Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
4. Catukka Nipāta
V. Rohitassa Vagga

Sutta 48

Visākha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvaṭṭhiyaɱ viharati Jetavane Anāthapiṇḍikassa ārāme.|| ||

Tena kho pana samayena āyasmā Visākho Pañcāliputto upaṭṭhānasālāyaɱ bhikkhū dhammiyā kathāya sandasseti samādapeti samuttejeti sampahaɱseti poriyā vācāya vissaṭṭhāya anelagalāya atthassa viññāpaniyā pariyāpannāya anissitāya.|| ||

Atha kho Bhagavā sāyaṇhasamayaɱ patisallānā vuṭṭhito yen'upaṭṭhānasālā ten'upasaŋkami.|| ||

Upasaŋkamitvā paññatte āsane nisīdi.|| ||

Nisajja kho Bhagavā bhikkhū āmantesi:|| ||

"Ko nu kho bhikkhave upaṭṭhānasālāyaɱ bhikkhū dhammiyā kathāya sandasseti samādapeti samuttejeti sampahaɱseti poriyā vācāya vissaṭṭhāya anelagalāya atthassa viññāpaniyā pariyāpannāya anissitāyā" ti?|| ||

"Āyasmā bhante Visākho Pañcāliputto upaṭṭhānasālāyaɱ bhikkhū dhammiyā kathāya sandasseti samādapeti samuttejeti sampahaɱseti poriyā vācāya vissaṭṭhāya anelagalāya atthassa viññāpaniyā pariyāpannāya anissitāyā" ti.|| ||

Atha kho Bhagavā āyasmantaɱ Visākhaɱ Pañcāliputtaɱ etad avoca:|| ||

"Sādhu sādhu visākha,||
sādhu kho tvaɱ Visākha bhikkhū dhammiyā kathāya sandassesi samādapesi samuttejesi sampahaɱsesi poriyā vācāya vissaṭṭhāya anelagalāya atthassa viññāpaniyā pariyāpannāya anissitāyā" ti.|| ||

Na bhāsamānaɱ jānanti missaɱ bālehi paṇḍitaɱ,||
Bhāsamānañ ca jānanti desentaɱ amataɱ padaɱ.|| ||

Bhāsaye jotaye dhammaɱ paggaṇhe isinaɱ dhajaɱ,||
Subhāsitadhajā isayo dhammo hi isinaɱ dhajo ti.|| ||

 


Contact:
E-mail
Copyright Statement   Webmaster's Page