Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
X: Asura Vagga

Sutta 93

Dutiya Samādhi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Cattāro'me bhikkhave puggalā santo saɱvijjamānā lokasmiɱ.|| ||

Idha, bhikkhave, ekacco puggalo lābhī hoti ajjhattaɱ ceto-samathassa,||
na lābhī adhipaññā-dhamma-vipassanāya.|| ||

Idha pana bhikkhave ekacco puggalo lābhī hoti adhipaññā-dhamma-vipassanāya,||
na lābhī ajjhattaɱ ceto-samathassa.|| ||

Idha pana bhikkhave ekacco puggalo n'eva lābhī hoti ajjhattaɱ ceto-samathassa,||
na lābhī adhipaññā-dhamma-vipassanāya.|| ||

Idha pana bhikkhave ekacco puggalo lābhī c'eva hoti ajjhattaɱ ceto-samathassa,||
lābhī ca adhipaññā-dhamma-vipassanāya.|| ||

Ime kho bhikkhave cattāro puggalā santo saɱvijjamānā lokasminti.|| ||

Tatra, bhikkhave, yvāyaɱ puggalo lābhī hoti ajjhattaɱ [93] ceto-samathassa,||
na lābhī adhipaññā-dhamma-vipassanāya,||
tena bhikkhave puggalena ajjhattaɱ ceto-samathe patiṭṭhāya adhipaññā-dhamma-vipassanāya yogo karaṇīyo.|| ||

So aparena samayena lābhī c'eva hoti ajjhattaɱ ceto-samathassa,||
lābhī ca adhipaññā-dhamma-vipassanāya.|| ||

Tatra, bhikkhave, yvāyaɱ puggalo lābhī adhipaññā-dhamma-vipassanāya,||
na lābhī ajjhattaɱ ceto-samathassa.|| ||

Tena bhikkhave puggalena adhipaññā-dhamma-vipassanāya patiṭṭhāya ajjhattaɱ ceto-samathe yogo karaṇīyo.|| ||

So aparena samayena lābhī ce va hoti adhipaññā dhammavipassanāya,||
lābhī ca ajjhattaɱ ceto-samathassa.|| ||

Tatra, bhikkhave, yvāyaɱ puggalo n'eva lābhī ajjhattaɱ ceto-samathassa,||
na lābhī adhipaññā-dhamma-vipassanāya.|| ||

Tena bhikkhave puggalena tesaɱ yeva kusalānaɱ dhammānaɱ paṭilābhāya adhimatto chando ca,||
vāyāmo ca,||
ussāho ca,||
ussoḷhī ca,||
appaṭivānī ca,||
sati ca,||
sampajaññaɱ ca karaṇīyaɱ.|| ||

Seyyathā pi, bhikkhave, ādittacelo vā,||
ādittasīso vā,||
tassa'eva celassa vā,||
sīsassa vā,||
nibbāpanāya adhimattaɱ chandañ ca,||
vāyāmañ ca,||
ussāhañ ca,||
ussoḷhiñ ca,||
appaṭivāniñ ca,||
satiñ ca,||
sampajaññaɱ ca kareyya,||
evam eva kho, bhikkhave, tena puggalena tesaɱ yeva kusalānaɱ dhammānaɱ paṭilābhāya adhimatto chando ca||
vāyāmo ca,||
ussāho ca,||
ussoḷahī ca,||
appaṭivāni ca,||
sati ca,||
sampajaññaɱ ca karaṇīyaɱ.|| ||

So aparena samayena lābhī c'eva hoti ajjhattaɱ ceto-samathassa,||
lābhī ca adhipaññā-dhamma-vipassanāya.|| ||

Tatra, bhikkhave, yvāyaɱ puggalo lābhī c'eva hoti ajjhattaɱ ceto-samathassa,||
lābhī ca adhipaññā-dhamma-vipassanāya,||
tena bhikkhave puggalena tesu yeva kusalesu dhammesu patiṭṭhāya uttariɱ āsavānaɱ khayāya yogo karaṇīyo.|| ||

 


Contact:
E-mail
Copyright Statement   Webmaster's Page