Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Tika Nipāto
XII: Kesi Vagga

Sutta 113

Assājānīya-patoda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][ati] Cattārome bhikkhave bhadrā assājānīyā santo saɱvijjamānā lokasmiɱ.|| ||

Katame cattāro?|| ||

Idha, bhikkhave, ekacco bhadro assājānīyo patodacchāyaɱ disvā saɱvijjati saɱvegaɱ āpajjati:||
"kiɱnu kho maɱ ajja assadammasārathī kāraṇaɱ kāressati,||
kimassāhaɱ patikaromī" ti.|| ||

Eva rūpopi bhikkhave idh'ekacco bhadro assājāniyo hoti.|| ||

Ayaɱ bhikkhave paṭhamo bhadro assājānīyo santo saɱvijjamāno lokasmiɱ.|| ||

[2][pts][ati] Puna ca paraɱ bhikkhave idh'ekacco bhadro assājānīyo naheva kho patodacchāyaɱ disvā saɱvijjati saɱvegaɱ āpajjati,||
api ca kho lomavedhaviddho saɱvijjati saɱvegaɱ āpajjati:||
"kiɱnu kho maɱ ajja assadammasārathī kāraṇaɱ kāressati,||
kimassāhaɱ patikaremī" ti.|| ||

Evarūpopi bhikkhave idh'ekacco bhadro assājānīyo hoti.|| ||

Ayaɱ bhikkhave dutiyo bhadro assājānīyo santo saɱvijjamāno lokasmiɱ.|| ||

[3][pts][ati] Puna ca paraɱ bhikkhave idh'ekacco bhadro assājānīyo naheva kho patodacchāyaɱ disvā saɱvijjati saɱvegaɱ āpajjati,||
napi lomavedhaviddho saɱvijjati saɱvegaɱ āpajjati.|| ||

Api ca kho cammavedhaviddho saɱvijjati saɱvegaɱ āpajjati:||
"kiɱnu kho maɱ ajja assadammasārathī kāraṇaɱ kāressati,||
kimassāhaɱ patikaromī" ti.|| ||

Evarūpopi bhikkhave idh'ekacco bhadro assājānīyo hoti.|| ||

Ayaɱ bhikkhave tatiyo bhadro assājānīyo santo saɱvijjamāno lokasmiɱ.|| ||

[4][pts][ati] Puna ca paraɱ bhikkhave idh'ekacco bhadro assājānīyo naheva kho patodacchāyaɱ disvā saɱvijjati saɱvegaɱ āpajjati,||
napi lomavedhaviddho saɱvijjati saɱvegaɱ āpajjati.|| ||

Napi cammavedhaviddho saɱvijjati saɱvegaɱ āpajjati.|| ||

Api ca kho aṭṭhivedhaviddho saɱvijjati saɱvegaɱ āpajjati:||
[115] "kiɱnu kho maɱ ajja assadammasārathī kāraṇaɱ kāressati,||
kimassāhaɱ patikaromī" ti.|| ||

Evarūpopi bhikkhave idh'ekacco bhadro assājānīyo hoti.|| ||

Ayaɱ bhikkhave catuttho bhadro assājānīyo santo saɱvijjamāno lokasmiɱ.|| ||

Ime kho bhikkhave cattāro bhadrā assājānīyā santo saɱvijjamānā lokasmiɱ.|| ||

[5][pts][ati] Evam eva kho bhikkhave cattārome bhadrā purisājānīyā santo saɱvijjamānā lokāsmiɱ.|| ||

Katame cattāro?|| ||

Idha, bhikkhave, ekacco bhadro purisājānīyo suṇāti amukasmiɱ nāma gāme vā nigame vā itthī vā puriso vā dukkhito vā kālakato vāti.|| ||

So tena saɱvijjati saɱvegaɱ āpajjati.|| ||

Saɱviggo yoniso padahati.|| ||

Pahitatto kāyena c'eva paramasaccaɱ sacchikaroti,||
paññāya ca ativijjha passati.|| ||

seyyathā pi so bhikkhave bhadro assājāniyo patodacchāyaɱ disvā saɱvijjati saɱvegaɱ āpajjati,||
tathūpamāhaɱ bhikkhave imaɱ bhadraɱ purisājānīyaɱ vadāmi.|| ||

