Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XIII: Bhaya Vagga

Sutta 135

Vajja Puggala Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Cattārome bhikkhave puggalā santo saɱvijjamānā lokasmiɱ.|| ||

Katame cattāro?|| ||

"Sāvajjo,||
vajjabahulo,||
appavajjo,||
anavajjo.|| ||

3. Katañ ca bhikkhave puggalo sāvajjo hoti?|| ||

Idha, bhikkhave, ekacco puggalo sāvajjena kāyakammena samannāgato hoti,||
sāvajjena vacīkammena samannāgato hoti,||
sāvajjena manokammena samannāgato hoti.|| ||

Evaɱ kho bhikkhave puggalo sāvajjo hoti.|| ||

[136] Kathañ ca bhikkhave puggalo vajjabahulo hoti?|| ||

Idha, bhikkhave, ekacco puggalo sāvajjena bahulaɱ kāyakammena samannāgato hoti,||
appaɱ anavajjena.|| ||

Sāvajjena bahulaɱ vacīkammena samannāgato hoti appaɱ anavajjena.|| ||

Sāvajjena bahulaɱ manokammena samannāgato hoti,||
appaɱ anavajjena.|| ||

Evaɱ kho bhikkhave puggalo vajjabahulo hoti.|| ||

Kathañ ca bhikkhave puggalo appavajjo hoti?|| ||

Idha, bhikkhave, ekacco puggalo anavajjena bahulaɱ kāyakammena samannāgato hoti,||
appaɱ sāvajjena.|| ||

Anavajjena bahulaɱ vacīkammena samannāgato hoti,||
appaɱ sāvajjena.|| ||

Anavajjena bahulaɱ manokammena samannāgato hoti,||
appaɱsāvajjena.|| ||

Evaɱ kho bhikkhave puggalo appavajjo hoti.|| ||

Kathañ ca bhikkhave puggalo anavajjo hoti?|| ||

Idha, bhikkhave, ekacco puggalo anavajjena kāyakammena samannāgato hoti,||
anavajjena vacīkammena samannāgato hoti,||
anavajjena manokammena samannāgato hoti.|| ||

Evaɱ kho bhikkhave puggalo anavajjo hoti.|| ||

Ime kho bhikkhave cattāro puggalā santo saɱvijjamānā lokasmin" ti.|| ||

 


Contact:
E-mail
Copyright Statement   Webmaster's Page