Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
X: Asura Vagga

Sutta 97

Khippanisanti Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Cattāro'me bhikkhave puggalā santo saɱvijjamānā lokasmiɱ.|| ||

Katame cattāro?

Attahitāya paṭipanno no parahitāya.|| ||

Parahitāya paṭipanno no attahitāya.|| ||

N'eva attahitāya paṭipanno no parahitāya.|| ||

Attahitāya ca paṭipanno parahitāya ca.|| ||

2. Kathañ ca bhikkhave puggalo attahitāya paṭipanno no parahitāya?|| ||

Idha, bhikkhave, ekacco puggalo khippanisantī ca hoti kusalesu dhammesu.|| ||

Sutānaɱ ca dhammānaɱ dhārakajātiko hoti.|| ||

Dhatānaɱ ca dhammānaɱ atthupaparikkhī hoti.|| ||

Attham aññāya dhammam aññāya dhammānudhammapaṭipanno hoti.|| ||

No ca kalyāṇavāco hoti kalyāṇavākkaraṇo||
poriyā vācāya samannāgato vissaṭṭhāya anelagalāya atthassa viññāpaniyā.|| ||

N'eva sandassako samādapako samuttejako sampahaɱsako sabrahmacārīnaɱ.|| ||

Evaɱ kho bhikkhave puggalo attahitāya paṭipanno hoti no parahitāya.|| ||

3. Kathañ ca bhikkhave puggalo parahitāya paṭipanno hoti no attahitāya?|| ||

Idha, bhikkhave, ekacco puggalo na h'eva kho khippanisantī hoti kusalesu dhammesu.|| ||

No ca sutānaɱ dhammānaɱ dhārakajātiko hoti.|| ||

No ca dhatānaɱ dhammānaɱ atthūpaparikkhī hoti.|| ||

No ca attham aññāya dhammam aññāya dhammānudhammapaṭipanno hoti.|| ||

Kalyāṇavāco ca hoti kalyāṇavākkaraṇo||
poriyā vācāya samannāgato vissaṭṭhāya anelagalāya atthassa viññāpaniyā.|| ||

Sandassako ca hoti samādapako samuttejako sampahaɱsako sabrahmacārīnaɱ.|| ||

Evaɱ kho bhikkhave puggalo parahitāya paṭipanno hoti no attahitāya.|| ||

[98] 4. Kathañ ca bhikkhave puggalo n'ev'attahitāya paṭipanno hoti no parahitāya?|| ||

Idha, bhikkhave, ekacco puggalo na h'eva kho khippanisantī hoti kusalesu dhammesu.|| ||

No ca sutānaɱ dhammānaɱ dhārakajātiko hoti.|| ||

No ca dhatānaɱ dhammānaɱ atthupaparikkhī hoti.|| ||

No ca attham aññāya dhammam aññāya dhammānudhammapaṭipanno hoti.|| ||

No ca kalyāṇavāco hoti kalyāṇavākkaraṇo||
poriyā vācāya samannāgato vissaṭṭhāya anelagalāya atthassa viññāpaniyā.|| ||

No ca sandassako hoti samādapako samuttejako sampahaɱsako sabrahmacārīnaɱ.|| ||

Evaɱ kho bhikkhave puggalo n'evattahitāya paṭipanno hoti no parahitāya.|| ||

5. Kathañ ca bhikkhave puggalo attahitāya ca paṭipanno hoti parahitāya ca?|| ||

Idha, bhikkhave, ekacco puggalo khippanisantī ca hoti kusalesu dhammesu.|| ||

Sutānañ ca dhammānaɱ dhārakajātiko hoti.|| ||

Dhatānañ ca dhammānaɱ atthupaparikkhī hoti.|| ||

Attham aññāya dhammam aññāya dhammānudhammapaṭipanno hoti.|| ||

Kalyāṇavāco hoti kalyāṇavākkaraṇo||
poriyā vācāya samannāgato vissaṭṭhāya anelagalāya atthassa viññāpaniyā.|| ||

Sandassako ca hoti samādapako samuttejako sampahaɱsako sabrahmacārīnaɱ.|| ||

Evaɱ kho bhikkhave puggalo attahitāya ca paṭipanno hoti parahitāya ca.|| ||

Ime kho bhikkhave cattāro puggalā santo saɱvijjamānā lokasmin ti.|| ||

 


Contact:
E-mail
Copyright Statement   Webmaster's Page