Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Tika Nipāto
XII: Kesi Vagga

Sutta 115

Ṭhāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattār'imāni bhikkhave ṭhānāni.|| ||

Katamāni cattāri?|| ||

Atthi bhikkhave ṭhānaɱ amanāpaɱ kātuɱ,||
tañ ca kayiramānaɱ anatthāya saɱvattati.|| ||

Atthi bhikkhave ṭhānaɱ amanāpaɱ kātuɱ,||
tañ ca kayiramānaɱ atthāya saɱvattati.|| ||

Atthi bhikkhave ṭhānaɱ manāpaɱ kātuɱ,||
tañ ca kayiramānaɱ anatthāya saɱvattati.|| ||

Atthi bhikkhave ṭhānaɱ manāpaɱ kātuɱ,||
tañ ca kayiramānaɱ atthāya saɱvattati.|| ||

Tatra, bhikkhave, yam idaɱ ṭhānaɱ amanāpaɱ kātuɱ,||
tañ ca kayiramānaɱ anatthāya saɱvattati,||
idaɱ bhikkhave ṭhānaɱ ubhayen'eva na kattabbaɱ maññati.|| ||

Yampidaɱ ṭhānaɱ amanāpaɱ kātuɱ,||
imināpi taɱ na kattabbaɱ maññati.|| ||

Yampidaɱ ṭhānaɱ kayiramānaɱ anatthāya saɱvattati,||
imināpi na kattabbaɱ maññati.|| ||

Idaɱ, bhikkhave, ṭhānaɱ ubhayen'eva na kattabbaɱ maññati.|| ||

Tatra, bhikkhave, yam idaɱ ṭhānaɱ amanāpaɱ kātuɱ,||
tañ ca kayiramānaɱ atthāya saɱvattati,||
imasmiɱ bhikkhave ṭhāne bālo ca paṇḍito ca veditabbo purisatthāme purisaviriye purisaparakkame.|| ||

Na bhikkhave bālo iti paṭisacikkhati,||
'kiñcāpi kho idaɱ ṭhānaɱ amanāpaɱ kātuɱ,||
atha carah'idaɱ ṭhānaɱ kayiramānaɱ atthāya saɱvattatī' ti.|| ||

So taɱ ṭhānaɱ na karoti.|| ||

Tassa taɱ ṭhānaɱ akayiramānaɱ anatthāya saɱvattati.|| ||

Paṇḍito ca kho bhikkhave iti paṭisaɱcikkhati:||
'kiñcāpi kho idaɱ ṭhānaɱ amanāpaɱ kātuɱ,||
atha [119] carah'idaɱ ṭhānaɱ kayiramānaɱ atthāya saɱvattatī' ti.|| ||

So taɱ ṭhānaɱ karoti.|| ||

Tassa taɱ ṭhānaɱ kayiramānaɱ atthāya saɱvattatī ti.|| ||

Tatra, bhikkhave, yam idaɱ ṭhānaɱ manāpaɱ kātuɱ,||
tañ ca kayiramānaɱ anatthāya saɱvattati.|| ||

Imasmimpi bhikkhave ṭhāne bālo ca paṇḍito ca veditabbo purisatthāme purisaviriye purisaparakkame.|| ||

Na bhikkhave bālo iti paṭisaɱcikkhati: 'kiñcāpi kho idaɱ ṭhānaɱ manāpaɱ kātuɱ,||
atha carah'idaɱ ṭhānaɱ kayiramānaɱ anatthāya saɱvattatī' ti.|| ||

So taɱ ṭhānaɱ karoti.|| ||

Tassa taɱ ṭhānaɱ kayiramānaɱ anatthāya saɱvattati.|| ||

Paṇḍito ca kho bhikkhave iti paṭisaɱcikti:||
'kiñcāpi kho idaɱ ṭhānaɱ manāpaɱ kātuɱ,||
atha carah'idaɱ ṭhānaɱ kayiramānaɱ anatthāya saɱvattatī' ti.|| ||

So taɱ ṭhānaɱ na karoti.|| ||

Tassa taɱ ṭhānaɱ akayiramānaɱ atthāya saɱvattati.|| ||

Tatra, bhikkhave, yam idaɱ ṭhānaɱ manāpaɱ kātuɱ,||
tañ ca kayiramānaɱ atthāya saɱvattati,||
idaɱ bhikkhave ṭhānaɱ ubhayen'eva kattabbaɱ maññati.|| ||

Yampidaɱ ṭhānaɱ manāpaɱ kātuɱ,||
imināpi taɱ kattabbaɱ maññati.|| ||

Yampidaɱ ṭhānaɱ kayiramānaɱ atthāya saɱvattati,||
imināpi taɱ kattabbaɱ maññati.|| ||

Idaɱ, bhikkhave, ṭhānaɱ ubhayen'eva kattabbaɱ maññati.|| ||

Imāni kho bhikkhave cattāri ṭhānānīti.|| ||

 


Contact:
E-mail
Copyright Statement   Webmaster's Page