Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XVIII: Sañcetana Vagga

Sutta 172

Sañcetanā Suttaɱ (a)

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][olds] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Cattāro'me bhikkhave attabhāvapaṭilābhā.|| ||

Katame cattāro?|| ||

Atthi bhikkhave attabhāvapaṭilābho,||
yasmiɱ attabhāvapaṭilābhe||
attasañcetanā kamati||
no parasañcetanā.|| ||

Atthi bhikkhave attabhāvapaṭilābho,||
yasmiɱ attabhāvapaṭilābhe||
parasañcetanā kamati||
no attasañcetanā.|| ||

Atthi bhikkhave attabhāvapaṭilābho,||
yasmiɱ attabhāvapaṭilābhe||
attasañcetanā ca kamati||
parasañcetanā ca.|| ||

Atthi bhikkhave attabhāvapaṭilābho,||
yasmiɱ attabhāvapaṭilābhe||
n'eva attasañcetanā kamati||
no parasañcetanā.|| ||

Ime kho bhikkhave cattāro attabhāvapaṭilābhā" ti.|| ||

 


 

2. Evaɱ vutte āyasmā Sāriputto Bhagavantaɱ etad avoca:|| ||

"Imassa kho ahaɱ bhante Bhagavatā sankhittena bhāsitassa evaɱ vitthārena atthaɱ ājānāmi:|| ||

Tatra bhante yvāyaɱ attabhāvapaṭilābho,||
yasmiɱ attabhāvapaṭilābhe||
attasañcetanā kamati||
no parasañcetanā||
attasañcetanāhetu tesaɱ sattānaɱ tamhā kāyā cuti hoti.|| ||

Tatra bhante yvāyaɱ attabhāvapaṭilābho,||
yasmiɱ attabhāvapaṭilābhe||
parasañcetanā kamati||
no attasañcetanā,||
parasañcetanāhetu tesaɱ sattānaɱ tamhā kāyā cuti hoti.|| ||

Tatra bhante yvāyaɱ attabhāvapaṭilābho,||
yasmiɱ attabhāvapaṭilābhe||
attasañcetanā ca kamati||
parasañcetanā ca,||
attasañcetanāhetu ca||
parasañcetanāhetu ca tesaɱ sattānaɱ tamhā kāyā cuti hoti.|| ||

Tatra bhante yvāyaɱ attabhāvapaṭilābho,||
yasmiɱ attabhāvapaṭilābhe||
n'eva attasañcetanā kamati||
no parasañcetanā—||
katame tena devā daṭṭhabbā" ti?|| ||

3. "N'evasaññānāsaññāyatanūpagā Sāriputta devā tena daṭṭhabbā" ti.|| ||

"Ko nu kho bhante hetu ko paccayo yenam idh'ekacce sattā tamhā kāyā cutā āgāmino honti āgantāro itthattaɱ?|| ||

Ko pana bhante hetu ko paccayo yenam [160] idh'ekacce sattā tamhā kāyā cutā anāgāmino honti anāgantāro itthattan" ti?|| ||

4. "Idha Sāriputta ekaccassa puggalassa orambhāgiyāni saññojanāni appahīnāni honti,||
so diṭṭhe va dhamme n'eva-saññā-nāsaññāyatanaɱ upasampajja viharati.|| ||

So tad assādeti tan nikāmeti,||
tena ca vittiɱ āpajjati.|| ||

Tattha ṭhito tad-adhimutto tabbahulavihārī,||
aparihīno kālaɱ kurumāno n'eva-saññā-nāsaññāyatanūpagānaɱ devānaɱ sahavyataɱ upapajjati,||
so tato cuto āgāmī hoti āgantā itthattaɱ.|| ||

5. Idha pana Sāriputta ekaccassa puggalassa orambhāgiyāni saññojanāni pahīnāni honti,||
so diṭṭhe va dhamme n'eva-saññā-nāsaññāyatanaɱ upasampajja viharati.|| ||

So tad assādeti tan nikāmeti,||
tena ca vittiɱ āpajjati.|| ||

Tattha ṭhito tadadhimutto tabbahulavihārī,||
aparihīno kālaɱ kurumāno n'eva-saññā-nāsaññāyatanūpagānaɱ devānaɱ sahavyataɱ upapajjati,||
so tato cuto anāgāmī hoti anāgantā itthattaɱ.|| ||

Ayaɱ kho Sāriputta hetu ayaɱ paccayo,||
yenam idh'ekacce sattā tamhā kāyā cutā āgāmino honti āgantāro itthattaɱ.|| ||

Ayaɱ pana Sāriputta hetu ayaɱ paccayo,||
yenam idh'ekacce sattā tamhā kāyā cutā anāgāmino honti anāgantāro itthattan" ti.

 


Contact:
E-mail
Copyright Statement   Webmaster's Page