Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
4. Catukka Nipāta
VII. Pattakamma Vagga

Sutta 61

Pattakamma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


[65]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho Anāthapiṇḍiko gahapati yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Anāthapiṇḍikaɱ gahapatiɱ Bhagavā etad avoca:|| ||

[66] 2. Cattāro'me gahapati dhammā iṭṭhā kantā manāpā dullabhā lokasmiɱ.|| ||

Katame cattāro?|| ||

'Bhogā me uppajjantu saha dhammenā' ti.|| ||

Ayaɱ paṭhamo dhammo iṭṭho kanto manāpo dullabho lokasmiɱ.|| ||

'Bhoge laddhā saha dhammena||
yaso maɱ abbhuggacchatu saha ñātīhi saha upajjhāyehī' ti.|| ||

Ayaɱ dutiyo dhammo iṭṭho kanto manāpo dullabho lokasmiɱ.|| ||

'Bhoge laddhā saha dhammena||
yasaɱ laddhā saha ñātīhi saha upajjhāyehi||
ciraɱ jīvāmi dīgham addhāyuɱ pālemī' ti.|| ||

Ayaɱ tatiyo dhammo iṭṭho kanto manāpo dullabho lokasmiɱ.|| ||

'Bhoge laddhā saha dhammena,||
yasaɱ laddhā sahañātīhi sahaupajjhāyehi||
ciraɱ jīvitvā dīghamaddhāyuɱ pāletvā,||
kāyassa bhedā param maraṇā sugatiɱ saggaɱ lokaɱ upapajjāmī' ti.|| ||

Ayaɱ catuttho dhammo iṭṭho kanto manāpo dullabho lokasmiɱ.|| ||

Ime kho gahapati cattāro dhammā iṭṭhā kantā manāpā Dullabhā lokasmiɱ.|| ||

3. Imesaɱ kho gahapati catunnaɱ dhammānaɱ iṭṭhānaɱ kantānaɱ manāpānaɱ dullabhānaɱ lokasmiɱ||
cattāro dhammā paṭilābhāya saɱvattanti.|| ||

Katame cattāro?|| ||

Saddhāsampadā,||
sīlasampadā,||
cāgasampadā,||
paññāsampadā.|| ||

4. Katamā ca gahapati saddhāsampadā?|| ||

Idha gahapati ariyasāvako saddho hoti,||
saddahati Tathāgatassa bodhiɱ:|| ||

Iti pi so Bhagavā arahaɱ sammāsambuddho vijjācaraṇasampanno sugato [lokavidū] anuttaro purisadammasārathī satthā deva-manussānaɱ Buddho Bhagavāti.|| ||

Ayaɱ vuccati gahapati saddhāsampadā.|| ||

5. Katamā ca gahapati sīlasampadā?|| ||

Idha gahapati ariyasāvako pāṇātipātā paṭivirato hoti.|| ||

Adinnādānā paṭivirato hoti.|| ||

Kāmesu micchācārā paṭivirato hoti.|| ||

Musāvādā paṭivirato hoti.|| ||

Surāmerayamajjapamādaṭṭhānā paṭivirato hoti.|| ||

Ayaɱ vuccati gahapati sīlasampadā.|| ||

6. Katamā ca gahapati cāgasampadā?|| ||

Idha gahapati ariyasāvako vigatamalamaccherena cetasā agāraɱ ajjhāvasati,||
muttācāgo payatapāṇī vossaggarato yācayogo dānasaɱvibhāgarato.|| ||

Ayaɱ vuccati gahapati cāgasampadā.|| ||

7. Katamā ca gahapati paññāsampadā?|| ||

Abhijjhā-visa- [67] malobhābhibhūtena cetasā gahapati viharanto akiccaɱ karoti,||
kiccaɱ aparādheti,||
akiccaɱ karonto kiccaɱ aparādhento yasā ca sukhā ca dhaɱsati.|| ||

Vyāpādābhibhūtena cetasā gahapati viharanto akiccaɱ karoti,||
kiccaɱ aparādheti,||
akiccaɱ karonto kiccaɱ aparādhento yasā ca sukhā ca dhaɱsati.|| ||

Thīnamiddhābhibhūtena cetasā gahapati viharanto akiccaɱ karoti,||
kiccaɱ aparādheti,||
akiccaɱ karonto kiccaɱ aparādhento yasā ca sukhā ca dhaɱsati.|| ||

Uddhaccakukkuccābhibhūtena cetasā gahapati viharanto akiccaɱ karoti,||
kiccaɱ aparādheti,||
akiccaɱ karonto kiccaɱ aparādhento yasā ca sukhā ca dhaɱsati.|| ||

Vicikicchābhibhūtena cetasā gahapati viharanto akiccaɱ karoti,||
kiccaɱ aparādheti,||
akiccaɱ karonto kiccaɱ aparādhento yasā ca sukhā ca dhaɱsati.|| ||

8. Sa kho so gahapati ariyasāvako abhijjhāvisamalobho cittassa upakkileso ti iti viditvā abhijjhāvisamalobhaɱ cittassa upakkilesaɱ pajahati.|| ||

Vyāpādo cittassa upakkileso ti iti viditvā vyāpādāɱ cittassa upakkilesaɱ pajahati.|| ||

Thīnamiddhaɱ cittassa upakkileso ti iti viditvā thīnamiddhaɱ cittassa upakkilesaɱ pajahati.|| ||

Uddaccakukkuccaɱ cittassa upakkileso ti iti viditvā uddhaccakukkuccaɱ cittassa upakkilesaɱ pajahati.|| ||

Vicikicchā cittassa upakkileso ti iti viditvā vickicchā cittassa upakkilesaɱ pajahati.|| ||

