Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XIII: Bhaya Vagga

Sutta 126

Catuttha Puggala Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][than][nymo] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattārome bhikkhave puggalā santo saɱvijjamānā lokasmiɱ.|| ||

Katame cattāro?|| ||

Idha, bhikkhave, ekacco puggalo mettā-sahagatena cetasā ekaɱ disaɱ pharitvā viharati.|| ||

Tathā dutiyaɱ||
- tathā tatiyaɱ||
- tathā catutthiɱ||
- iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena akhyāpajjhena pharitvā viharati.|| ||

So yadeva tattha hoti rūpagataɱ vedanāgataɱ saññāgataɱ sankhāragataɱ viññāṇagataɱ,||
te dhamme aniccato dukkhato rogato gaṇḍato sallato aghato ābādhato parato palokato suññato anttato samanupassati.|| ||

So kāyassa bhedā param maraṇā Suddhāvāsanaɱ devānaɱ sahavyataɱ upapajjati.|| ||

Ayaɱ kho bhikkhave upapattī asādhāraṇā puthujjanehi.|| ||

Puna ca paraɱ bhikkhave idh'ekacco puggalo karuṇā-sahagatena cetasā ekaɱ disaɱ pharitvā viharati.|| ||

Tathā dutiyaɱ||
- tathā tatiyaɱ||
- tathā catutthiɱ||
- iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena akhyāpajjhena paritvā viharati.|| ||

So yadeva tattha hoti rūpagataɱ vedanāgataɱ saññāgataɱ sankhāragataɱ viññāṇagataɱ te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.|| ||

So kāyassa bhedā param maraṇā Suddhāvāsanaɱ devānaɱsahavyataɱ upapajjati.|| ||

Ayaɱ bhikkhave upapatti asādhāraṇā puthujjanehi.|| ||

Puna ca paraɱ bhikkhave idh'ekacco puggalo muditā-sahagatena cetasā ekaɱ disaɱ pharitvā viharati.|| ||

Tathā dutiyaɱ||
- tathā tatiyaɱ||
- tathā catutthiɱ||
- iti uddham-adho tiriyaɱ sabbadhi sabbattatāya sabbāvantaɱ lokaɱ muditāsahagateha cetasā vipulena mahaggatena appamāṇena averena akhyāpajjhena paritvā viharati.|| ||

So yadeva tattha hoti rūpagataɱ vedanāgataɱ saññāgataɱ sankhāragataɱ viññāṇagataɱ te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.|| ||

So kāyassa bhedā param maraṇā Suddhāvāsanaɱ devānaɱsahavyataɱ upapajjati.|| ||

Ayaɱ bhikkhave upapatti asādhāraṇā puthujjanehi.|| ||

Puna ca paraɱ bhikkhave idh'ekacco puggalo upekkhā-sahagatena cetasā ekaɱ disaɱ pharitvā viharati.|| ||

Tathā dutiyaɱ||
- tathā tatiyaɱ||
- tathā catutnathiɱ||
- iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena akhyāpajjhena pharitvā viharati.|| ||

So yadeva tattha hoti rūpagataɱ vedanāgataɱ saññāgataɱ sankhāragataɱ viññāṇagataɱ te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.|| ||

So kāyassa bhedā param maraṇā Suddhāvāsānaɱ devānaɱsahavyataɱ uppajjati.|| ||

Ayaɱ bhikkhave upapatti asādhāraṇā puthujjanehi.|| ||

Ime kho bhikkhave cattāro puggalā santo saɱvijjamānā lokasmin ti.|| ||

 


Contact:
E-mail
Copyright Statement   Webmaster's Page