṇā saŋghātaɱ āpajjanti,||
evarūpaɱ kho ahaɱ brāhmaṇa sārambhaɱ yaññaɱ na vaṇṇemi.|| ||

Taɱ kissa hetu?|| ||

Evarūpaɱ hi brāhmaṇa sārambhaɱ yaññaɱ na upasaŋkamanti arahanto vā arahamaggaɱ samāpannā vā.|| ||

Yathārūpe ca kho brāhmaṇa yaññe n'eva gāvo haññanti,||
na ajeḷakā haññanti,||
na kukkuṭasūkarā haññanti,||
na vividhā pāṇā saŋghātaɱ āpajjanti.|| ||

Evarūpaɱ kho ahaɱ brāhmaṇa nirārambhaɱ yaññaɱ vaṇṇemi.|| ||

Yad idaɱ niccadānaɱ anukulayaññaɱ.|| ||

Taɱ kissa hetu?|| ||

Evarūpaɱ hi brāhmaṇa nirārambhaɱ yaññaɱ upasaŋkamanti arahanto vā arahamaggaɱ vā samāpannāti.|| ||

 

Assamedhaɱ purisamedhaɱ sammāpāsaɱ vājapeyyaɱ||
[43] Niraggalaɱ mahārambhā na te honti mahapphalā.|| ||

Ajeḷakā ca gāvo ca vividhā yattha haññare,||
Na taɱ sammaggatā yaññaɱ upayanti mahesino.|| ||

Yaɱ ca yaññaɱ nirārambhaɱ yajanti anukulaɱ sadā,||
ajeḷakā ca gāvo ca vividhā n'ettha haññare.|| ||

Taɱ ca sammaggatā yaññaɱ upayanti mahesino,||
Etaɱ yajetha medhāvī eso yañño mahapphalo.|| ||

Etaɱ hi yajamānassa seyyo hoti na pāpiyo,||
Yañño ca vipulo hoti pasīdanti ca devatāti.|| ||

 


Contact:
E-mail
Copyright Statement   Webmaster's Page