Yato ca kho gahapati ariyasāvakassa abhijjhāvisamalobho cittassa upakkileso ti iti viditvā abhijjhāvisamalobho cittassa upakkileso pahīṇo hoti,||
vyāpādo cittassa upakkileso ti iti viditvā vyāpādo cittassa upakkileso pahīṇo hoti,||
thīnamiddhaɱ cittassa upakkileso ti iti viditvā thīnamiddhaɱ cittassa upakkileso pahīṇo hoti,||
uddhaccakukkuccaɱ cittassa upakkileso ti iti viditvā uddhaccakukkuccaɱ cittassa upakileso pahīṇo hoti,||
vicikicchā cittassa upakkileso ti iti viditvā vicikicchā cittassa upakkileso pahīṇo hoti.|| ||

Ayaɱ vuccati gahapati ariyasāvako mahāpañño puthupañño āpāthadaso paññāsampanno.|| ||

Ayaɱ vuccati gahapati paññāsampadā.|| ||

Imesaɱ kho gahapati catunnaɱ dhammānaɱ iṭṭhānaɱ kattānaɱ manāpānaɱ dullabhānaɱ lokasmiɱ ime cattāro dhammā paṭilābhāya saɱvattanti.|| ||

9. Sa kho so gahapati ariyasāvako uṭṭhānaviriyādhigatehi bhogehi bāhābalaparicitehi sedāvakkhittehi dhammikehi dhammaladdhehi cattāri kammāni kattā hoti.|| ||

Katamāni cattāri?|| ||

10. Idha gahapati ariyasāvako uṭṭhānaviriyādhigatehi bhogehi bāhābalaparicitehi sedāvakkhittehi dhammikehi dhammaladdhehi attānaɱ sukheti pīneti sammā sukhaɱ pariharati,||
mātā-pitaro sukheti pīneti sammā sukhaɱ pariharati,||
puttadāradāsakammakaraporise sukheti pīneti sammā sukhaɱ pariharati,||
mittāmacce sukheti pīneti sammā sukhaɱ pariharati.|| ||

Idam assa paṭhamaɱ ṭhānaɱ gataɱ hoti pattagataɱ āyatanaso paribhuttaɱ.|| ||

[68] 11. Puna ca paraɱ gahapati ariyasāvako uṭṭhānaviriyādhigatehi bhogehi bāhābalaparicitehi sedāvakkhittehi dhammikehi dhammaladdhehi yā tā honti āpadā aggito vā udakato vā rājato vā corato vā appiyato vā dāyādato vā.|| ||

Tathārūpāsu āpadāsu bhogehi pariyodhāya vattati,||
sotthiɱ attānaɱ karoti.|| ||

Idam assa dutiyaɱ ṭhānaɱ gataɱ hoti pattagataɱ āyatanaso paribhuttaɱ.|| ||

12. Puna ca paraɱ gahapati ariyasāvako uṭṭhānaviriyādhigatehi bhogehi bāhābalaparicitehi sedāvakkhittehi dhammikehi dhammaladdhehi pañca balī kattā hoti:|| ||

Ñātibaliɱ atithibaliɱ pubbapetabaliɱ rājabaliɱ devatābaliɱ.|| ||

Idam assa tatiyaɱ ṭhānaɱ gataɱ hoti pattagataɱ āyatanaso paribhuttaɱ.|| ||

13. Puna ca paraɱ gahapati ariyasāvako uṭṭhānaviriyādhigatehi bhogehi bāhābalaparicitehi sedāvakkhittehi dhammikehi dhammaladdhehi ye te samaṇa-brāhmaṇā madappamādā paṭiviratā khantisoracce niviṭṭhā.|| ||

Ekam attānaɱ damenti,||
ekam attānaɱ samenti,||
ekam attānaɱ parinibbāpenti.|| ||

Tathārūpesu samaṇabrāhmaṇesu uddhaggikaɱ dakkhiṇaɱ patiṭṭhāpeti sovaggikaɱ sukhavipākaɱ sagga saɱvattanikaɱ.|| ||

Idam assa catutthaɱ ṭhānaɱ gataɱ hoti pattagataɱ āyatanaso paribhuttaɱ.|| ||

14. Sa kho so gahapati ariyasāvako uṭṭhānaviriyādhigatehi bhogehi bāhābalaparicitehi sedāvakkhittehi dhammikehi dhammaladdhehi imāni cattāri pattakammāni kattā hoti.|| ||

Yassa kassaci gahapati aññatra imehi catuhi pattakammehi bhogā parikkhayaɱ gacchanti.|| ||

Ime vuccanti gahapati bhogā aṭṭhānagatā appattagatā anāyatanaso paribhuttā.|| ||

Yassa kassaci gahapati imehi catuhi pattakammehi bhogā parikkhayaɱ gacchanti.|| ||

Ime vuccanti gahapati bhogā ṭhānagatā pattagatā āyatanaso paribhuttā" ti.|| ||

Bhuttā bhogā bhatā bhaccā vitiṇñā āpadāsu me,||
Uddhaggā dakkhiṇā dinnā atho pañca balīɱkatā.|| ||

Upaṭṭhitā sīlavanto saññatā brahmacārayo,||
Yadatthaɱ bhogaɱ iccheyya paṇḍito gharam āvasaɱ,||
[69] so me attho anuppatto kataɱ ananutāpiyaɱ.|| ||

Etaɱ anussaraɱ macco ariya-dhamme ṭhito naro,||
Idh'eva naɱ pasaɱsanti pecca sagge ca modatī ti.

 


Contact:
E-mail
Copyright Statement   Webmaster's Page