Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XVII: Paṭipadā Vagga

Sutta 169

Kilesa-Parinibbāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][olds] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattārome bhikkhave puggalā santo saɱvijjamānā lokasmiɱ.|| ||

Katame cattāro?|| ||

Idha, bhikkhave, ekacco puggalo diṭṭhe va dhamme sasankhāraparinibbāyī hoti.|| ||

Idha pana bhikkhave ekacco puggalo kāyassa bhedā sasankhāraparinibbāyī hoti.|| ||

Idha pana bhikkhave ekacco puggalo diṭṭhe va dhamme asankhāraparinibbāyī hoti.|| ||

Idha pana bhikkhave ekacco puggalo kāyassa bhedā asankhāraparinibbāyī hoti.|| ||

 


 

Katañ ca bhikkhave puggalo diṭṭhe va dhamme sasankhāraparinibbāyī hoti?|| ||

Idha, bhikkhave, bhikkhu asubhānupassī kāye viharati||
āhāre paṭikkūlasaññī||
sabbaloke anabhiratasaññī||
sabbasankhāresu aniccānupassī.|| ||

Maraṇasaññā kho panassa [156] ajjhattaɱ sūpaṭṭhitā hoti.|| ||

So imāni pañca sekhabalāni upanissāya viharati:|| ||

Saddhābalaɱ||
hiribalaɱ||
ottappabalaɱ||
virayabalaɱ||
paññābalaɱ.|| ||

Tass'imāni pañcindriyāni adhimattāni pātubhavanti:|| ||

Saddhindriyaɱ||
viriyindriyaɱ||
satindriyaɱ||
samādhindriyaɱ||
paññindriyaɱ.|| ||

So imesaɱ pañcannaɱ indriyānaɱ adhimattattā diṭṭhe va dhamme sasankhāraparinibbāyī hoti.|| ||

Evaɱ kho bhikkhave puggalo diṭṭhe va dhamme sasankhāraparinibbāyī hoti.|| ||

 


 

Katañ ca bhikkhave puggalo kāyassa bhedā sasankhāraparinibbāyī hoti?|| ||

Idha, bhikkhave, bhikkhu asubhānupassī kāye viharati||
āhāre paṭikkūlasaññī||
sabbaloke anabhiratasaññī||
sabbasankhāresu aniccānupassī.|| ||

Maraṇasaññā kho panassa ajjhattaɱ supaṭṭhitā hoti.|| ||

So imāni pañca sekhabalāni upanissāya viharati:|| ||

Saddhābalaɱ||
hiribalaɱ||
ottappabalaɱ||
virayabalaɱ||
paññābalaɱ.|| ||

Tass'imāni pañcindriyāni muduni pātubhavanti:|| ||

Saddhindriyaɱ||
viriyindriyaɱ||
satindriyaɱ||
samādhindriyaɱ||
paññindriyaɱ.|| ||

So imesaɱ pañcannaɱ indriyānaɱ muduttā kāyassa bhedā sasankhāraparinibbāyī hoti.|| ||

Evaɱ kho bhikkhave puggalo kāyassa bhedā sasankhāraparinibbāyī hoti.|| ||

 


 

Kathañ ca bhikkhave puggalo diṭṭhe va dhamme asankhāraparinibbāyī hoti?|| ||

Idha, bhikkhave, bhikkhu vivicc'eva kāmehi||
vivicca akusalehi dhammehi||
savitakkaɱ savicāraɱ||
vivekajaɱ pīti-sukhaɱ||
paṭhamajjhānaɱ upasampajja viharati.|| ||

Vitakka-vicārānaɱ vupasamā||
ajjhattaɱ sampasādanaɱ cetaso ekodī-bhāvaɱ||
avitakkaɱ avicāraɱ||
samādhijī pīti-sukhaɱ||
dutiyajjhānaɱ upasampajja viharati.|| ||

Pītiyā ca virāgā upekkhako ca viharati||
sato ca sampajāno,||
sukhañ ca kāyena paṭisaŋvedeti||
yaɱ taɱ ariyā āvikkhanti||
'Upekkhako satimā sukhavihārī' ti||
tatiyajjhānaɱ upasampajja viharati.|| ||

Sukhassa ca pahānā||
dukkhassa ca pahānā||
pubb'eva somanassa-domanassānaɱ attha-gamā||
adukkhaɱ asukhaɱ||
upekkhā-sati-pārisuddhiɱ||
catutthajjhānaɱ upasampajja viharati.|| ||

So imāni pañca sekhabalāni upanissāya viharati:||
saddhābalaɱ||
hiribalaɱ||
ottappabalaɱ||
viriyabalaɱ||
paññābalaɱ.|| ||

Tass'imāni pañcindriyāni adhimattāni pātubhavanti:|| ||

Saddhindriyaɱ||
viriyindriyaɱ||
satindriyaɱ||
samādhindriyaɱ||
paññindriyaɱ.|| ||

So imesaɱ pañcannaɱ indriyānaɱ adhimattattā diṭṭhe va dhamme asankhāraparinibbāyī hoti.|| ||

Evaɱ kho bhikkhave puggalo diṭṭhe va dhamme asankhāraparinibbāyī hoti.|| ||

 


 

Kathañ ca bhikkhave puggalo kāyassa bhedā asankhāraparinibbāyī hoti?|| ||

Idha, bhikkhave, bhikkhu vivicc'eva kāmehi||
vivicca akusalehi dhammehi||
savitakkaɱ savicāraɱ||
vivekajaɱ pīti-sukhaɱ||
paṭhamajjhānaɱ upasampajja viharati.|| ||

Vitakka-vicārānaɱ vupasamā||
ajjhattaɱ sampasādanaɱ cetaso ekodī-bhāvaɱ||
avitakkaɱ avicāraɱ||
samādhijī pīti-sukhaɱ||
dutiyajjhānaɱ upasampajja viharati.|| ||

Pītiyā ca virāgā upekkhako ca viharati||
sato ca sampajāno,||
sukhañ ca kāyena paṭisaŋvedeti||
yaɱ taɱ ariyā āvikkhanti||
'Upekkhako satimā sukhavihārī' ti||
tatiyajjhānaɱ upasampajja viharati.|| ||

Sukhassa ca pahānā||
dukkhassa ca pahānā||
pubb'eva somanassa-domanassānaɱ attha-gamā||
adukkhaɱ asukhaɱ||
upekkhā-sati-pārisuddhiɱ||
catutthajjhānaɱ upasampajja viharati.|| ||

So imāni pañca sekhabalāni upanissāya viharati:||
saddhābalaɱ||
hiribalaɱ||
ottappabalaɱ||
viriyabalaɱ||
paññābalaɱ.|| ||

Tass'imāni pañcindriyāni muduni pātubhavanti:|| ||

Saddhindriyaɱ||
viriyindriyaɱ||
satindriyaɱ||
samādhindriyaɱ||
paññindriyaɱ.|| ||

So imesaɱ pañcannaɱ indriyānaɱ muduttā kāyassa bhedā asankhāraparinibbāyī hoti.|| ||

Evaɱ kho bhikkhave puggalo kāyassa bhedā asankhāraparinibbāyī hoti.|| ||

Ime kho bhikkhave cattāro puggalā santo saɱvijjamānā lokasmin" ti.|| ||


Contact:
E-mail
Copyright Statement   Webmaster's Page