Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
IX: M-acala Vagga

Sutta 86

Oṇatoṇata Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Cattāro'me bhikkhave puggalā santo saɱvijjamānā lokasmiɱ.|| ||

Katame cattāro?|| ||

Cattāro'me bhikkhave puggalā santo saɱvijjamānā lokasmiɱ.

Katame cattāro?

Oṇatoṇato,||
oṇatuṇṇato,||
uṇṇatoṇato,||
uṇṇatuṇṇato.|| ||

Kathañ ca bhikkhave puggalo oṇatoṇato hoti?|| ||

Idha, bhikkhave, ekacco puggalo nīce kule paccājāto hoti caṇḍālakule vā veṇakule vā nesādakule vā rathakārakule vā pukkusakule vā dalidde appannapānabhojane kasiravuttike yattha kasirena ghāsacchādo labbhati.|| ||

So ca hoti dubbaṇṇo duddasiko okoṭimako bavhābādho kāṇo vā kuṇī vā khañjo vā pakkhahato vā,||
na lābhī annassa pānassa vatthassa yānassa mālāgandhavilepanassa seyyāvasathapadīpeyyassa.|| ||

So kāyena duccaritaɱ carati,||
vācāya duccaritaɱ carati,||
manasā duccaritaɱ carati.|| ||

So kāyena duccaritaɱ caritvā vācāya duccaritaɱ caritvā manasā duccaritaɱ caritvā kāyassa bhedā param maraṇā apāyaɱ duggatiɱ vinipātaɱ Nirayaɱ upapajjati.|| ||

Evaɱ kho bhikkhave puggalo oṇatoṇato hoti.|| ||

Kathañ ca bhikkhave puggalo oṇatuṇṇato hoti?|| ||

Idha, bhikkhave, ekacco puggalo nīce kule paccāchāto hoti caṇḍālakule vā veṇakule vā nesādakule vā rathakārakule vā pukkusakule vā dalidde appannapānabhojane kasiravuttike yattha kasirena ghāsavacchādo labbhati.|| ||

So ca hoti dubbaṇṇo duddasiko okoṭimako bavhābādho kāṇo vā kuṇī vā khañjo vā pakkhahato vā,||
na lābhī annassa pānassa vatthassa yānassa mālāgandhavilepanassa seyyāvasathapadīpeyyassa.|| ||

So kāyena sucaritaɱ carati,||
vācāya sucaritaɱ carati,||
manasā sucaritaɱ carati.|| ||

So kāyena sucaritaɱ caritvā vācāya sucaritaɱ caritvā manasā sucaritaɱ caritvā kāyassa bhedā param maraṇā sugatiɱ saggaɱ lokaɱ upapajjati.|| ||

Evaɱ kho bhikkhave puggalo oṇatuṇṇato hoti.|| ||

Kathañ ca bhikkhave puggalo uṇṇatoṇato hoti?|| ||

[86] Idha bhikkhave ekacco puggalo ucce kule paccāchāto hoti khattiyamahāsālakule vā brāhmaṇamahāsālakule vā gahapatimahāsālakule vā aḍḍhe mahaddhane mahābhoge pahūtajātarūparajate pahūtavittupakaraṇe pahūtadhanadhaññe.|| ||

So ca hoti abhirūpo dassanīyo pāsādiko paramāya vaṇṇapokkharatāya samannāgato.|| ||

Lābhī annassa pānassa vatthassa yānassa mālāgandhavilepanassa seyyāvasathapadīpeyyassa.|| ||

So kāyena duccaritaɱ carati,||
vācāya duccaritaɱ carati,||
manasā duccaritaɱ carati.|| ||

So kāyena duccaritaɱ caritvā,||
vācāya duccaritaɱ caritvā, manasā duccaritaɱ caritvā,||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjati.|| ||

Evaɱ kho bhikkhave puggalo uṇṇatoṇato hoti.|| |||| ||

Kathañ ca bhikkhave puggalo uṇṇatuṇṇato hoti?

Idha, bhikkhave, ekacco puggalo ucce kule paccājāto hoti khattiyamahāsālakule vā brāhmaṇamahāsālakule vā gahapatimahāsālakule vā aḍḍhe mahaddhane mahābhoge pahūtajātarūparajate pahūtavittupakaraṇe pahūtadhanadhaññe.|| ||

So ca hoti abhirūpo dassanīyo pāsādiko paramāya vaṇṇapokkharatāya samannāgato,||
lābhī annassa pānassa vatthassa yānassa mālāgandhavilepanassa seyyāvasathapadīpeyyassa.|| ||

So kāyena sucaritaɱ carati,||
vācāya sucaritaɱ carati,||
manasā sucaritaɱ carati.|| ||

So kāyena sucaritaɱ caritvā vācāya sucaritaɱ caritvā manasā sucaritaɱ caritvā kāyassa bhedā param maraṇā sugatiɱ saggaɱ lokaɱ upapajjati.|| ||

Evaɱ kho bhikkhave puggalo uṇṇatuṇṇato hoti.

Ime kho bhikkhave cattāro puggalā santo saɱvijjamānā lokasmin" ti.|| ||

 


Contact:
E-mail
Copyright Statement   Webmaster's Page