Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikaya
Catukkanipata

Sutta 176

Āyācamāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

Bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

Saddho bhikkhave bhikkhu evaɱ sammā āyācamāno āyāceyya:|| ||

Tādiso homi yādisā Sāriputta-Moggallānāti.|| ||

Esā bhikkhave tulā,||
etaɱ pamāṇaɱ mama sāvakānaɱ bhikkhūnaɱ||
yad idaɱ Sāriputta-Moggallānā.|| ||

Saddhā bhikkhave bhikkhunī evaɱ sammā āyācamānā āyāceyya:|| ||

Tādisā homi yādisā Khema ca bhikkhunī Uppalavaṇṇā vāti.|| ||

Esā bhikkhave tulā,||
etaɱ pamāṇaɱ mama sāvikānaɱ bhikkhunīnaɱ||
yad idaɱ Khemā ca bhikkhunī Uppalavaṇnā ca.|| ||

Saddho bhikkhave upāsako evaɱ sammā āyācamāno āyāceyya:|| ||

Tādiso homi yādiso Citto ca gahapati Hatthako ca Āḷavako ti.|| ||

Esā bhikkhave tulā,||
etaɱ pamāṇaɱ mama sāvakāna upāsakānaɱ||
yad idaɱ citto ca gahapati Hatthako ca Āḷavako.|| ||

Saddhā bhikkhave upāsikā evaɱ sammā āyācamānā āyāceyya:|| ||

Tadisā homi yādisā Khujjuttarā ca upāsikā Velukaṇḍakiyā ca Nandamātāti.|| ||

Esā bhikkhave tulā,||
etaɱ pamāṇaɱ mama sāvikānaɱ upāsikānaɱ||
yad idaɱ Khujjuttarā ca upāsikā Velukaṇṭakiyā ca nandamātā ti.|| ||


Contact:
E-mail
Copyright Statement   Webmaster's Page