Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XI: Valāhaka Vagga

Sutta 101

Paṭhama Valāhaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

Cattārome bhikkhave valāhakā.|| ||

Katame cattāro?|| ||

Gajjitā no vassitā,||
vassitā no gajjitā,||
n'eva gajjitā no vassitā,||
gajjitā ca vassitā ca.|| ||

Ime kho bhikkhave cattāro valāhakā.|| ||

Evam eva kho bhikkhave cattāro'me valāhakūpamā puggalā santo saɱvijjamānā lokasmiɱ.|| ||

Katame cattāro?|| ||

Gajjitā no vassitā,||
vassitā no gajjitā,||
n'eva gajjitā no vassitā,||
gajjitā ca vassitā ca.|| ||

Kathañ ca bhikkhave puggalo gajjitā hoti no vassitā?|| ||

Idha, bhikkhave, ekacco puggalo bhāsitā hoti no kattā.|| ||

Evaɱ kho bhikkhave puggalo gajjitā hoti no vassitā.|| ||

Seyyathā pi so bhikkhave valāhako gajjitā no vassitā,||
tathūpamāhaɱ bhikkhave imaɱ puggalaɱ vadāmi.|| ||

Kathañ ca bhikkhave puggalo vassitā hoti no gajjitā?|| ||

Idha, bhikkhave, ekacco puggalo kattā hoti no bhāsitā.|| ||

Evaɱ kho bhikkhave puggalo vassitā hoti no gajjitā.|| ||

Seyyathā pi so bhikkhave valāhako vassitā no gajjitā,||
tathūpamāhaɱ bhikkhave imaɱ puggalaɱ vadāmi.|| ||

Kathañ ca bhikkhave puggalo n'eva gajjitā hoti no vassitā?|| ||

Idha, bhikkhave, ekacco puggalo n'eva bhāsitā hoti no kattā.|| ||

Evaɱ kho bhikkhave puggalo n'eva gajjitā hoti no vassitā.|| ||

Seyyathā pi so bhikkhave valāhako n'eva gajjitā hoti no vassitā,||
tathūpamāhaɱ bhikkhave imaɱ puggalaɱ vadāmi.|| ||

Kathañ ca bhikkhave puggalo gajjitā ca hoti vassitā ca?|| ||

Idha, bhikkhave, ekacco puggalo bhāsitā ca hoti kattā ca.|| ||

Evaɱ kho bhikkhave puggalo gajjitā ca hoti vassitā ca.|| ||

Seyyathā pi so bhikkhave valāhako gajjitā ca vassitā ca,||
tathūpamāhaɱ bhikkhave imaɱ puggalaɱ vadāmi.|| ||

Ime kho bhikkhave cattāro valāhakūpamā puggalā santo saɱvijjamānā lokāsmin ti.|| ||

 


Contact:
E-mail
Copyright Statement   Webmaster's Page