Evarūpopi bhikkhave idh'ekacco bhadro purisājānīyo hoti.|| ||

Ayaɱ bhikkhave paṭhamo bhadro purisājānīyo santo saɱvijjamāno lokasmiɱ.|| ||

[6][pts][ati] Puna ca paraɱ bhikkhave idh'ekacco bhadro purisājānīyo naheva kho suṇāti amukasmiɱ nāma gāme vā nigame vā itthī vā puriso vā dukkhito vā kālakato vā ti.|| ||

Api ca kho sāmaɱ passati.|| ||

Itthiɱ vā purisaɱ vā dukkhitaɱ vā kālakataɱ vā.|| ||

So tena saɱvijjati saɱvegaɱ āpajjati.|| ||

Saɱviggo yoniso padahati.|| ||

Pahitatto kāyena c'eva paramasaccaɱ sacchikaroti,||
paññāya ca ativijjha passati.|| ||

seyyathā pi so bhikkhave bhadro assājānīyo lomavedhaviddho saɱvijjati saɱvegaɱ āpajjati,||
tathūpamāhaɱ bhikkhave imaɱ bhadraɱ purisājānīyaɱ vadāmi.|| ||

Evarūpopi bhikkhave idh'ekacco bhadro purisājānīyo hoti.|| ||

Ayaɱ bhikkhave dutiyo bhadro purisājānīyo santo saɱvijjamāno lokasmiɱ.|| ||

[7][pts][ati] Puna ca paraɱ bhikkhave idh'ekacco bhadro purisājānīyo naheva kho suṇāti amukasmiɱ nāma gāme vā nigame vā itthī vā puriso vā dukkhito vā kālakato vā ti, napi sāmaɱ passati.|| ||

Itthiɱ vā purisaɱ vā dukkhitaɱ vā kālakataɱ vā.|| ||

Api ca khvassa ñāti vā sālohito vā dukkhito vā hoti kālakato vā.|| ||

So tena saɱvijjati saɱvegaɱ āpajjati.|| ||

[116] Saɱviggo yoniso padahati.|| ||

Pahitatto kāyena c'eva paramasaccaɱ sacchikaroti,||
paññāya ca ativijjha passati.|| ||

seyyathā pi so bhikkhave bhadro assājānīyo cammavedhaviddho saɱvijjati saɱvegaɱ āpajjati,||
tathūpamāhaɱ bhikkhave imaɱ bhadraɱ purisājānīyaɱ vadāmi,||
evarūpopi bhikkhave idh'ekacco bhadro purisājānīyo hoti.|| ||

Ayaɱ bhikkhave tatiyo bhadro purisājānīyo santo saɱvijjamāno lokasmiɱ.|| ||

[8][pts][ati] Puna ca paraɱ bhikkhave idh'ekacco bhadro purisājānīyo naheva kho suṇāti amukasmiɱ nāma gāme vā nigame vā itthī vā puriso vā dukkhito vā kālakato vā ti.|| ||

Napi sāmaɱ passati itthiɱ vā purisaɱ vā dukkhitaɱ vā kālakataɱ vā.|| ||

Napi'ssa ñāti vā sālohito vā dukkhito vā hoti kālakato vā.|| ||

Api ca kho sāmaɱ yeva phuṭṭho hoti sārīrikāhi vedanāhi dukkhāhi tibbāhi kharāhi kaṭukāhi asātāhi amanāpāhi pāṇaharāhi.|| ||

So tena saɱvijjati,||
saɱvegaɱ āpajjati,||
saɱviggo yoniso padahati.|| ||

Pahitatto kāyena c'eva paramasaccaɱ sacchikaroti,||
paññāya ca ativijjha passati.|| ||

seyyathā pi so bhikkhave bhadro assājānīyo aṭṭhivedhaviddho saɱvijjati saɱvegaɱ āpajjati,||
tathūpamāhaɱ bhikkhave imaɱ bhadraɱ purisājānīyaɱ vadāmi,||
evarūpopi bhikkhave idh'ekacco bhadro purisājānīyo hoti.|| ||

Ayaɱ bhikkhave catuttho bhadro purisājānīyo santo saɱvijjamāno lokasmiɱ.|| ||

Ime kho bhikkhave cattāro bhadrā purisājānīyā santo saɱvijjamānā lokasmin ti.|| ||

 


Contact:
E-mail
Copyright Statement   Webmaster's Page