Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
4. Catukka Nipāta
V. Rohitassa Vagga

Sutta 41

Samādhibhāvanā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][ati][bd] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Catasso imā bhikkhave samādhibhāvanā.|| ||

Katamā catasso?|| ||

Atthi bhikkhave samādhibhāvanā bhāvitā bahulīkatā diṭṭha-dhamma-sukha-vihārāya saɱvattati.||
Atthi bhikkhave samādhibhāvanā bhāvitā bahulīkatā ñāṇadassanapaṭilābhāya saɱvattati.||
Atthi bhikkhave samādhibhāvanā bhāvitā bahulīkatā satisampajaññāya saɱvattati.||
Atthi bhikkhave samādhibhāvanā bhāvitā bahulīkatā āsavānaɱ khayāya saɱvattati.|| ||

[2][pts][ati][bd] [45] Katamā ca bhikkhave samādhibhāvanā bhāvitā bahulīkatā diṭṭha-dhamma-sukha-vihārāya saɱvattati?|| ||

Idha, bhikkhave, bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja viharati.||
Vitakka-vicārānaɱ vūpasamā ajjhattaɱ sampasādanaɱ cetaso ekodī-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.||
Pītiyā ca virāgā upekkhako ca viharati sato ca sampajāno, sukhañ ca kāyena paṭisaŋvedeti yaɱ taɱ ariyā ācikkhanti 'upekkhako satimā sukhavihārī'ti tatiyaɱ-jhānaɱ upasampajja viharati.||
Sukhassa ca pahānā dukkhassa ca pahānā pubb'eva somanassa-domanassānaɱ attha-gamā adukkhaɱ-asukhaɱ upekkhā-sati-pārisuddhiɱ catutthaɱ-jhānaɱ upasampajja viharati.||

Ayaɱ vuccati bhikkhave samādhibhāvanā bhāvitā bahulīkatā diṭṭha-dhamma-sukha-vihārāya saɱvattati.|| ||

[3][pts][ati][bd] Katamā ca bhikkhave samādhibhāvanā bhāvitā bāhulīkatā ñāṇadassanapaṭilābhāya saɱvattati?|| ||

Idha, bhikkhave, bhikkhu ālokasaññaɱ manasikaroti,||
divāsaññaɱ adhiṭṭhāti,||
yathā divā tathā rattiɱ,||
yathā rattiɱ tathā divā.||
Iti vivaṭena cetasā apariyonaddhena sappabhāsaɱ cittaɱ bhāveti.|| ||

Ayaɱ bhikkhave samādhibhāvanā bhāvitā bahulīkatā ñāṇadassanapaṭilābhāya saɱvattati:|| ||

[4][pts][ati][bd] Katamā ca bhikkhave samādhibhāvanā bhāvitā bahulīkatā satisampajaññāya saɱvattati?|| ||

Idha, bhikkhave, bhikkhuno viditā vedanā uppajjanti,||
viditā upaṭṭhahanti,||
viditā abbhatthaɱ gacchanti;||

viditā saññā uppajjanti,||
viditā upaṭṭhahanti,||
viditā abbhatthaɱ gacchanti;||

viditā vitakkā uppajjanti,||
viditā upaṭṭhahanti,||
viditā abbhatthaɱ gacchanti.|| ||

Ayaɱ bhikkhave samādhibhāvanā bhāvitā bahulīkatā satisampajaññāya saɱvattati.|| ||

[5][pts][ati][bd] Katamā ca bhikkhave samādhibhāvanā bhāvitā bahulīkatā āsavānaɱ khayāya saɱvattati?|| ||

Idha, bhikkhave, bhikkhu pañcupādānakkhandhesu udayabyayānupassī viharati.||

Iti rūpaɱ,||
iti rūpassa samudayo,||
iti rūpassa atthaŋgamo.||

Iti vedanā,||
iti vedanāya samudayo,||
iti vedanāya atthaŋgamo.||

Iti saññā,||
iti saññāya samudayo,||
iti saññāya atthaŋgamo.||

Iti saɱkhārā,||
iti saɱkhārānaɱ samudayo,||
iti saɱkhārānaɱ atthaŋgamo.||

Iti viññāṇaɱ,||
iti viññāṇassa samudayo,||
iti viññāṇassa atthaŋgamoti.|| ||

Ayaɱ bhikkhave samādhibhāvanā bhāvitā bahulikatā āsavānaɱ khayāya saɱvattati.|| ||

Imā kho bhikkhave catasso samādhibhāvanā.|| ||

Idañca pana me taɱ bhikkhave sandhāya bhāsitaɱ pārāyane puṇṇakapañhe.|| ||

Saŋkhāya lokasmiɱ parovarāni yass'iñjitaɱ n'atthi kuhiñci loke,||
[46] Santo vidhūmo anīgho nirāso atāri so jātijaranti brūmīti.

 


Contact:
E-mail
Copyright Statement   Webmaster's Page