Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
4. Catukka Nipāta
VII. Pattakamma Vagga

Sutta 67

Ahi(metta) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][piya][than] Ekaɱ samayaɱ Bhagavā Sāvaṭṭhiyaɱ viharati Jetavane Anāthapiṇḍikassa ārāme.|| ||

Tena kho pana samayena Sāvaṭṭhiyaɱ aññataro bhikkhu ahinā daṭṭho kālakato hoti.|| ||

Atha kho sambahulā bhikkhū yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhū Bhagavantaɱ etad avocuɱ:|| ||

2. "Idha bhante Sāvaṭṭhiyaɱ aññataro bhikkhu ahinā daṭṭho kālakato" ti.|| ||

Na ha nūna so bhikkhave bhikkhu cattāri ahirājakulāni mettena cittena phari||
sace hi so bhikkhave bhikkhu cattāri ahirājakulāni mettena cittena phareyya,||
na hi so bhikkhave bhikkhu ahinā daṭṭho kālaɱ kareyya.|| ||

Katamāni cattāri ahirājakulāni?|| ||

Virūpakkhaɱ ahirājakulaɱ,||
Erāpathaɱ ahirājakulaɱ,||
Chabyāputtaɱ ahirājakulaɱ,||
Kaṇhāgotamakaɱ ahirājakulaɱ.|| ||

Na ha nūna so bhikkhave bhikkhu imāni cattāri ahirājakulāni mettena cittena Phari,||
sace hi so bhikkhave bhikkhu imāni cattāri ahirājakulāni mettena cittena phareyya,||
na hi so bhikkhave bhikkhu ahinā daṭṭho kālaɱ kareyya.|| ||

Anujānāmi bhikkhave imāni cattāri ahirājakulāni mettena cittena pharituɱ,||
attaguttiyā attarakkhāya attaparittāyāti.|| ||

 

Virūpakkhehi me mettaɱ||
mettaɱ Erāpathehi me,||
Chabyāputtehi me mettaɱ||
mettaɱ Kaṇhāgotamakehi ca|| ||

Apādakehi me mettaɱ||
mettaɱ dipādakehi me||
[73] Catuppadehi me mettaɱ||
mettaɱ bahuppadehi me|| ||

Mā maɱ apādako hiɱsi||
mā maɱ hiɱsi dipādako||
Mā maɱ catuppado hiɱsi||
mā maɱ hiɱsi bahuppado|| ||

Sabbe sattā||
sabbe pāṇā||
sabbe bhūtā ca kevalā,||
Sabbe bhadrāni passantu||
mā kañci pāpam āgamā.|| ||

 

Appamāṇo buddho.||
Appamāṇo dhammo.||
Appamāṇo saŋgho.||
Pamāṇavantāni siriɱsapāni ahivicchikā satapadī uṇṇānābhi sarabū mūsikā.|| ||

Katā me rakkhā.||
Katā me parittā.||
Paṭikkamantu bhutāni.||
So'haɱ namo Bhagavato.||
Namo sattannaɱ sammā-sambuddhānan.|| ||

 


Contact:
E-mail
Copyright Statement   Webmaster's Page