Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
X: Asura Vagga

Sutta 96

Rāgavinaya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][than][pts] Cattāro'me bhikkhave puggalā santo saɱvijjamānā lokasmiɱ.|| ||

Katame cattāro?|| ||

Attahitāya paṭipanno no parahitāya.|| ||

Parahitāya paṭipanno no attahitāya.|| ||

N'eva attahitāya paṭipanno no parahitāya.|| ||

Attahitāya ca paṭipanno parahitāya ca.|| ||

Kathañ ca bhikkhave puggalo attahitāya paṭipanno no parahitāya?|| ||

Idha, bhikkhave, ekacco puggalo attanā rāgavinayāya paṭipanno hoti,||
no paraɱ rāgavinayāya samādapeti.|| ||

Attanā dosavinayāya paṭipanno hoti,||
no paraɱ dosavinayāya samādapeti.|| ||

Attanā mohavinayāya paṭipanno hoti,||
no paraɱ mohavinayāya samādapeti.|| ||

Evaɱ kho bhikkhave puggalo attahitāya paṭipanno hoti no parahitāya.|| ||

Kathañ ca bhikkhave puggalo parahitāya paṭipanno hoti,||
no attahitāya?|| ||

Idha, bhikkhave, ekacco puggalo attanā na rāgavinayāya paṭipanno hoti,||
paraɱ rāgavinayāya samādapeti.|| ||

Attanā na dosavinayāya paṭipanno hoti,||
paraɱ dosavinayāya samādapeti.|| ||

Attanā na mohavinayāya paṭipanno hoti,||
paraɱ mohavinayāya samādapeti.|| ||

Evaɱ kho bhikkhave puggalo parahitāya paṭipanno hoti,||
no attahitāya.|| ||

Kathañ ca bhikkhave puggalo n'evattahitāya paṭipanno hoti,||
no parahitāya?|| ||

Idha, bhikkhave, ekacco puggalo attanā na rāgavinayāya paṭipanno hoti,||
no paraɱ rāgavinayāya samādapeti.|| ||

Attanā na dosavinayāya paṭipanno hoti,||
no paraɱ dosavinayāya samādapeti.|| ||

Attanā na mohavinayāya paṭipanno hoti,||
no paraɱ mohavinayāya samādapeti.|| ||

Evaɱ kho bhikkhave puggalo n'evattahitāya paṭipanno||
hoti no parahitāya.|| ||

Kathañ ca bhikkhave puggalo attahitāya ca paṭipanno hoti,||
parahitāya ca?|| ||

Idha, bhikkhave, ekacco puggalo attanā ca rāgavinayāya paṭipanno hoti,||
parañ ca rāgavinayāya samādapeti.|| ||

Attanā ca dosavinayāya paṭipanno hoti,||
parañ ca dosavinayāya samādapeti.|| ||

Attanā ca mohavinayāya paṭipanno hoti,||
parañ ca [97] mohavinayāya samādapeti.|| ||

Evaɱ kho bhikkhave puggalo attahitāya ca paṭipanno hoti,||
parahitāya ca.|| ||

Ime kho bhikkhave cattāro puggalā santo saɱvijjamānā lokasmin ti.|| ||

 


Contact:
E-mail
Copyright Statement   Webmaster's Page