Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XI: Valāhaka Vagga

Sutta 110

Āsivisa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Cattāro'me bhikkhave āsivisā.|| ||

Katame cattāro?|| ||

Āgataviso na ghoraviso,||
ghoraviso na āgataviso,||
āgataviso ca ghoraviso ca,||
nevāgataviso na ghoraviso.|| ||

Ime kho bhikkhave cattāro āsivisā. [111] Evam eva kho, bhikkhave, cattāro'me āsivisūpamā puggalā santo saɱvijmānā lokasmiɱ.|| ||

Katame cattāro?|| ||

Āgataviso na ghoraviso,||
ghoraviso na āgataviso,||
āgataviso ca ghoraviso ca,||
nevāgataviso na ghoraviso.|| ||

Kathañ ca bhikkhave puggalo āgataviso hoti na ghoraviso?|| ||

Idha, bhikkhave, ekacco puggalo abhiṇhaɱ kujjhati.|| ||

So ca khvassa kodho na dīgha-rattaɱ anuseti.|| ||

Evaɱ kho bhikkhave puggalo āgataviso hoti na ghoraviso.|| ||

Seyyathā pi so bhikkhave āsīviso āgataviso na ghoraviso,||
tathūpamāhaɱ bhikkhave imaɱ puggalaɱ vadāmi.|| ||

Kathañ ca bhikkhave puggalo ghoraviso hoti na āgataviso?|| ||

Idha, bhikkhave, ekacco puggalo na heva kho abhiṇhaɱ kujjhati.|| ||

So ca khvassa kodho dīgha-rattaɱ anuseti.|| ||

Evaɱ kho bhikkhave puggalo ghoraviso hoti na āgataviso.|| ||

Seyyathā pi so bhikkhave āsiviso ghoraviso na āgataviso,||
tathūpamāhaɱ bhikkhave imaɱ puggalaɱ vadāmi.|| ||

Kathañ ca bhikkhave puggalo āgataviso ca hoti ghoraviso ca?|| ||

Idha, bhikkhave, ekacco puggalo abhiṇhaɱ kujjhati.|| ||

So ca khvassa kodho dīgha-rattaɱ anuseti.|| ||

Evaɱ kho bhikkhave puggalo āgataviso ca hoti ghoraviso ca.|| ||

Seyyathā pi so bhikkhave āsiviso āgataviso ca ghoraviso ca,||
tathūpamāhaɱ bhikkhave imaɱ puggalaɱ vadāmi.|| ||

Kathañ ca bhikkhave puggalo nevāgataviso hoti na ghoraviso?|| ||

Idha, bhikkhave, ekacco puggalo na heva kho abhiṇhaɱ kujjhati.|| ||

So ca khvassa kodho na dīgha-rattaɱ anuseti.|| ||

Evaɱ kho bhikkhave puggalo nevāgataviso na ghoraviso.|| ||

Seyyathā pi so bhikkhave āsiviso nevāgataviso na ghoraviso,||
tathūpamāhaɱ bhikkhave imaɱ puggalaɱ vadāmi.|| ||

Ime kho bhikkhave cattāro āsivisūpamā puggalā santo saɱvijjamānā lokasminti.|| ||

Valāhaka vaggo paṭhamo.|| ||

 


Contact:
E-mail
Copyright Statement   Webmaster's Page