Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
VIII: Apaṇṇaka Vagga

Sutta 73

Asappurisa-vadhukā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Catuhi bhikkhave dhammehi samannāgato asappuriso veditabbo.|| ||

Katamehi catuhi?|| ||

Idha, bhikkhave, asappuriso yo hoti parassa avaṇṇo,||
taɱ apuṭṭhopi pātukaroti,||
ko pana vādo puṭṭhassa.|| ||

Puṭṭho kho pana pañhābhinīto ahāpetvā alambetvā paripūraɱ vitthārena parassa avaṇṇaɱ bhāsitā hoti.|| ||

Veditabbame taɱ bhikkhave asappuriso ayaɱ bhavanti.|| ||

Puna ca paraɱ bhikkhave asappuriso yo hoti parassa vaṇṇo,||
taɱ puṭṭho pi na pātukaroti.|| ||

Ko pana vādo apuṭṭhassa.|| ||

Puṭṭho kho pana pañhābhinīto hāpetvā lambetvā aparipūraɱ avitthārena parassa vaṇṇaɱ bhāsitā hoti.|| ||

Veditabbame taɱ bhikkhave asappuriso ayaɱ bhavanti.|| ||

Puna ca paraɱ bhikkhave asappuriso yo hoti attano avaṇṇo,||
taɱ puṭṭhopi na pātukaroti ko pana vādo apuṭṭhassa.|| ||

Puṭṭho kho pana pañhābhinīto hāpetvā lambetvā aparipūraɱ avitthārena attano avaṇṇaɱ bhāsitā hoti.|| ||

Veditabbamteɱ bhikkhave asappuriso ayaɱ bhavanti.|| ||

Puna ca paraɱ bhikkhave asappuriso yo hoti attano vaṇṇo,||
taɱ apuṭṭhopi pātukaroti,||
ko pana vādo puṭṭhassa puṭṭho kho pana pañhābhinīto ahāpetvā alambetvā paripūraɱ vitthārena attano vaṇṇaɱ bhāsitā hoti.|| ||

Veditabbame taɱ bhikkhave asappuriso ayaɱ bhavanti.|| ||

Imehi kho bhikkhave catuhi dhammehi samannāgato asappuriso veditabbo.|| ||

Catuhi bhikkhave dhammehi samannāgato sappuriso veditabbo.|| ||

Katamehi catuhi?|| ||

Idha, bhikkhave, sappuriso yo hoti parassa avaṇṇo,||
taɱ puṭṭhopi na pātukaroti,||
ko pana vādo apuṭṭhassa.|| ||

Puṭṭho kho pana pañhābhinīto hāpetvā lambetvā aparipūraɱ [78] avitthārena parassa avaṇṇaɱ bhāsitā hoti.|| ||

Veditabbam etaɱ bhikkhave sappuriso ayaɱ bhavan ti.|| ||

Puna ca paraɱ bhikkhave sappuriso yo hoti parassa vaṇṇo,||
taɱ apuṭṭhopi pātukaroti,||
ko pana vādo puṭṭhassa.|| ||

Puṭṭho kho pana pañhābhinīto ahāpetvā alambetvā paripūraɱ vitthārena parassa vaṇṇaɱ bhāsitā hoti.|| ||

Veditabbam etaɱ bhikkhave sappuriso ayaɱ bhavan ti.|| ||

Puna ca paraɱ bhikkhave sappuriso yo hoti attano avaṇṇo,||
taɱ apuṭṭhopi pātukaroti,||
ko pana vādo puṭṭhassa.|| ||

Puṭṭho kho pana pañhābhinīto ahāpetvā alambetvā paripūraɱ vitthārena attano avaṇṇaɱ bhāsitā hoti.|| ||

Veditabbam etaɱ bhikkhave sappuriso ayaɱ bhavan ti.|| ||

Puna ca paraɱ bhikkhave sappuriso yo hoti attano vaṇṇo,||
taɱ puṭṭhopi na pātukaroti,||
ko pana vādo apuṭṭhassa.|| ||

Puṭṭho kho pana pañhābhinīto hāpetvā lambetvā aparipūraɱ avitthārena attano vaṇṇaɱ bhāsitā hoti.|| ||

Veditambam etaɱ bhikkhave sappuriso ayaɱ bhavan ti.|| ||

Imehi kho bhikkhave catuhi dhammehi samannāgato sappuriso veditabbo.|| ||

 


Contact:
E-mail
Copyright Statement   Webmaster's Page