Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XI: Valāhaka Vagga

Sutta 108

Balivadda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Cattāro'me bhikkhave balivaddā.|| ||

Katame cattāro?|| ||

[109] Sagavacaṇḍo no paragavacaṇḍo,||
paragavacaṇḍo no sagavacaṇḍo,||
sagavacaṇḍo ca paragavacaṇḍo ca,||
n'eva sagavacaṇḍo no paragavacaṇḍo.|| ||

Ime kho bhikkhave cattāro balivaddā.|| ||

Evam eva kho bhikkhave cattāro'me balivaddūpamā puggalā santo saɱvijjamānā lokasmiɱ.|| ||

Katame cattāro?|| ||

Sagavacaṇḍo no paragavacaṇḍo,||
paragavacaṇḍo no sagavacaṇḍo,||
sagavacaṇḍo ca paragavacaṇḍo ca,||
n'eva sagavacaṇḍo no paragavacaṇḍo.|| ||

Kathañ ca bhikkhave puggalo sagavacaṇḍo hoti no paragavacaṇḍo?|| ||

Idha, bhikkhave, ekacco puggalo sakaɱ parisaɱ ubbejetā hoti,||
no paraparisaɱ.|| ||

Evaɱ kho bhikkhave puggalo sagavacaṇḍo hoti no paragavacaṇḍo.|| ||

Seyyathā pi so bhikkhave balivaddo sagavacaṇḍo no paragavacaṇḍo,||
tathūpamāhaɱ bhikkhave imaɱ puggalaɱ vadāmi.|| ||

Kathañ ca bhikkhave puggalo paragavacaṇḍo hoti no sagavacaṇḍo?|| ||

Idha, bhikkhave, ekacco puggalo paraparisaɱ ubbejetā hoti no sakaparisaɱ.|| ||

Evaɱ kho bhikkhave puggalo paragavacaṇḍo hoti no sagavacaṇḍo.|| ||

Seyyathā pi so bhikkhave balivaddo paragavacaṇḍo no sagavacaṇḍo,||
tathūpamāhaɱ bhikkhave imaɱ puggalaɱ vadāmi.|| ||

Kathañ ca bhikkhave puggalo sagavacaṇḍo ca hoti paragavacaṇḍo?|| ||

Idha, bhikkhave, ekacco puggalo sakaparisañ ca ubbejetā hoti paraparisañ ca.|| ||

Evaɱ kho bhikkhave puggalo sagavacaṇḍo ca hoti paragavacaṇḍo ca.|| ||

Seyyathā pi so bhikkhave baliddo sagavacaṇḍo ca paragavacaṇḍo ca,||
tathūpamāhaɱ bhikkhave imaɱ puggalaɱ vadāmi.|| ||

Kathañ ca bhikkhave puggalo n'eva sagavacaṇḍo hoti no paragavacaṇḍo?|| ||

Idha, bhikkhave, ekacco puggalo n'eva sakaparisaɱ ubbejetā hoti no paraparisaɱ.|| ||

Evaɱ kho bhikkhave puggalo n'eva sagavacaṇḍo hoti no paragavacaṇḍo.|| ||

Seyyathā pi so bhikkhave balivaddo n'eva sagavacaṇḍo no paragavacaṇḍo,||
tathūpamāhaɱ bhikkhave imaɱ puggalaɱ vadāmi.|| ||

Ime kho bhikkhave cattāro balivaddūpamā puggalā santo saɱvijjamānā lokasmin ti.|| ||

 


Contact:
E-mail
Copyright Statement   Webmaster's Page