Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
X: Asura Vagga

Sutta 94

Tatiya Samādhi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


[93]

[1][than][pts][Olds] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattāro'me bhikkhave puggalā santo saɱvijjamānā lokasmiɱ.|| ||

Katame cattāro?|| ||

Idha, bhikkhave, ekacco puggalo lābhī hoti ajjhattaɱ ceto-samathassa,||
na lābhī adhipaññā-dhamma-vipassanāya.|| ||

Idha [94] pana bhikkhave ekacco puggalo lābhī hoti adhipaññā-dhamma-vipassanāya,||
na lābhī ajjhattaɱ ceto-samathassa.|| ||

Idha pana bhikkhave ekacco puggalo n'eva lābhī hoti ajjhattaɱ ceto-samathassa,||
na lābhī adhipaññā-dhamma-vipassanāya.|| ||

Idha pana bhikkhave ekacco puggalo lābhī c'eva hoti ajjhattaɱ ceto-samathassa,||
lābhī ca adhipaññā-dhamma-vipassanāya.|| ||

Ime kho bhikkhave cattāro puggalā santo saɱvijjamānā lokasminti.|| ||

 


 

Tatra, bhikkhave, yvāyaɱ puggalo lābhī ajjhattaɱ ceto-samathassa,||
na lābhī adhipaññā-dhamma-vipassanāya,||
tena bhikkhave puggalena yvāyaɱ puggalo lābhī adhipaññā-dhamma-vipassanāya,||
so upasaŋkamitvā evam assa vacanīyo:|| ||

Kathaɱnu kho āvuso sankhārā daṭṭhabbā?|| ||

Kathaɱ sankhārā sammasitabbā?|| ||

Kathaɱ sankhārā vipassitabbāti?|| ||

Tassa so yathādiṭṭhaɱ yathāviditaɱ vyākaroti:|| ||

"Evaɱ kho āvuso sāŋkhārā daṭṭhabbā,||
evaɱ sankhārā sammasitabbā,||
evaɱ sankhārā vipassitabbā" ti.|| ||

So aparena samayena lābhī c'eva hoti ajjhattaɱ ceto-samathassa,||
lābhī ca adhipaññā-dhamma-vipassanāya.|| ||

 


 

Tatra, bhikkhave, yvāyaɱ puggalo lābhī adhipaññā-dhamma-vipassanāya,||
na lābhī ajjhattaɱ ceto-samathassa||
tena bhikkhave puggalena yvāyaɱ puggalo lābhī ajjhattaɱ ceto-samathassa,||
so upasaŋkamitvā evam assa vacanīyo:|| ||

"Kathaɱ nu kho āvuso cittaɱ saṇṭhapetabbaɱ?|| ||

Kathaɱ cittaɱ sannisādetabbaɱ?|| ||

Kathaɱ cittaɱ ekodi kattabbaɱ?|| ||

Kathaɱ cittaɱ samādahātabban ti?.|| ||

"Tassa so yathādiṭṭhaɱ yathāviditaɱ vyākaroti:|| ||

"Evaɱ kho āvuso cittaɱ saṇṭhapetabbaɱ,||
evaɱ cittaɱ sannisādetabbaɱ,||
evaɱ cittaɱ ekodikattabbaɱ,||
evaɱ cittaɱ samādahātabban" ti.|| ||

So aparena samayena lābhī c'eva hoti adhipaññā-dhamma-vipassanāya,||
lābhī ca ajjhattaɱ ceto-samathassa.|| ||

 


 

Tatra, bhikkhave, yvāyaɱ puggalo n'eva lābhī ca ajjhattaɱ ceto-samathassa,||
na lābhī adhipaññā-dhamma-vipassanāya,||
tena bhikkhave puggalena yvāyaɱ puggalo lābhī c'eva ajjhattaɱ ceto-samathassa,||
lābhī ca adhipaññā-dhamma-vipassanāya.|| ||

So upasaŋkamitvā evam assa vacanīyo:|| ||

"Kathaɱ nu kho āvuso cittaɱ saṇṭhapetabbaɱ?|| ||

Kathaɱ cittaɱ sannisādetabbaɱ?|| ||

Kathaɱ cittaɱ ekodi kattabbaɱ?|| ||

Kathaɱ cittaɱ samādahātabbaɱ?|| ||

Kathaɱ sankhārā daṭṭhabbā?|| ||

Kathaɱ sankhārā sammasitabbā?|| ||

Kathaɱ sankhārā vipassitabbā" ti?|| ||

Tassa so yathādiṭṭhaɱ yathāviditaɱ vyākaroti:|| ||

"Evaɱ kho āvuso cittaɱ saṇṭhapetabbaɱ,||
evaɱ cittaɱ sannisādetabbaɱ,||
evaɱ cittaɱ ekodi kattabbaɱ,||
evaɱ cittaɱ samādahātabbaɱ,||
evaɱ sankhārā daṭṭhabbā,||
evaɱ sankhārā sammasitabbā||
evaɱ sankhārā vipassitabbā" ti.|| ||

So aparena [95] samayena lābhī c'eva hoti ajjhattaɱ ceto-samathassa,||
lābhī ca adhipaññā-dhamma-vipassanāya.|| ||

Tatra, bhikkhave, yvāyaɱ puggalo lābhī c'eva hoti ajjhattaɱ ceto-samathassa,||
lābhī ca adhipaññā-dhamma-vipassanāya,||
tena bhikkhave puggalena tesu yeva kusalesu dhammesu patiṭṭhāya uttariɱ āsavānaɱ khayāya yogo karaṇīyo.|| ||

Ime kho bhikkhave cattāro puggalā santo saɱvijjamānā lokasmin ti.|| ||

 


Contact:
E-mail
Copyright Statement   Webmaster's Page